ក្នុងលិខិតរបស់ក្រសួងសុខាភិបាលផ្ញើចូលក្រសួងព័ត៌មាននៅថ្ងៃទី៧ ខែឧសភា បានរៀបរាប់ថា ទូរទស្សន៍និងវិទ្យុដែលបំពានច្បាប់នោះ រួមមាន ទូរទស្សន៍រាជធានីភ្នំពេញ ផ្សព្វផ្សាយថ្នាំកក់បណ្ដុះសក់ក្បាលទំពែក ហែ ក្រូស អាប់ (Hair Grow Up) និងថ្នាំ យ៉ាសម៉ាស (Yashmark) សម្រាប់បំបាត់សម្លាកគ្រប់បែបយ៉ាង។ ទូរទស្សន៍អាស៊ីអាគ្នេយ៍ ផ្សព្វផ្សាយថ្នាំបំបាត់មុន ឃេវតិច និងផលិតផលអាវពាក់រឹបដើមទ្រូងស្ត្រីជួយសាច់ខ្នងឲ្យស្អាត និងមានទូរទស្សន៍ឯទៀតផ្សាយពីផលិតផលក្រែមបំបាត់ជាំស្បែក ធ្វើឲ្យស្បែកស្អាត ក្រែមសម្រករាង បន្តឹងខ្លួនប្រាណបញ្ចេញជាតិពុល ក្រែមវេទមន្ត 4D ថែរក្សាសម្រស់បំបាត់ស្នាមជ្រីវជ្រួញ បំបាត់ជាំមុខ ម៉ាសបិទពង្រីកដើមទ្រូង និងម៉ាសបិទបកស្បែកជើង ស្បែកក្រិនស្ងួត។
លិខិតដដែលក៏បានរៀបរាប់ថា មានវិទ្យុមួយចំនួន រួមមានវិទ្យុ FM 93.5 HMz និងFM 107.5 HMzផ្សព្វផ្សាយផ្សិតលីងជី កាកសរសៃ ហ្វីប៊ើ (Fiber) ទឹកញ ទឹកប្រទាលកន្ទុយក្រពើប៉ូវសុខភាពជាដើម។
ក្រសួងសុខាភិបាលអំពាវនាវឲ្យក្រសួងព័ត៌មាន ទប់ស្កាត់ការឃោសនាបោកប្រាស់របស់ក្រុមហ៊ុនទាំងនោះដែលនាំឲ្យប៉ះពាល់ធ្ងន់ធ្ងរដល់សុខភាព។ មួយវិញទៀត ផលិតផលបំប៉នសុខភាព និងផលិតផលគ្រឿងសំអាងទាំងនោះ គ្មានលិខិតអនុញ្ញាតពីក្រសួងសុខាភិបាល និងពុំបានឆ្លងការត្រួតពិនិត្យគុណភាព ប្រសិទ្ធភាព សុវត្ថិភាពនោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។