របាយការណ៍សិក្សាស្រាវជ្រាវថ្មីមួយបានបង្ហាញថា ការប្រឈមនេះស្ថិតក្នុងចំណោមអ្នកបម្រើការងារកម្សាន្ត ឬនារីបម្រើស្រាបៀ អ្នកបម្រើសេវាផ្លូវភេទផ្ទាល់ ក្រុមបុរសស្រឡាញ់បុរស។
របាយការណ៍ស្រាវជ្រាវមានចំណងជើងថា «ការពិនិត្យអំពីបទពិសោធន៍ជីវិត និងការប្រឈមមេរោគអេដស៍របស់ក្រុមយុវវ័យបម្រើការងារនៅកន្លែងសេវាកម្សាន្ត» ដែលក្រុមមន្ត្រីសុខាភិបាលពិភាក្សាគ្នាក្នុងសិក្ខាសាលានៅភ្នំពេញ កាលពីសប្ដាហ៍មុនបង្ហាញថា អត្រាឆ្លងមេរោគអេដស៍ថ្មីកំពុងឆ្លងចំពោះក្រុមមនុស្សវ័យក្មេង។
ការស្រាវជ្រាវដែលរៀបចំឡើងដោយអង្គការសុខភាពគ្រួសារអន្តរជាតិ ៣៦០ ហៅកាត់ភាសាអង់គ្លេសថា អិន.ជី.អូ អេហ្វ.អេច្ឆ.អាយ (NGO FHI) សហការជាមួយអង្គការមូលនិធិអង្គការសហប្រជាជាតិដើម្បីកុមារ ឬហៅថា យូនីសេហ្វ (UNICEF) បានសម្រេចជ្រើសរើសយកក្រុង ៤ ដើម្បីសិក្សា គឺទីក្រុងភ្នំពេញ សៀមរាប ព្រះសីហនុ និងប៉ោយប៉ែត។ ការជ្រើសយកក្រុងទាំង ៤ នេះ ដោយហេតុថា ក្រុងទាំងនោះមានចំនួនអ្នកបម្រើការក្នុងកន្លែងសេវាកម្សាន្តច្រើនជាងគេ។
មនុស្ស ៨២នាក់ ត្រូវបានក្រុមការងារសាកសួរក្នុងការសិក្សាស្រាវជ្រាវនេះ ក្នុងនោះមានស្ត្រី ៤៥នាក់ បុរស ២៤នាក់ និងអ្នកភេទទីបី ១៣នាក់។ ក៏ប៉ុន្តែមានតែមនុស្សចំនួន ៧៧នាក់ទេដែលត្រូវបានសម្ភាសស៊ីជម្រៅ។ ជាលទ្ធផលក្រុមមនុស្សវ័យក្មេងគេមិនសូវយល់ដឹងអំពីការអប់រំបង្ការមេរោគអេដស៍ ខណៈក្រុមបុរសបម្រើការងារក្នុងកន្លែងសេវាកម្សាន្តមានកម្រិតយល់ដឹងគ្រោះថ្នាក់ អេច្ឆ.អាយ.វី ខ្ពស់។
ចំពោះការចម្លងថ្មីលើក្រុមមនុស្សវ័យក្មេង មិនត្រឹមតែឆ្លងនៅក្នុងប្រទេសកម្ពុជាទេ គឺឆ្លងទូទាំងពិភពលោកតែម្ដង ដែលរបាយការណ៍នេះ បង្ហាញអត្រាឆ្លងមានប្រហែល ៤០ភាគរយលើសកលលោក។ ចំពោះក្រុមមនុស្សវ័យក្មេងត្រូវបានអង្គការសហប្រជាជាតិកំណត់អាយុចាប់ពី ១៥ឆ្នាំ ដល់ ២៤ឆ្នាំ។
ចំពោះអត្រាឆ្លងថ្មីចំពោះក្រុមមនុស្សវ័យក្មេងនេះ អនុប្រធានអាជ្ញាធរជាតិប្រយុទ្ធប្រឆាំងជំងឺអេដស៍នៃក្រសួងសុខាភិបាល លោកវេជ្ជបណ្ឌិត ទា ផល្លា មានប្រសាសន៍ថា បើចែកជាភាគរយនៃតួលេខនេះ ប្រទេសកម្ពុជាមានអត្រាឆ្លងថ្មីលើមនុស្សទូទៅប្រហែល ១.២០០នាក់ និងក្រុមមនុស្សវ័យក្មេងមានអត្រាឆ្លងប្រហែល ៤០០ ទៅ ៥០០នាក់ ក្នុងមួយឆ្នាំៗ គិតពីឆ្នាំ២០១២-២០១៣៖ «យើងអាចថា ក្នុងបច្ចុប្បន្នគឺកម្រិតឆ្លងថ្មី គឺ ១.២០០នាក់ក្នុងមួយឆ្នាំ ហើយស្លាប់ប្រហែលជិត ២ពាន់ក្នុងមួយឆ្នាំ គឺបើគិតជានាក់ ក្នុងឆ្នាំឆ្លងថ្មី ៣នាក់ ហើយស្លាប់ ៣នាក់ក្នុងមួយថ្ងៃ»។
ទោះយ៉ាងណា លោកថាចំនួនអត្រាឆ្លងនេះ បានថយចុះច្រើនប្រៀបធៀបឆ្នាំមុនៗ។
កម្ពុជាមានអត្រាឆ្លងមេរោគអេដស៍ខ្លាំងនៅអំឡុងឆ្នាំ១៩៩៦ ដល់ ១៩៩៨ គឺមានចំនួន ១,៧ភាគរយនៃក្រុមមនុស្សអាយុពី ១៥ ដល់ ៤៩ឆ្នាំ។
របាយការណ៍វិទ្យាស្ថានជាតិសុខភាពសាធារណៈបង្ហាញថា មនុស្សជិត ៨ម៉ឺននាក់ឆ្លងមេរោគអេដស៍ ក្នុងនោះមានកុមារប្រហែល ៥.៣០០នាក់។ មេរោគអេដស៍បានសម្លាប់មនុស្សប្រហែល ២.៣០០នាក់នៅឆ្នាំ២០១២។
លោកវេជ្ជបណ្ឌិត អ៊ុំ សុភាព ប្រធានអង្គការខាណា (Khana) មានប្រសាសន៍ថា សព្វថ្ងៃអ្នកផ្ទុកមេរោគអេដស៍ភាគច្រើនរស់នៅវេទនាគ្មានការងារធ្វើ គ្មានប្រាក់ធ្វើដើមទុនបង្កើតរបររកស៊ីចិញ្ចឹមជីវិត បន្ទាប់ពីអង្គការសហប្រជាជាតិ និងអន្តរជាតិផ្ដាច់ប្រាក់ជំនួយផ្នែក អេច្ឆ.អាយ.វី អេដស៍ បន្ទាប់ពីកម្ពុជា បានប្រកាសថា កម្ពុជាលែងប្រឈមនឹងមេរោគអេដស៍ជំងឺអេដស៍រួចមក។
លោកថា សព្វថ្ងៃមានស្ត្រីបម្រើសេវាកម្សាន្តប្រហែល ៤ម៉ឺននាក់ ក្នុងនោះមានអ្នកផ្ទុកមេរោគអេដស៍ផង។ លោកថា អ្នកផ្ទុកមេរោគអេដស៍សព្វថ្ងៃកំពុងប្រឹងជួយខ្លួនឯង ដោយនាំគ្នាបង្កើតសមាគមសន្សំប្រាក់យកដើមទុនរកស៊ី។
ក្រៅពីនេះលោក អ៊ុំ សុភាព បញ្ជាក់ថា កន្លែងបម្រើសេវាកម្សាន្តតាមហាងនានា អាចជួយអ្នកផ្ទុកមេរោគអេដស៍រកប្រាក់ចិញ្ចឹមជីវិតប្រចាំថ្ងៃបានបង្គួរ ដោយលោកថា តាមរយៈការងារបម្រើសេវាកម្សាន្តនេះ អ្នកផ្ទុកចំណាយតែកម្លាំង មិនចាំបាច់ឲ្យពួកគាត់ចំណាយដើមទុនអាចរកប្រាក់ចិញ្ចឹមជីវិតបានដែរ។
ប្រទេសកម្ពុជាសព្វថ្ងៃសម្បូរទៅដោយការផ្សាយពាណិជ្ជកម្មស្រា និងស្រាបៀច្រើនប្រភេទ និងសម្បូរហាងស្រា រង្គសាលកម្សាន្ត ដែលភាគច្រើនគេសង្កេតឃើញក្រុមបុរសនាំគ្នាទៅលេងកម្សាន្ត ឬរកដៃគូរួមភេទ អាចប្រឈមឆ្លងមេរោគអេដស៍ខ្លាំង។
លោក ទា ផល្លា រំលឹកថា បុរសដែលចូលចិត្តដើរលេងមានដៃគូស្នេហាច្រើននៅខាងក្រៅ គួរបែរមកផ្ដល់ក្ដីស្រឡាញ់ និងផ្ដល់ភាពកក់ក្ដៅឲ្យប្រពន្ធកូនក្នុងផ្ទះវិញ ដើម្បីជាការរួមចំណែកកាត់បន្ថយការចម្លងមេរោគអេដស៍ផង និងដើម្បីសង្គមថ្លៃថ្នូរផង៖ «យើងនិយាយតែពីរឿងដើរលេងខាងក្រៅ ក៏ប៉ុន្តែយើងអត់បានជួយជំរុញថា ធ្វើម៉េចឲ្យស្រឡាញ់កូនស្រឡាញ់គ្រួសារ។ យើងឮតែពាក្យថា ថើបអូនមក ប៉ុន្តែអត់ដែលឮថាថើបកូនមក...»។
លទ្ធផលនៃការស្រាវជ្រាវនេះ គឺដើម្បីធ្វើជាឯកសារសម្រាប់អ្នកធ្វើគោលនយោបាយ និងជាព័ត៌មានសម្រាប់អង្គការនានាដែលធ្វើការពាក់ព័ន្ធ អេច្ឆ.អាយ.វី អេដស៍ ដើម្បីរួមគ្នាចាត់វិធានការទប់ស្កាត់ការឆ្លងរីករាលដាលទៅអនាគត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។