អភិបាលរាជធានីភ្នំពេញ លោក ប៉ា សុជាតិវង្ស ដែលទើបឡើងទទួលតំណែងថ្មីៗ មានប្រសាសន៍ថា លោកនាយករដ្ឋមន្ត្រី ហ៊ុន សែន បានបញ្ជាឲ្យបិទសិប្បកម្មផលិតទឹកកកមានទីតាំងក្នុងភូមិស្ពានខ្ពស់ សង្កាត់គីឡូម៉ែត្រលេខ៦ ខណ្ឌឫស្សីកែវ ជាបន្ទាន់ បន្ទាប់ពីសិប្បកម្មនេះបានធ្លាយឧស្ម័នអាម៉ូញ៉ាក់ បង្កឲ្យប្រជាពលរដ្ឋរស់នៅជិតខាងពុល។
លោក ប៉ា សុជាតិវង្ស ដែលបានចុះផ្ទាល់ដល់ទីកន្លែងកើតហេតុ មានប្រសាសន៍ថា សិប្បកម្មផលិតទឹកកកនៅសង្កាត់គីឡូម៉ែត្រលេខ៦ ត្រូវបិទជាស្ថាពរ និងត្រូវប្ដូរទៅកាន់ទីតាំងថ្មី។
អភិបាលខណ្ឌឫស្សីកែវ លោក ឃ្លាំង ហួត ដែលបានចុះទៅដល់មន្ទីរពេទ្យសម្ដេចឪ និងទីតាំងសិប្បកម្មផលិតទឹកកកអម្រឹត បានឲ្យដឹងថា សិប្បកម្មផលិតទឹកកកបង្កបញ្ហាបណ្ដាលឲ្យពលរដ្ឋពុលសារធាតុផ្សំរហូតដល់ជិត ១០០នាក់ បានកើតឡើងតាំងពីថ្ងៃទី៨ ខែឧសភា មកម្ល៉េះ។ ហើយបញ្ហានេះ លោកបានចេញលិខិតឲ្យម្ចាស់សិប្បកម្មផលិតទឹកកកបង្កហេតុ ផ្អាកសកម្មភាពជាបណ្ដោះអាសន្ន ប៉ុន្តែត្រូវម្ចាស់សិប្បកម្មមួយនេះមិនអនុវត្តតាមទេ រហូតមានបទបញ្ជាពីប្រមុខដឹកនាំ។
លោកឲ្យដឹងថា សិប្បកម្មផលិតទឹកកកមានឈ្មោះអម្រឹត ត្រូវបានលោកនាយករដ្ឋមន្ត្រី ហ៊ុន សែន បញ្ជាឲ្យបិទទ្វាររោងចក្រ និងត្រូវប្ដូរទៅកាន់ទីតាំងថ្មីនៅវេលាម៉ោងប្រមាណ ១០យប់ ថ្ងៃទី១០ ខែឧសភា។
ដោយសារពុលជាតិឧស្ម័នសាយភាយពីសិប្បកម្មនោះ មានប្រជាពលរដ្ឋជិត ១០០នាក់ ជាពិសេសស្ត្រីកូនខ្ចី និងកុមារធ្លាក់ ខ្លួនឈឺជាបន្តបន្ទាប់ ត្រូវបញ្ជូនទៅសង្គ្រោះបន្ទាន់នៅមន្ទីរពេទ្យសម្ដេចតា ឬមន្ទីរពេទ្យសម្ដេចឪ នៅក្បែរនោះ។
គ្រូពេទ្យប្រចាំការនៅមន្ទីរពេទ្យសម្ដេចឪ ឬសម្ដេចតា ដែលបានជួយសង្គ្រោះអ្នកជំងឺ មានប្រសាសន៍ថា អាការៈរបស់អ្នកជំងឺ គឺវិលមុខ ក្អួតចង្អោរ ល្ហិតល្ហៃដៃជើង និងថប់ដង្ហើម។ ប៉ុន្តែមិនទាន់មានអ្នកជំងឺណាម្នាក់រងគ្រោះដល់អាយុជីវិតនៅឡើយទេ ព្រោះគ្រូពេទ្យជួយសង្គ្រោះបានទាន់ពេលវេលា។
ប្រជាពលរដ្ឋ និងអ្នកជំងឺ បានសាទរចំពោះបទបញ្ជាបិទសិប្បកម្មផលិតទឹកកកអម្រឹត ដែលបង្កភាពក្តៅក្រហាយដល់ប្រជាពលរដ្ឋសង្កាត់គីឡូម៉ែត្រលេខ៦ តាំងពីឆ្នាំ២០១១។ ការតវ៉ារបស់ប្រជាពលរដ្ឋសង្កាត់គីឡូម៉ែត្រលេខ៦ បានឈានដល់បិទផ្លូវជាតិលេខ៥ ផង ដើម្បីស្នើឲ្យអាជ្ញាធរជួយមានវិធានការបិទសិប្បកម្មផលិតទឹកកកមួយនេះ។
កូនប្រុសលោក តុង សេង អភិបាលរងខេត្តកំពង់ស្ពឺ ដែលជាម្ចាស់ទីតាំងសិប្បកម្មផលិតទឹកកកបង្កហេតុ បានសន្យាថា នឹងប្ដូរទីតាំងផលិតទឹកកករបស់ខ្លួនទៅកាន់ទីតាំងផ្សេងភ្លាមៗ បន្ទាប់ពីមានបទបញ្ជាប្រមុខដឹកនាំ ដែលខុសពីពេលមុនមិនស្តាប់សំណូមពរអាជ្ញាធរនោះ។
លោក ប៉ា សុជាតិវង្ស អភិបាលរាជធានីភ្នំពេញ មានប្រសាសន៍ថា រាល់អ្នកជំងឺទាំងអស់ដែលបានបញ្ជូន និងកំពុងសម្រាកនៅមន្ទីរពេទ្យ មិនអនុញ្ញាតឲ្យមន្ទីរពេទ្យយកលុយទេ គឺសាលារាជធានីជាអ្នកធានារ៉ាប់រងទាំងស្រុង។ ហើយថា ម្ចាស់សិប្បកម្មផលិតទឹកកកអម្រឹត នឹងអាចប្រឈមមុខច្បាប់ បើរកឃើញកំហុសឆ្គងធ្ងន់ធ្ងរនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។