គ្រឿងស្រវឹង គឺជាមូលហេតុទី៣ ដែលបណ្ដាលអោយមានអ្នកស្លាប់ប្រមាណជាង ២,៥លាននាក់ក្នុងមួយឆ្នាំៗនៅលើពិភពលោក និងបង្កអោយមានជំងឺប្រមាណ ២០០មុខ ដូចជា ជំងឺក្រិនថ្លើម ស្ទះសរសៃឈាម ដំបៅក្រពះជាដើម។ ដើម្បីលើកកម្ពស់ការយល់ដឹងពីផលប៉ះពាល់នៃគ្រឿងស្រវឹង អង្គការចលនាដើម្បីសុខភាពកម្ពុជា បានរៀបចំការប្រកួតបង្កើតវីដេអូឃ្លិបខ្លី ក្រោមប្រធានបទ “ផលប៉ះពាល់នៃការប្រើប្រាស់គ្រឿងស្រវឹងលើយុវជន”។
អ្នកសិក្សារកឃើញថា គ្រឿងស្រវឹងគឺជាដើមចងបង្កឲ្យមានគ្រោះថ្នាក់ចរាចរណ៍ ការបាត់បង់សណ្ដាប់ធ្នាប់សង្គម អំពើហិង្សាក្នុងគ្រួសារ និងបញ្ហាសង្គមជាច្រើនផ្សេងទៀត។
ប្រធានផ្នែកថ្នាំជក់ និងគ្រឿងស្រវឹងនៃមជ្ឈមណ្ឌលជាតិលើកកម្ពស់សុខភាពនៃក្រសួងសុខាភិបាល អ្នកស្រីវេជ្ជបណ្ឌិត រ៉ាយ រ៉ានី បានថ្លែងប្រាប់វិទ្យុអាស៊ីសេរីថា ការប្រើប្រាស់គ្រឿងស្រវឹង គឺមិនត្រឹមតែបណ្ដាលអោយមានគ្រោះថ្នាក់ចរាចរណ៍នោះទេ តែវាក៏ប៉ះពាល់ដល់សុខភាពផងដែរ គឺបង្កអោយមានផលប៉ះពាល់ទាំងរយៈពេលខ្លី និងរយៈពេលវែង។ រយៈពេលខ្លី គឺអ្នកប្រើប្រាស់មានអាការៈឈឺក្បាល ស្រវឹង វង្វេងវង្វាន់ ជាដើម ហើយរយៈពេលវែង គឺអាចមានជំងឺលើសឈាម មហារីក និងជំងឺជាច្រើនផ្សេងទៀត។
តំណាងអង្គការសុខភាពពិភពលោក លោក ចេមន៍ រ៉ារីក (James Rarick) បានថ្លែងក្នុងកម្មវិធីប្រគល់រង្វាន់ការបង្កើតវីដេអូខ្លី ស្ដីពីផលប៉ះពាល់នៃគ្រឿងស្រវឹងលើយុវជន កាលពីព្រឹកថ្ងៃទី៤ ខែឧសភា នៅសណ្ឋាគារ Intercontinental ថា លោកមានការព្រួយបារម្ភជាខ្លាំង ព្រោះកំណើននៃការប្រើប្រាស់គ្រឿងស្រវឹងរបស់យុវជនកម្ពុជា មានការកើនឡើង ជាពិសេសតាមការស្រាវជ្រាវបានអោយដឹងថា យុវជនវ័យពី ១៣ ទៅ ១៧ឆ្នាំ បានប្រើប្រាស់គ្រឿងស្រវឹង ហើយការប្រើប្រាស់នេះមានចំនួនរហូតដល់ទៅ ៣១% នៃចំនួនយុវជនវ័យនេះ៖ «យើងដឹងហើយថា យុវវ័យគឺជាវ័យដែលដំណើរការខួរក្បាលវិវត្តន៍ល្អ អ៊ីចឹងកាលណាបើការប្រើប្រាស់គ្រឿងស្រវឹងក្នុងអំឡុងពេលយុវវ័យធ្វើអោយប៉ះពាល់ដល់សុខភាពចិត្ត រាងកាយ និងអាចឈានដល់ប្រព្រឹត្តដល់ផ្លូវអារម្មណ៍ និងផ្លូវភេទជាដើម ដែលបង្កឡើងដោយការប្រើប្រាស់គ្រឿងស្រវឹង»។
ការស្រាវជ្រាវរបស់សាកលវិទ្យាល័យភូមិន្ទភ្នំពេញ ឲ្យដឹងថា ប្រជាជនកម្ពុជា ចាប់ផ្ដើមប្រើប្រាស់គ្រឿងស្រវឹង ចាប់ពីអាយុ ៨ ដល់ ៣៥ឆ្នាំ មាន ៩៤ភាគរយ។ ការស្រាវជ្រាវនេះ បានអោយដឹងថា ពលរដ្ឋកម្ពុជា ៩៦ភាគរយ ចង់ស្នើសុំអោយរដ្ឋាភិបាល និងអង្គនីតិប្បញ្ញត្តិ បង្កើតនូវច្បាប់គ្រប់គ្រងគ្រឿងស្រវឹង ដោយមានដាក់បញ្ចូលនូវវិធានការ ៤សំខាន់ៗ រួមមាន ការដំឡើងពន្ធផលិតផលគ្រឿងស្រវឹង ការរឹតបន្តឹង ឬហាមឃាត់ការផ្សាយពាណិជ្ជកម្មគ្រឿងស្រវឹង ការកំណត់អាយុនៃអ្នកប្រើប្រាស់ ឬទិញគ្រឿងស្រវឹង និងការកម្រិតពីភាពងាយរកបាននូវគ្រឿងស្រវឹង។
ប្រធានគម្រោងអង្គការចលនាដើម្បីសុខភាពកម្ពុជា កញ្ញា ម៉ក់ ទេវិន្ទ បានបញ្ជាក់ដែរថា អង្គការកញ្ញាគ្រោងនឹងមានសកម្មភាពជាមួយយុវជនបន្តទៀត ដើម្បីជំរុញអោយរាជរដ្ឋាភិបាលដាក់បញ្ចូលវិធានការ ៤ នេះ ទៅក្នុងច្បាប់នៃការប្រើប្រាស់គ្រឿងស្រវឹង៖ «គម្រោងយើងដែលយើងធ្វើតទៅទៀតហ្នឹង គឺចង់បម្រុងអោយមានច្បាប់ស្ដីពីការត្រួតពិនិត្យផលិតផលគ្រឿងស្រវឹង ហើយជាពិសេស គឺយើងត្រូវការការគាំទ្រពីយុវជន ដូច្នេះយើងនឹងបន្តស្វែងរកសំឡេង ការគាំទ្រពីយុវជនជាបន្ថែមទៀត ដើម្បីអោយគាត់គាំទ្រទៅរដ្ឋាភិបាលអោយមានការអនុម័តច្បាប់ស្ដីពីការត្រួតពិនិត្យគ្រឿងស្រវឹង»។
របាយការណ៍អង្គការចលនាដើម្បីសុខភាពកម្ពុជា បង្ហាញថា គ្រោះថ្នាក់ចរាចរណ៍ដែលបណ្ដាលមកពីគ្រឿងស្រវឹងនៅកម្ពុជា បានសម្លាប់ប្រជាជនកម្ពុជា ២.០០០នាក់ និងរបួសជាច្រើននាក់ រួមទាំងបណ្ដាលអោយខាតបង់ទ្រព្យសម្បត្តិជាង ៤៤លានដុល្លារ នៅឆ្នាំ២០១១៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។