កិច្ចព្រមព្រៀងនោះ គឺរាជរដ្ឋាភិបាលជប៉ុន បានផ្តល់ជំនួយឥតសំណងចំនួនជាង ៩១.៤២៩ដុល្លារអាមេរិក។
រាជរដ្ឋាភិបាលជប៉ុន បានផ្តល់ជំនួយជាទឹកប្រាក់មួយចំនួនដល់កម្ពុជា ដើម្បីបំពាក់ឧបករណ៍ទំនើបៗនៅគ្លីនិកមួយនៅរាជធានីភ្នំពេញ ដើម្បីព្យាបាលត្រចៀកជូនប្រជាពលរដ្ឋខ្មែរ និងកុមារខ្មែរជាច្រើនពាន់នាក់ ដែលមានជំងឺត្រចៀក ឬស្តាប់មិនឮ។ សេវាកម្មនៃការព្យាបាលនោះ គឺមិនយកកម្រៃអ្វីឡើយ។
ការសិក្សាស្រាវជ្រាវបានឲ្យដឹងថា មានប្រជាពលរដ្ឋខ្មែរចំនួនជាង ២.០០០នាក់ មានជំងឺត្រចៀកស្តាប់មិនឮ ប៉ុន្តែគេមិនទាន់មានឧបករណ៍ទំនើបៗដើម្បីស្វែងរករោគវិនិច្ឆ័យ និងព្យាបាលមានប្រសិទ្ធភាពនៅឡើយរហូតដល់ពេលនេះ។
លោក ហ៊ីហ្គួជី យូស៊ីហ៊ីរ៉ូ បានមានប្រសាសន៍ជាភាសាអង់គ្លេស ហើយត្រូវបានប្រែសម្រួលជាភាសាខ្មែរថា ជំនួយនេះ គឺបំពាក់ឧបករណ៍បញ្ចាំងភ្លើងហ្វា និងសង់បន្ទប់ពិសោធន៍ស្តាប់សំឡេង និងឧបករណ៍ទំនើបៗដទៃទៀត ដើម្បីព្យាបាលជំងឺត្រចៀក។
លោក ហ៊ីហ្គួជី យូស៊ីហ៊ីរ៉ូ ៖ «ខ្ញុំសង្ឃឹមថា គម្រោងដែលចុះហត្ថលេខានៅថ្ងៃនេះ នឹងត្រូវបានអនុវត្តន៍ដោយរលូន និងមានប្រសិទ្ធភាព ព្រមទាំងថែទាំយ៉ាងត្រឹមត្រូវដោយដៃគូរបស់យើង គឺអង្គការសុខភាពត្រចៀកនៅកម្ពុជា ដើម្បីឲ្យអ្នកជំងឺជាច្រើននៅថ្ងៃអនាគត អាចទទួលបានអត្ថប្រយោជន៍ពីគម្រោងនេះ។ ចុងក្រោយនេះ ខ្ញុំសង្ឃឹមថា កិច្ចសហប្រតិបត្តិការនេះ នឹងជួយពង្រឹងជាបន្តទៀត នូវទំនាក់ទំនងមិត្តភាពរវាងប្រជាជនជប៉ុន និងប្រជាជនកម្ពុជា»។
ជាមួយគ្នានេះ លោកវេជ្ជបណ្ឌិតជំនាញខាងព្យាបាលត្រចៀកនៃអង្គការសុខភាពត្រចៀក នៅរាជធានីភ្នំពេញ លោក គ្លីន វូហ្គេន បានមានប្រសាសន៍ថា ឧបករណ៍ទំនើបដែលនឹងបំពាក់ខាងមុខនេះ គឺមានសមត្ថភាពស្វែងរករោគសញ្ញាជំងឺជាក់លាក់ចំពោះកុមារ និងប្រជាពលរដ្ឋខ្មែរច្រើនពាន់នាក់ ដែលមានជំងឺត្រចៀក ឬថ្លង់ជាដើម។
លោកបានបន្តថា នៅប្រទេសកម្ពុជា ដែលជាប្រទេសកំពុងតែអភិវឌ្ឍន៍នោះ ប្រជាពលរដ្ឋ និងកុមារខ្មែរ បានទទួលសេវាថែទាំសុខភាពនៅកម្រិតខ្សោយ ប៉ុន្តែយើងប្រឹងប្រែងដើម្បីកំណត់ថា សេវាថែទាំសុខភាពមួយចំនួន ត្រូវបានផ្តល់ជូនប្រជាពលរដ្ឋកម្ពុជា។
អង្គការសុខភាពត្រចៀកនៅប្រទេសកម្ពុជា នេះ ដឹកនាំដោយវេជ្ជបណ្ឌិត លោក គ្លីន វូហ្គេន បានដំណើរការនៅប្រទេសកម្ពុជា តាំងពីឆ្នាំ២០០៣ កន្លងមក។
ការចុះហត្ថលេខាផ្តល់ជំនួយជាង ៩ម៉ឺន ១ពាន់ដុល្លារអាមេរិក នៅពេលនេះ គឺចំថ្ងៃគម្រប់ខួប ៦០ឆ្នាំនៃទំនាក់ទំនងការទូតរវាងប្រទេសជប៉ុន និងប្រទេសកម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។