វគ្គសិក្សានេះ ធ្វើឡើងក្នុងបំណងជំរុញឲ្យបណ្ដាញព័ត៌មានទាំងអស់បង្កើនការផ្សព្វផ្សាយអប់រំ និងបង្ការកុំឲ្យឆ្លងមេរោគអេដស៍ផង និងឲ្យអ្នកយកព័ត៌មានចេះប្រើពាក្យពេចន៍ត្រឹមត្រូវ ក្នុងសេចក្ដីរាយការណ៍របស់ខ្លួន ទាក់ទងព័ត៌មានមេរោគអេដស៍ ជំងឺអេដស៍ និងយែនឌ័រ (Gender) ចៀសវាងកុំឲ្យមានពាក្យរើសអើង។
មន្ត្រីសុខាភិបាល និងអង្គការមិនមែនរដ្ឋាភិបាល ដែលធ្វើការទាក់ទងនឹងមេរោគអេដស៍ ជំងឺអេដស៍ បានប្រកាសថា បណ្ដាញព័ត៌មានមានតួនាទីយ៉ាងសំខាន់បំផុតក្នុងការជួយកាត់បន្ថយអត្រាឆ្លងមេរោគអេដស៍ និងកាត់បន្ថយការរើសអើង ចំពោះក្រុមដែលងាយរងគ្រោះដោយសារមេរោគអេដស៍ ជំងឺអេដស៍។
នៅក្នុងសិក្ខាសាលាធ្វើឡើងនៅសណ្ឋាគារសាន់វ៉េ (Sunway) រាជធានីភ្នំពេញ រយៈពេលពីរថ្ងៃ ដែលបញ្ចប់នៅថ្ងៃទី១៨ តុលា ឧបត្ថម្ភដោយសហគមន៍អឺរ៉ុប (The European Union) យូណេស្កូ (UNESCO) អង្គការខាណា (KHANA) គឺក្រុមអ្នកសារព័ត៌មានជិត ៤០នាក់ ត្រូវបានដាក់បញ្ចូលជាមួយក្រុមអ្នកងាយរងគ្រោះដោយសារមេរោគអេដស៍ ជំងឺអេដស៍ មានក្រុមអង្គការធ្វើការប្រយុទ្ធជំងឺអេដស៍ ក្រុមបុរសស្រឡាញ់បុរស ក្រុមបុរសធ្វើជាស្ត្រីដែលគេហៅថា "ស្រីស្រស់" ដើម្បីឲ្យអ្នកសារព័ត៌មានសិក្សាស្វែងយល់អំពីជីវិត និងសេចក្ដីត្រូវការរបស់ពួកគេ។
ក្រុមដែលងាយរងគ្រោះដោយសារមេរោគអេដស៍ ជំងឺអេដស៍ បានរិះគន់បណ្ដាញសារព័ត៌មានខ្លះថា បានប្រើពាក្យពេចន៍ និងកាយវិការមិនសមរម្យទៅលើពួកគាត់ នៅក្នុងសេចក្ដីរាយការណ៍ព័ត៌មានរបស់ខ្លួន ដូចជាហៅពួកគាត់ថា អ្នកកើតអេដស៍ មិនហៅថា "អ្នកផ្ទុកមេរោគអេដស៍" ហៅបុរសស្រឡាញ់បុរសថា "ពួកខ្ទើយ" ហៅប្រុសតែងខ្លួនជាស្រីថា "ស៊ីមពីរ" ដែលមានន័យថា មានចិត្តសាវ៉ា ស្រឡាញ់ស្រីផង ស្រឡាញ់ប្រុសគ្នាឯងផង ហើយពួកគេសុំឲ្យហៅថា "ស្រីស្រស់" វិញ ទើបមិនមានន័យថារើសអើង ឬមាក់ងាយពួកគាត់។
ស្រីស្រស់ ពេជ សុខជា អាយុ ៤៦ឆ្នាំ ប្រុសតែងខ្លួនជាស្រី ដែលបានចូលរួមសិក្ខាសាលានោះ បានបញ្ជាក់ថា គាត់ចង់ឲ្យមនុស្សទាំងអស់ហៅគាត់ថា "ស្រីស្រស់" ជំនួសពាក្យថា "ស៊ីមពីរ" រួមទាំងអ្នកសារព័ត៌មានផង ព្រោះថា អ្នកសារព័ត៌មានជាគំរូជាអ្នកដើរតួនាទីយ៉ាងសំខាន់ ក្នុងការអប់រំសង្គម កុំឲ្យរើសអើងពួកគាត់៖ «ពាក្យស៊ីមពីរហ្នឹង ដូចថា យើងសាវ៉ា ឃើញប្រុសមិនបានរកហេកុប។ តែមិនមែនទាំងអស់ទេ ជួនកាល អ្នកខ្លះនៅតាមទូរទស្សន៍ធ្វើចរិតង៉ិកង៉ក់ ដូចថានិយាយមើលងាយពួកខ្ញុំអ៊ីចឹង»។
ចំណែក លោក ផល សុផាត ក្រុមបុរសស្រឡាញ់បុរស ក៏ទាស់ចិត្តចំពោះការប្រើពាក្យពេចន៍របស់បណ្ដាញសារព័ត៌មានខ្លះដែរ ដែលលោកថា ហាក់មាក់ងាយ និងរើសអើងពួកគាត់៖ «ឧទាហរណ៍ ប្រសិនជាគាត់អត់បានដឹងគាត់ចុះពាក្យថាខ្ទើយ ពាក្យខ្ទើយនេះ ក្នុងកម្មវិធីអេដស៍យើង យើងប្រើជំនួសបុរសស្រឡាញ់បុរសវិញ។ បុរសស្រឡាញ់បុរសហ្នឹង យើងសំដៅលើតែបុរសអ្នកស្រឡាញ់ភេទដូចគ្នាទូទៅ ហើយបុរសតែងខ្លួនធ្វើជាស្រីនោះ ភាគច្រើនគេតែងហៅថា ស៊ីមពីរ ឬហៅថា ចរិយា ឬក៏ហៅថា ភេទទីបី ទាំងអស់ហ្នឹងគាត់អត់សប្បាយចិត្តទេ»។
អ្នកយកសារព័ត៌មានទូរទស្សន៍ប៉ុស្តិ៍លេខ៩ លោក ម៉េង សុខអាន ដែលបានចូលរួមសិក្ខាសាលានោះ បញ្ជាក់ថា លោកធ្លាប់ចូលវគ្គសិក្សាស្រដៀងគ្នានេះច្រើនដងមកហើយ ហើយលើកនេះ លោកបានរៀនពាក្យថ្មីៗថែមទៀត ក្នុងការធ្វើសេចក្ដីរាយការណ៍អំពី អេច្ឆ.អាយ.វី អេដស៍របស់លោក។
ថ្លែងក្នុងពិធីបិទសិក្ខាសាលាថ្ងៃទី១៨ តុលា អគ្គលេខាធិការនៃអាជ្ញាធរជាតិប្រយុទ្ធនឹងជំងឺអេដស៍ លោកវេជ្ជបណ្ឌិត តែង គន្ធី បញ្ជាក់ថា ឥទ្ធិពលនៃការផ្សព្វផ្សាយរបស់បណ្ដាញសារព័ត៌មាន អាចជាយានចម្លងសារអប់រំទៅកាន់ប្រជាពលរដ្ឋគ្រប់ទិសទី ដែលធ្វើឲ្យអ្នកស្ដាប់ អ្នកអាន មានការប្រែប្រួលគំនិត និងអកប្បកិរិយាបាន។ លោកថា សិក្ខាសាលាលើកនេះ បានធ្វើឲ្យក្រុមអ្នកសារព័ត៌មាន និងក្រុមងាយរងគ្រោះដោយសារមេរោគអេដស៍ ជំងឺអេដស៍ បានយល់ចិត្តថ្លើមគ្នាច្រើន។
អ្នកយកព័ត៌មានខ្លះ បានត្អូញត្អែរថា ប្រធានបទ អេច្ឆ.អាយ.វី អេដស៍ គឺជាប្រធានបទមួយដែលអ្នកអានអ្នកស្ដាប់មិនសូវចាប់អារម្មណ៍ ហើយប្រធានក្រុមព័ត៌មាន ឬចាងហ្វាងអង្គភាពសារព័ត៌មាន ក៏មិនសូវចាប់អារម្មណ៍ប៉ុន្មានដែរ ព្រោះថា អត្រាឆ្លង និងគ្រោះថ្នាក់ដោយសារមេរោគ អេច្ឆ.អាយ.វី អេដស៍ នៅកម្ពុជា បានធូរស្រាលជាងមុនហើយ។
ក៏ប៉ុន្តែ មន្ត្រីពិគ្រោះយោបល់សម្រាប់វគ្គបណ្ដុះបណ្ដាលនេះ គឺលោក ឆាយ សុផល គិតថា អេច្ឆ.អាយ.វី អេដស៍ នៅតែជាប្រធានបទសំខាន់សម្រាប់អ្នកសារព័ត៌មាន ព្រោះថា នៅមានរឿង អេច្ឆ.អាយ.វី អេដស៍ ជាច្រើនទៀត ដែលអ្នកយកព័ត៌មានមើលរំលង។
លោកវេជ្ជបណ្ឌិត តែង គន្ធី ឲ្យដឹងថា កម្ពុជា សព្វថ្ងៃមានអ្នកផ្ទុកមេរោគអេដស៍ជំងឺអេដស៍ ប្រហែល ៧ម៉ឺន ១ពាន់នាក់ ហើយក្រុមដែលប្រឈមឆ្លងអេដស៍ខ្លាំងជាងគេ គឺក្រុមបុរសស្រឡាញ់បុរស ក្រុមចាក់គ្រឿងញៀនចូលសរសៃឈាម ក្រុមនារីបម្រើសេវាកម្សាន្ត និងក្រុមបុរសចូលចិត្តដើរលេងពេលយប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។