ប្រជាពលរដ្ឋប្រមាណ ១០គ្រួសារ ក្នុងចំណោមពលរដ្ឋជាច្រើនទៀតរស់នៅភូមិសន្ទូច ភូមិត្រោកកើត និងភូមិអន្លង់ព្រុស ស្រុករលាប្អៀរ ខេត្តកំពង់ឆ្នាំង ត្អូញត្អែរពីបញ្ហាសំរាមស្អុយរលួយ និងផ្សែងហុយពីការដុតសំរាមនោះ បណ្ដាលឲ្យប៉ះពាល់សុខភាពមនុស្ស និងបរិស្ថាន។ អាជ្ញាធរមូលដ្ឋាន និងមន្ត្រីបរិស្ថានបញ្ជាក់ថា អាជ្ញាធរកំពុងរកទីតាំងចាក់សំរាមថ្មីឆ្ងាយពីផ្ទះអ្នកភូមិបច្ចុប្បន្ន ដើម្បីបញ្ចៀសផលប៉ះពាល់ហើយ។
សំរាម និងកាកសំណល់ប្លាស្ទិកប្រមូលចេញពីផ្សារលើ ផ្សារក្រោម និងពីតាមផ្ទះក្នុងក្រុងកំពង់ឆ្នាំង សរុបជាង ១០តោនក្នុងមួយថ្ងៃៗ ត្រូវបានដឹកទៅចោលក្បែរសាលាឃុំស្រែថ្មី ឋិតនៅភាគខាងលិច ក្រុងកំពង់ឆ្នាំង ចម្ងាយប្រមាណ ៦គីឡូម៉ែត្រ។ ក្រុមពលរដ្ឋមានផ្ទះនៅក្បែរនោះ ចង់ឲ្យអាជ្ញាធរប្ដូរទីតាំងចាក់សំរាមឲ្យបានឆាប់ ខណៈពួកគាត់ធុញទ្រាន់នឹងសត្វរុយកើតច្រើនចេញពីសំរាម និងក្លិនស្អុយអសោច។
ស្ត្រីវ័យជាង ៤០ឆ្នាំម្នាក់ គឺអ្នកស្រី លាស់ សុគន្ធី មានប្រសាសន៍ថា អស់រយៈពេលជិត ១ឆ្នាំហើយ ដែលគ្រួសារគាត់ និងអ្នកភូមិសន្ទូចផ្សេងទៀតលំបាកទ្រាំនឹងបញ្ហាសំរាមនេះ ហើយបានប្ដឹងផ្ទាល់មាត់ទៅមេភូមិ និងមេឃុំដែរ តែគ្មានដំណោះស្រាយអ្វីសោះ។
អ្នកស្រីថា ត្បិតបច្ចុប្បន្នមិនទាន់មានពលរដ្ឋណាម្នាក់កើតជំងឺអាសន្នរោគ ឬជំងឺផ្លូវដង្ហើម ដោយសារគំនរសំរាមនេះ ប៉ុន្តែថ្ងៃអនាគតអាចនឹងកើតជំងឺទាំងនេះ៖ «មានបញ្ហាប៉ះពាល់ច្រើនណាស់លោកពូ! ព្រោះទីមួយ ខ្ញុំត្រូវប្រើថ្នាំមូសរាល់ថ្ងៃ ហើយថ្នាំមូលមានជាតិពុល ហើយកូនខ្ញុំ ក្មួយខ្ញុំតូចតាច ដល់ពេលត្រូវអាហ្នឹង (ថ្នាំមូស) យូរអាចខូចសុខភាព ហើយរុយ បាញ់ថ្នាំម្ដងៗស្ទើរមួយកញ្ច្រែង»។
ចំណែកពលរដ្ឋម្នាក់ទៀតមានផ្ទះរស់នៅចម្ងាយជាង ៣០ម៉ែត្រពីគំនរសំរាម បានថ្លែងក្នុងលក្ខខណ្ឌសុំមិនឲ្យបញ្ចេញឈ្មោះថា ឡានឆ្នៃ ឬក្របីយន្ត និងឡានបែនចំណុះ ៥តោន ចំនួន ៤គ្រឿង បានដឹកសំរាមកាត់តាមមុខផ្ទះអ្នកភូមិដែលថ្ងៃខ្លះធ្លាក់សំណល់ស្អុយរលួយរប៉ាត់រប៉ាយពេញមុខផ្ទះទៀតផង។
លោកបារម្ភថា នៅរដូវភ្លៀងធ្លាក់សំរាមសើមដុតមិនឆេះ ហើយសត្វរុយអាចកើតមានកាន់តែច្រើនឡើង៖ «លំបាករុយវាច្រើន ហើយក្លិនស្អុយ ពេលយើងហូបបាយហូបអត់កើតទេ ចាប់ផ្ដើមហូបអង្គុយបក់តែរុយ។ ណាមួយពេលខ្យល់ខ្លាំងអីហុយប៉ើងសំរាមពេញផ្លូវ។ គ្រាន់តែចង់ឲ្យគេប្ដូរពីកន្លែងហ្នឹងទៅ ហើយឲ្យទៅចាក់កន្លែងផ្សេង»។
បច្ចុប្បន្ននៅក្រុងកំពង់ឆ្នាំង មិនទាន់មានក្រុមហ៊ុនច្បាស់លាស់ណាមួយម៉ៅការប្រមូលសំរាមនោះទេ គឺមានតែឈ្មួញតូចតាច ឬអ្នកដេញភាស៊ីផ្សារប៉ុណ្ណោះ ដែលជាអ្នកប្រមូលសំរាមចេញពីក្រុងនេះ។អ្នកម៉ៅការទាំងនេះ បានដឹកសំរាមទៅចាក់ចោលរប៉ាត់រប៉ាយលើផ្ទៃដីទំហំប្រហែល ១ហិកតារ ត្រង់ចំណុចប្រសព្វគ្នារវាងភូមិសន្ទូច និងភូមិត្រោកកើត នៃឃុំស្រែថ្មី បណ្ដោះអាសន្ន ដោយរង់ចាំអាជ្ញាធររកទីតាំងចាក់សំរាមថ្មីបាន។
ទាក់ទងបញ្ហានេះ មេឃុំស្រែថ្មី លោក នូ ឃៀន មានប្រសាសន៍ថា មានពលរដ្ឋរស់នៅភូមិសន្ទូច ពីរ ឬបីគ្រួសារប៉ុណ្ណោះដែលប៉ះពាល់ខ្លាំង ចំណែកអ្នកភូមិត្រោកកើត គ្រាន់តែមានដីស្រែនៅក្បែរៗនោះ។ លោកថា សម្រាប់អាជ្ញាធរឃុំពុំមានលទ្ធភាពគ្រប់គ្រាន់ក្នុងការដោះស្រាយបញ្ហានេះទេ ក្រៅពីសម្រួលឲ្យមានទីតាំងចាក់សំរាម និងសុំអធ្យាស្រ័យពីពលរដ្ឋតាមការណែនាំរបស់អាជ្ញាធរខេត្ត៖ «តាមព័ត៌មានដែលខ្ញុំដឹងថា រកដីនៅខាងជើងវត្តព្រះរាម ចំនួន ១០ហិកតារ សម្រាប់ចាក់សំរាម ដល់អ៊ីចឹងរកអត់ទាន់បាន គឺខេត្តឲ្យសម្រួលអាហ្នឹងនែក! ដើម្បីចាក់បណ្ដោះអាសន្នសិនទម្រាំរកកន្លែងនោះបាន»។
ប្រភពពីអាជ្ញាធរខេត្ត និងមន្ត្រីនៃមន្ទីរបរិស្ថានខេត្តកំពង់ឆ្នាំង ឲ្យដឹងថា ធនាគារអភិវឌ្ឍន៍អាស៊ី (ADB) គ្រោងបញ្ចេញទឹកប្រាក់ចំនួន ២៧លានដុល្លារ ដើម្បីជួយអភិវឌ្ឍន៍ក្រុងកំពង់ឆ្នាំង លើទំនប់ទឹក អាងប្រព្រឹត្តិកម្មសំណល់រាវ និងទីតាំងចាក់សំរាម។ ទីតាំងចាក់សំរាមនេះ អាចចំណាយទឹកប្រាក់ចំនួន ១,២លានដុល្លារ ហើយគម្រោងបានសិក្សាតាំងពីឆ្នាំ២០១១ មក តែមិនទាន់មានការអភិវឌ្ឍទេ។
ប្រធានការិយាល័យត្រួតពិនិត្យការបំពុលបរិស្ថាន និងអប់រំនៃមន្ទីរបរិស្ថានខេត្តកំពង់ឆ្នាំង លោក កែវ ធីម ថ្លែងថា អាជ្ញាធរ និងធនាគារអភិវឌ្ឍន៍អាស៊ី គ្រោងបង្កើតទីតាំងចាក់សំរាមទំហំ ១០ហិកតារនៅតំបន់ភ្នំតូច នៃឃុំពង្រ ស្រុករលាប្អៀរ ខេត្តកំពង់ឆ្នាំង។ ប្រសិនបើមានការអភិវឌ្ឍមែននោះភាគីអាជ្ញាធរខេត្តត្រូវការដីទំហំ ៨ហិកតារទៀត បន្ថែមលើដីចំនួនពីរហិកតារដែលខ្លួនមានស្រាប់។
លោក កែវ ធីម មិនប្រាកដក្នុងចិត្តថា គម្រោងអាចនឹងដើរក្នុងពេលឆាប់ៗទេ ដោយសារដីនៅតំបន់នោះ គឺជាកម្មសិទ្ធិឯកជន ដូច្នេះអាជ្ញាធរត្រូវចំណាយប្រាក់ច្រើនទៀតដើម្បីទិញដីបន្ថែមឲ្យគម្រោងរបស់ធនាគារអភិវឌ្ឍន៍អាស៊ីអភិវឌ្ឍ។ យ៉ាងណានៅចំពោះមុខ លោកថា នឹងចុះត្រួតពិនិត្យផ្នែកបច្ចេកទេសលើទីតាំងចាក់សំរាមសព្វថ្ងៃ ដើម្បីកាត់បន្ថយផលប៉ះពាល់បរិស្ថាន និងសុខភាពមនុស្សឲ្យនៅតិច។
លោក កែវ ធីម៖ «យើងបានហាមគាតមិនឲ្យដុត កាលណាដុតវាមានបញ្ហាប៉ះពាល់បរិយាកាសផង ហើយប៉ះពាល់ទឹក ដី និងខ្យល់។ ប៉ុន្តែដោយសារថា ខាងក្រុងហើយនិងអ្នកដែលដឹកសំរាមទៅថា បើសិនជាបងមិនឲ្យចាក់នៅត្រង់ហ្នឹងខ្ញុំអត់មានទីតាំងចាក់ទេ អ៊ីចឹងសំរាមកាន់តែរាយប៉ាយ។ យើងក៏បានឯកភាពជាមួយថ្នាក់ដឹកនាំមន្ទីរថា ឲ្យគាត់ចាក់ ប៉ុន្តែឲ្យគាត់ជីកជារណ្ដៅ ៤ម៉ែត្រការ៉េ ពេលចាក់ពេញហើយត្រូវលប់ ហើយជីកមួយរណ្ដៅទៀត យើងអត់ឲ្យគាត់ចាក់ជាចំហទេ»។
បច្ចុប្បន្ននៅទូទាំងខេត្តកំពង់ឆ្នាំង មានទីតាំងចាក់សំរាមចំនួន ៥កន្លែង ប៉ុន្តែទីតាំងទាំងនោះមានទំហំតូចៗ គឺទំហំចន្លោះពី ៤ ទៅ ៦អារ។ ការគ្រប់គ្រងសំណល់រឹង និងរាវក្នុងក្រុងនៅមានបញ្ហានៅឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។