ការខ្វះខាតទឹកស្អាតសម្រាប់ប្រើប្រាស់ ក្លាយជាកង្វល់ចម្បងរបស់ពលរដ្ឋនៅភូមិក្រាំងឡង ឃុំជង្រុក ខេត្តកំពង់ស្ពឺ។ ប្រជាពលរដ្ឋប្រមាណជិត ៤០០គ្រួសារ លើកឡើងថា ការខ្វះខាតទឹកស្អាតប្រើប្រាស់នេះ ព្រោះប្រជាជនគ្មានអណ្ដូងទឹក និងគ្មានស្រះទឹកត្រឹមត្រូវ ដែលអ្នកជំនាញសុខភាពព្រួយបារម្ភពីការឆ្លងជំងឺផ្សេងៗពីការប្រើប្រាស់ទឹកមិនស្អាតនោះ។ ទន្ទឹមនឹងនេះដែរ អាជ្ញាធរ និងរដ្ឋាភិបាល មិនបានយកចិត្តទុកដាក់ចំពោះពួកគាត់ឡើយ។ អភិបាលខេត្តកំពង់ស្ពឺ សន្យាថានឹងជួយដោះស្រាយទឹកស្អាតជូនពលរដ្ឋទាំងនោះ។
ស្ត្រីវ័យចំណាស់ម្នាក់ដែលមានសម្បុរស្រអែម សក់ត្រឹមក អមនឹងអាវសពាក់លើខ្លួន រៀបរាប់យ៉ាងស្មោះអស់ពីចិត្តពីជីវិតប្រចាំថ្ងៃ ដែលខ្វះខាតទឹកស្អាតក្នុងការប្រើប្រាស់។ សព្វថ្ងៃ គ្រួសាររបស់គាត់មានសុទ្ធតែស្រីៗ ហើយមានតែរូបគាត់ទេដែលជាអ្នករែកទឹកសម្រាប់ប្រើប្រចាំថ្ងៃ។
លោកស្រី សោភា ទឹកមុខប្រែស្រពោននៅពេលនិយាយពីការស្នើសុំអណ្ដូងទឹក និងស្រះទឹកពីរដ្ឋាភិបាល។ មុខប្រែស្រពោន ព្រោះគាត់និយាយថា រដ្ឋាភិបាលហាក់មិនបានខ្វល់ខ្វាយបញ្ហាអត់ទឹកនៅក្នុងភូមិរបស់គាត់នោះទេ។ ការខ្វះអណ្ដូងទឹក និងស្រះទឹកប្រើប្រាស់នេះ គឺស្ថិតនៅភូមិក្រាំងឡង ឃុំជង្រុក ស្រុកគងពិសី ខេត្តកំពង់ស្ពឺ។
ស្ត្រីវ័យចំណាស់ម្នាក់ទៀត លោកស្រី ឡេង និយាយថា សព្វថ្ងៃ គាត់ និងអ្នកភូមិដទៃទៀត ទិញទឹកគេយកមកប្រើប្រាស់ក្នុងមួយឡានពី ៥ ទៅ ៧ម៉ឺនរៀល ដោយមួយឡានប្រើបានពី ៣ ទៅ ៤ថ្ងៃប៉ុណ្ណោះ។ លោកស្រីបន្តថា កង្វះទឹកប្រើប្រាស់នេះ ដោយសារក្នុងភូមិរបស់គាត់មិនមានអណ្ដូងទឹក និងមិនមានស្រះសម្រាប់ទុកទឹកនៅពេលមានភ្លៀងធ្លាក់៖ «អូន! ទឹកប្រើប្រាស់ហ្នឹងពិបាកមែនទែន ពិសេសសត្វគោអត់មានទឹកផឹកទេ។ ក្មេងក្មាងក៏ពិបាកដែររឿងអត់ទឹកនោះ គេដឹកលក់ប្រហែង ១០ ទៅ ៣០គីឡូហើយមើលទៅ។ អូន! តើតែអណ្ដូងទឹកមួយកាត់ជ្រុងនោះ ខូចបាត់ទៅ»។
យ៉ាងណាក៏ដោយ នៅក្នុងភូមិក៏មានស្រះដែរ ដោយស្រះខ្លះអត់ទឹកសូម្បីមួយដំណក់ និងខ្លះទៀតមានទឹកតិចតួចមិនអាចប្រើការបាន ព្រោះល្អក់វ៉ល់ មើលមិនយល់ ទទួលទានមិនកើត។
អនុប្រធានភូមិក្រាំងឡង លោក ធូ តុប មានប្រសាសន៍ថា នៅភូមិក្រាំងឡង មានប្រជាជនជិត ៤០០នាក់។ លោកបន្តថា កន្លងមកអ្នកភូមិក៏ធ្លាប់ស្នើដល់រដ្ឋាភិបាល ឲ្យជួយដោះស្រាយបញ្ហាទឹកស្អាតប្រើប្រាស់នេះដែរ ប៉ុន្តែលទ្ធផលបានត្រឹមពាំនាំ តែមិនមានដំណោះស្រាយនោះទេ។ លោកបន្តថា ពលរដ្ឋនៅទីនេះមិនចង់បានអ្វីក្រៅពីទឹកស្អាតសម្រាប់ប្រើប្រាស់ប្រចាំថ្ងៃនោះឡើយ។ ម្ល៉ោះហើយ សូមរដ្ឋាភិបាលគោរពតាមការសន្យារបស់ខ្លួន ដែលឃោសនានៅពេលបោះឆ្នោត ថានឹងជួយដោះស្រាយជូនប្រជាពលរដ្ឋ៖ «ទីមួយខ្វះជីវភាពផង ស្រុករាំងស្ងួត ទឹកហ្នឹងមួយថ្ងៃងូតតែម្តងទេ។ យ៉ាប់បំផុតនោះ គឺសត្វពាហនៈគោក្របី។ ទឹកល្អក់កករចេះតែផឹកឲ្យរស់ៗទៅ។ សប្បុរសជនទាំងក្នុង និងក្រៅប្រទេសមែននោះ ខ្ញុំអរណាស់»។
ឆ្លើយតបនឹងការទទូចស្នើសុំអណ្ដូងទឹក និងស្រះទឹកសម្រាប់ប្រើប្រាស់នេះ អភិបាលខេត្តកំពង់ស្ពឺ លោក កង ហ៊ាង មានប្រសាសន៍ថា លោកទើបតែទទួលបានព័ត៌មាននេះតាមរយៈការសម្ភាសរបស់វិទ្យុអាស៊ីសេរី។ តែយ៉ាងនេះក្ដី កង្វះទឹកស្អាតប្រើប្រាស់របស់ប្រជាពលរដ្ឋនៅឃុំជង្រុក ភូមិក្រាំងឡង អភិបាលខេត្តកំពង់ស្ពឺ លោក កង ហ៊ាង សន្យាថានឹងជួយដោះស្រាយជូនប្រជាពលរដ្ឋ។ ទន្ទឹមនឹងនេះដែរ លោកក៏សូមឲ្យសប្បុរសជនដែលមានលទ្ធភាពជួយដល់ប្រជាពលរដ្ឋនៅទីនោះផង៖ «បួនប្រាំភូមិហ្នឹងខ្ញុំដឹងហើយ តែលទ្ធភាពវាធំណាស់។ តាមឧតុនិយមថា មេឃភ្លៀងសឹងរាល់ថ្ងៃហ្នឹង ប៉ុន្តែវាតិច។ គាត់អាចត្រងទឹកភ្លៀងហ្នឹងខ្លះហើយ»។
ការមិនមានទឹកស្អាតប្រើប្រាស់នេះ ប្រធាននាយកដ្ឋានប្រយុទ្ធនឹងជំងឺឆ្លង លោកវេជ្ជបណ្ឌិត លី សូវ៉ាន់ មានប្រសាសន៍ថា ការប្រើប្រាស់ទឹកមិនស្អាត ប្រជាពលរដ្ឋអាចប្រឈមនឹងជំងឺឆ្លងជាច្រើនដូចជា ជំងឺរាករូស រាកមួល រលាកពោះវៀន ហើយស្បែកនឹងប្រឈមនឹងជំងឺកមរមាស់ និងងាយកើតជំងឺកន្ទាលត្រអាក។ លោកវេជ្ជបណ្ឌិតបន្ថែមថា ដើម្បីអាចជៀសផុតពីជំងឺតម្កាត់ផ្សេងៗ ប្រជាពលរដ្ឋត្រូវដាំទឹក ឬក៏ចម្រោះទឹកឲ្យល្អមុននឹងទទួលទាន៖ «វាអាចរាកមួល ដូច្នេះសូមបងប្អូនមានការប្រុងប្រយ័ត្ន ជៀសវាងការបន្ទោបង់ពាសវាលពាសកាល។ ត្រូវមានបង្គន់ ឬក៏ជីកកប់ឲ្យបានល្អ ខ្លាចក្រែងពេលភ្លៀងអាចហូរចូលទឹកស្រះ។ ម្យ៉ាងវិញទៀត សូមបងប្អូនក្រោយពេលចេញពីបង្គន់ត្រូវលាងដៃ និងមុនទទួលទានអាហារត្រូវលាងដៃឲ្យបានស្អាត ដោយលាងនឹងសាប៊ូ»។
ប្រជាពលរដ្ឋប្រមាណជិត ៤០០នាក់នៅភូមិក្រាំងឡង ឃុំជង្រុក ស្រុកគងពិសី ទទូចដល់អាជ្ញាធរខេត្តកំពង់ស្ពឺ និងរដ្ឋាភិបាលកម្ពុជា លោក ហ៊ុន សែន សូមយល់ពីការលំបាករបស់ពលរដ្ឋដែលមិនមានទឹកសម្រាប់ប្រើ និងសូមពន្លឿនក្នុងការដោះស្រាយការខ្វះខាតទឹកស្អាតសម្រាប់ប្រើប្រាស់ប្រចាំថ្ងៃ។ ពលរដ្ឋទាំងនោះ ស្នើដល់សប្បុរសជនដែលមានលទ្ធភាព ឲ្យជួយដោះស្រាយអណ្ដូងទឹក និងស្រះទឹក ដើម្បីជាមធ្យោបាយបង្កើនភាពងាយស្រួលក្នុងការរស់នៅប្រចាំថ្ងៃរបស់ពួកគាត់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។