ជំងឺគ្រុនចាញ់នៅកម្ពុជា នៅតែជាបញ្ហាចោទនៅឡើយ ទោះជានៅក្នុងរយៈពេល ៤ឆ្នាំចុងក្រោយនេះ អត្រាឆ្លងជំងឺគ្រុនចាញ់មានការធ្លាក់ចុះ និងស្ថិតនៅក្នុងស្ថានភាពគ្រោះថ្នាក់ក៏ដោយ។ ប៉ុន្តែរដ្ឋាភិបាលនៅតែស្វះស្វែងរកជំនួយបន្ថែម ដើម្បីអនុវត្តផែនការយុទ្ធសាស្ត្របំបាត់ជំងឺគ្រុនចាញ់នេះ។
ជំងឺគ្រុនចាញ់នៅតែសម្លាប់ប្រជាពលរដ្ឋកម្ពុជា ជាច្រើននាក់នៅឡើយក្នុងមួយឆ្នាំៗ។ ក្រសួងសុខាភិបាលមានផែនការយុទ្ធសាស្ត្របំបាត់ជំងឺគ្រុនចាញ់នេះឲ្យបាននៅឆ្នាំ២០២៥ ខាងមុខ។
លោកនាយករដ្ឋមន្ត្រី ហ៊ុន សែន ស្នើឲ្យរដ្ឋាភិបាលកូរ៉េ បន្តជួយដល់វិស័យសុខាភិបាលនៅកម្ពុជា ពិសេសការលុបបំបាត់ជំងឺគ្រុនចាញ់នេះ។ លោកថ្លែងស្នើដូច្នេះនៅចំពោះមុខប្រធានរដ្ឋសភាកូរ៉េខាងត្បូង ក្នុងពិធីសម្ពោធដាក់ឲ្យដំណើរការមជ្ឈមណ្ឌលភ្នែកមិត្តភាពកម្ពុជា-កូរ៉េ នៃមន្ទីរពេទ្យព្រះអង្គឌួង កាលពីថ្ងៃទី១៣ ខែឧសភា៖ «គឺទាក់ទងនឹងការបំបាត់ជំងឺគ្រុនចាញ់ឲ្យអស់នៅឆ្នាំ២០២៥ ដូច្នេះសង្ឃឹមថា មិត្តកូរ៉េ នឹងរួមវិភាគទានដើម្បីជួយនៅក្នុងក្របខ័ណ្ឌជាទ្វេភាគីកម្ពុជា-កូរ៉េ ឬមេគង្គ-កូរ៉េ ឬក្នុងក្របខ័ណ្ឌអាស៊ាន ប៉ុន្តែយន្តការដែលសំខាន់ជាងគេគឺទ្វេភាគី កម្ពុជា-កូរ៉េ ឬ មេគង្គ-កូរ៉េ»។
របាយការណ៍របស់មជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ប៉ារ៉ាស៊ីតសាស្ត្រ បាណកសាស្ត្រ ឲ្យដឹងថា នៅក្នុងឆ្នាំ២០១៤ អ្នកឆ្លងជំងឺគ្រុនចាញ់មាន ២៦.២៧៨ករណី ក្នុងនោះស្លាប់ចំនួន ១៨ករណី ហើយ ៨០% នៃការឆ្លងជំងឺគ្រុនចាញ់នេះ មាននៅខែត្រព្រះវិហារ រតនគីរី ក្រចេះ ស្ទឹងត្រែង សៀមរាប ត្បូងឃ្មុំ ពោធិ៍សាត់ មណ្ឌលគីរី បាត់ដំបង កំពង់ស្ពឺ និងខែត្រកំពង់ចាម។
ទោះបីជាយ៉ាងនេះក្ដី អ្នកនាំពាក្យក្រសួងសុខាភិបាល លោក លី សូវ៉ាន់ មានប្រសាសន៍ថា ការឆ្លងជំងឺគ្រុនចាញ់នៅរយៈពេល ៤ឆ្នាំកន្លងមកនេះ មានការថយចុះជាលំដាប់។ លោកគាំទ្រចំពោះលោកនាយករដ្ឋមន្ត្រី ហ៊ុន សែន ស្នើសុំជំនួយពីរដ្ឋាភិបាលកូរ៉េ ដើម្បីយកមកទប់ស្កាត់ និងលុបបំបាត់ជំងឺគ្រុនចាញ់នោះ៖ «យើងពង្រឹងការយល់ដឹងរបស់ប្រជាពលរដ្ឋ ប្រជាពលរដ្ឋទាំងអស់ត្រូវប្រើមុងឲ្យបានគ្រប់គ្រាន់ ទាំងអ្នកស្នាក់នៅទីតាំងហ្នឹង និងអ្នកទៅតំបន់គ្រុនចាញ់ហ្នឹង»។
ទាក់ទងនឹងការផ្ដល់ជំនួយដល់ក្រសួងសុខាភិបាលនេះ មូលនិធិសកល (Global Fund) បានបញ្ចេញរបាយការណ៍កាលពីឆ្នាំ២០១៣ រកឃើញថា អតីតប្រធានមជ្ឈមណ្ឌលជាតិប្រយុទ្ធជំងឺគ្រុនចាញ់ ប៉ារ៉ាស៊ីតសាស្ត្រ និងបាណកសាស្ត្រ លោក ដួង សុជាតិ និងសហការី បានទទួលសគុណជិត ៥សែនដុល្លារសហរដ្ឋអាមេរិកពីក្រុមហ៊ុនបរទេសពីរនៅបរទេស។ ប៉ុន្តែករណីនេះ ស្ថាប័នអំពើពុករលួយមិនចាត់ការតាមច្បាប់នោះឡើយ ដោយរដ្ឋាភិបាលមិនប្ដឹងមន្ត្រីក្រសួងសុខាភិបាល រួបនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។