អង្គការសុខភាពឈ្មោះ អ៊ុបពើរ៉េហ្សិន ស្មាយ (Operation Smile) កម្ពុជា នឹងផ្ដល់ការពិនិត្យព្យាបាលមាត់ធ្មេញ និងការវះកាត់មាត់ឆែប ក្រអូមមាត់ឆែប ឥតគិតថ្លៃរយៈពេល ៣ថ្ងៃនៅចុងសប្ដាហ៍នេះ។
មន្ត្រីរដ្ឋបាលនៃអង្គការ អ៊ុបពើរ៉េហ្សិន ស្មាយ កញ្ញា ឡាយ ធាវី ឱ្យដឹងថា ការវះកាត់ឥតគិតថ្លៃនេះ នឹងផ្ដល់នៅមន្ទីរពេទ្យបង្អែកខេត្តព្រះសីហនុ ចាប់ពីថ្ងៃទី២៥ ដល់ថ្ងៃទី២៧ មេសា៖ «កម្មវិធីនេះរួមសហការជាមួយក្រុមគ្រូពេទ្យស្ម័គ្រចិត្តអង្គការ អ៊ុបពើរ៉េហ្សិន ស្មាយ ហ្នឹង គឺមានពីមន្ទីរពេទ្យរុស្ស៊ី មន្ទីរពេទ្យព្រះកេតុមាលា មន្ទីរពេទ្យកុសុមៈ ហើយបូករួមនឹងសមាគមគ្រូពេទ្យស្ម័គ្រយុវជនសម្ដេចតេជោ ផ្នែកខាងមាត់ធ្មេញ បូករួមដុកទ័រមកពីស្រុកគេហ្នឹង គឺមក ៤នាក់ មកពីម៉ាឡេស៊ី ហើយនិងក្រុមអ្នកជួយឧបត្ថម្ភមកពីក្រុម រ៉តារី ក្លិបអន្តរជាតិ ប្រទេសម៉ាឡេស៊ី និងតៃវ៉ាន់»។
កញ្ញា ឡាយ ធាវី បញ្ជាក់បន្ថែមថា អង្គការ អ៊ុបពើរ៉េហ្សិន ស្មាយ នឹងផ្ដល់សេវាពិនិត្យមួយថ្ងៃ គឺនៅថ្ងៃទី២៥ ហើយនឹងផ្ដល់ការវះកាត់រយៈពេល ២ថ្ងៃ គឺពីថ្ងៃទី២៦ ដល់ថ្ងៃទី២៧ មេសា។ កញ្ញាបន្តថា ក្រុមគ្រូពេទ្យទាំងនោះមានជំនាញវះកាត់ សណ្ដំ រោគកុមារ ជំនាញមាត់ធ្មេញ និងការបង្ហាត់និយាយ ដែលមានបទពិសោធន៍ច្រើនឆ្នាំមកហើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។