ប្រជាពលរដ្ឋនៅឃុំជ្រៃវៀន ស្រុកព្រៃឈរ ខេត្តកំពង់ចាម នាំគ្នាស្នើឲ្យអង្គភាពពាក់ព័ន្ធ ជាពិសេសផ្នែកផ្គត់ផ្គង់សេវាទឹកស្អាត ជួយដោះស្រាយការលំបាករបស់ពួកគាត់ ដោយសារការប្រើប្រាស់ទឹកស្អាត គឺមិនបានគ្រប់គ្រាន់ឡើយនាប៉ុន្មានខែមកនេះ។ ចំណែកអាជ្ញាធរថា ពួកគេកំពុងជួយដោះស្រាយបញ្ហាជូនប្រជាពលរដ្ឋ។
ពលរដ្ឋនៅផ្សារព្រៃទទឹង ឃុំជ្រៃវៀន ស្រុកព្រៃឈរ យល់ថា កង្វះទឹកប្រើប្រាស់ប្រមាណ ២ខែមកនេះ គឺដោយសារតែអង្គភាពផ្គត់ផ្គង់ទឹកស្អាត បានពង្រីកសេវាផ្តល់ទឹករបស់ខ្លួនទៅឲ្យសហគ្រាសផលិតទឹកសុទ្ធ និងឲ្យទៅពលរដ្ឋនៅតំបន់ផ្សេងកាន់តែច្រើនថែមទៀត ប៉ុន្តែការផ្គត់ផ្គង់ទឹកពីប្រភពមេនៅដដែល។
ពលរដ្ឋរស់នៅឃុំជ្រៃវៀន ថ្លែងមិនឲ្យបញ្ចេញឈ្មោះឲ្យដឹងថា ប្រមាណជាពីរខែមកហើយដែលពួកគាត់មិនមានទឹកប្រើប្រាស់គ្រប់គ្រាន់ រហូតដល់ពលរដ្ឋខ្លះត្រូវប្រើប្រាស់អណ្ដូងទឹកផ្ទាល់ខ្លួនវិញ ក៏ប៉ុន្តែសម្រាប់ពលរដ្ឋនៅផ្សារព្រៃទទឹង ខ្លះវិញ កាន់តែពិបាកជាងគេ ពីព្រោះពួកគាត់មិនមានអណ្ដូងទឹកសម្រាប់ប្រើ៖ «គិតគូររឿងដូរទុយោដូរអី! ដូរថ្មីឲ្យធំ បូមមកទុកហ្នឹងធ្វើអាងឲ្យធំ! បើគាត់ចង់បានលុយពីឈ្មួញពីប្រជាពលរដ្ឋ ទាល់តែគាត់ផ្គត់ផ្គង់គេឲ្យគ្រប់ បើគាត់ផ្គត់ផ្គង់គេមិនគ្រប់អ៊ីចឹងដដែល គាត់ទៅលោភលន់ភ្ជាប់បណ្ដាញទឹកសុទ្ធ បណ្ដាញអាជីវកម្មផ្សេងៗធ្វើអី»។
អង្គភាពផ្គត់ផ្គង់ទឹកស្អាតនៅឃុំជ្រៃវៀន គឺបញ្ជូនទឹកបន្តតាមទុយោពីកន្លែងផ្គត់ផ្គង់ទឹកស្អាតពីឃុំពាមជីកង ស្រុកកងមាស ដែលបូមទឹកពីទន្លេមេគង្គមក។ ប្រភពដដែលបន្តថា ពលរដ្ឋបានជូនដំណឹងនេះទៅអាជ្ញាធរ ប៉ុន្តែពួកគេមិនសូវអើពើសោះ។ លោកថា ក្រៅពីមិនមានទឹកផ្តល់ជូនពលរដ្ឋគ្រប់គ្រាន់ហើយ តម្លៃទឹកក៏ថ្លៃថែមទៀត គឺរហូតដល់ ២.២០០រៀលក្នុងមួយម៉ែត្រគូប ស្របពេលតម្លៃភ្លើងទាប។
ទាក់ទងបញ្ហានេះ អ្នកគ្រប់គ្រងសាខាការិយាល័យផ្គត់ផ្គង់ទឹកស្អាតស្រុកព្រៃឈរ លោក លឹម ឃាង មានប្រសាសន៍ថា មិនមែនដោយសារខាងលោកពង្រីកសេវាទឹកប្រើប្រាស់ជូនសហគ្រាសផលិតទឹកសុទ្ធនោះទេ ប៉ុន្តែភាពខ្វះខាតដោយសារតម្រូវការ គឺកើនឡើងមួយទ្វេជាបីនាពេលបច្ចុប្បន្ន។ លោកបន្ថែមថា មិនមែនតែស្រុកព្រៃឈរ ទេដែលជួបបញ្ហានេះ ប៉ុន្តែនៅតំបន់ផ្សេងៗក៏ជួបដូចគ្នាដែរ។
ជាក់ស្តែង សូម្បីតែទីរួមខេត្តកំពង់ចាម ក៏អណ្ដូងទឹកផ្គត់ផ្គង់ទឹកស្អាតត្រូវរីងដែរ រហូតអាជ្ញាធរត្រូវបូមទឹកពីទន្លេទៅប្រើប្រាស់ទៀតផង។ លោកឲ្យដឹងដែរថា ការបញ្ជូនទឹកពីស្រុកកងមាស មកស្រុកព្រៃឈរ គឺមានចម្ងាយឆ្ងាយ ហើយកម្ពស់ក៏ខ្ពស់ទៀត ទើបនាំឲ្យការផ្គត់ផ្គង់ទឹកជូនពលរដ្ឋនៅស្រុកព្រៃឈរ ជួបបញ្ហា៖ «ប៉ុន្តែទឹកខ្ញុំ គឺប្រើគំហុកខ្លាំងហ្មង! ពីព្រោះខែមួយខែពីរ ទឹកខ្ញុំលក់បានប្រហែលមួយម៉ឺនគូប ប៉ុន្តែដល់ឥឡូវចង់ឡើងប្រហែលបីម៉ឺនគូបក្នុងពីរខែហ្នឹង»។
យ៉ាងណា ខាងលោកកំពុងធ្វើអាងទឹកមួយកន្លែងទៀត ដើម្បីបញ្ជូនពីស្រុកកងមាស មកស្តុកទុក ហើយដំណើរការអាចនឹងបញ្ចប់នៅអំឡុងពេលមួយខែទៀត ដែលនាំឲ្យការផ្គត់ផ្គង់ទឹកលែងមានបញ្ហា។ បន្ថែមពីនេះទៀត អ្នកគ្រប់គ្រងសេវាទឹកស្អាតដដែលឲ្យដឹងទៀតថា ចំពោះតម្លៃនោះ គឺដោយសារតែសេវាបញ្ជូនទឹកពីស្រុកកងមាស ត្រូវចំណាយដើមទុនច្រើន ហើយតម្លៃនេះ គឺបានឯកភាពពីអាជ្ញាធររដ្ឋយ៉ាងត្រឹមត្រូវ ប៉ុន្តែបើគិតពីតម្លៃទឹកស្អាតប្រើប្រាស់របស់ឯកជនក្នុងខេត្តកំពង់ចាម គឺខាងលោកថោកជាងគេផង។ លោកថា មិនអាចយកតម្លៃទឹកស្អាតរបស់រដ្ឋមកប្រៀបធៀបជាមួយឯកជនបានទេ ហើយក៏មិនអាចយកតម្លៃភ្លើងមកប្រៀបធៀបតម្លៃទឹកបានដែរ។
ដោយឡែកអភិបាលស្រុកព្រៃឈរ លោក ទេព រាមមុន្នី មានប្រសាសន៍ថា ខាងលោកក៏បានជំរុញរឿងនេះឲ្យអ្នកគ្រប់គ្រងអង្គភាពទឹកស្អាតឯកជនមួយនេះ គប្បីធ្វើយ៉ាងណាដោះស្រាយបញ្ហាកង្វះទឹកជូនពលរដ្ឋឲ្យបានឆាប់រហ័ស ពីព្រោះរដូវនេះជារដូវក្តៅផង ដែលនាំឲ្យតម្រូវការទឹកកាន់តែច្រើន។ លោកបន្ថែមថា ខាងអាជ្ញាធរតែងយកចិត្តទុកដាក់ជាប្រចាំ ចំពោះការលំបាករបស់ពលរដ្ឋ៖ «ខ្ញុំព្យាយាមទាក់ទងជាមួយក្រុមហ៊ុនដើម្បីកុំឲ្យពលរដ្ឋខ្ញុំជួបបញ្ហាដែរ អ្នកណាមិនដឹងទេ បើខ្ញុំវិញតែអត់ទឹកក្នុងអាង ខ្ញុំអត់ចេះនៅទេ»។
ទោះបីជាយ៉ាងណាក៏ដោយ តំណាងពលរដ្ឋម្នាក់ លោក ហែម ចាន់ធឿន យល់ថា ជាការប្រសើរដើម្បីដោះស្រាយបញ្ហារបស់ប្រជាពលរដ្ឋ ខាងស្ថាប័នមួយនេះគប្បីផ្តល់ទឹកជូនពលរដ្ឋឲ្យបានគ្រប់គ្រាន់ជាមុនសិន ទើបផ្តល់ទៅឲ្យសហគ្រាសជាក្រោយ។ មួយវិញទៀត គប្បីត្រូវពង្រីកការផ្គត់ផ្គង់ទឹក ដែលបញ្ជូនទឹកពីស្រុកកងមាស បន្ថែមទៀត ជៀសវាងចេះតែពង្រីកបណ្ដាញសេវាប្រើប្រាស់ជូនពលរដ្ឋតំបន់ផ្សេង និងសហគ្រាសនានា ប៉ុន្តែសេវាផ្គត់ផ្គង់មិនបានពង្រីកនោះ។ ជាងនេះទៀត លោកចង់ឲ្យអាជ្ញាធរពាក់ព័ន្ធ គប្បីចុះមកត្រួតពិនិត្យតម្លៃទឹកនេះឡើងវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។