ការដ្ឋានបូមខ្សាច់ខ្នាតតូច និងធំចំនួន ៥ នៅតាមដងស្ទឹងពោធិ៍សាត់ ប៉ែកខាងលើ មានសកម្មភាពបូម និងដឹកជញ្ជូនខ្សាច់ទាំងយប់ទាំងថ្ងៃ។ ប្រជាពលរដ្ឋរស់នៅក្បែរការដ្ឋានទាំងនោះ បារម្ភពីបញ្ហាបាក់ច្រាំងស្ទឹង និងត្អូញត្អែរពីបញ្ហាធូលីដីហុយប៉ះពាល់សុខភាពកូនចៅ បណ្ដាលមកពីសកម្មភាពដឹកជញ្ជូនដីខ្សាច់ចេញពីការដ្ឋាន កាត់តាមភូមិឋានរបស់ពួកគាត់។
ឡានបែនដឹកខ្សាច់ធុនធ្ងន់ និងស្រាលជាច្រើនគ្រឿង បានជញ្ជូនខ្សាច់ពីស្ទឹងពោធិ៍សាត់ ដែលឈ្មួញ និងពលរដ្ឋខ្លះបូមពីស្ទឹងស្ដុកទុកក្បែរច្រាំង បង្កឲ្យប៉ះពាល់ដល់បរិស្ថាន និងសុខភាពមនុស្សជិត ៣ឆ្នាំហើយ។ ពលរដ្ឋរស់នៅក្រុងពោធិ៍សាត់ បញ្ជាក់នៅថ្ងៃទី១៦ ខែឧសភា ថា ធូលីដីហុយស្ទើរងងឹតមេឃដោយសារឡានដឹកខ្សាច់តាមបណ្ដោយផ្លូវលេខ៥៥ និងផ្លូវអ្នកតាឃ្លាំងមឿង នៃក្រុងពោធិ៍សាត់។
ពលរដ្ឋម្នាក់រស់នៅភូមិដប់បាត្រ សង្កាត់លលកស អ្នកស្រី អៀម ផល រៀបរាប់ថា ក្រៅពីបញ្ហាសុខភាពរបស់អ្នកភូមិ និងបរិស្ថាន ឡានដឹកខ្សាច់បង្កឲ្យផ្លូវខូចខ្ទេចខ្ទីដែរ ហើយអ្នកស្រីសង្កេតឃើញនៅរដូវភ្លៀងមកដល់ម្ដងៗ មានម៉ូតូដួលបន្តកន្ទុយគ្នាចន្លោះពី៥ ទៅ ១០គ្រឿង ក្នុង១ថ្ងៃ។
អ្នកស្រីថា បញ្ហាទាំងនេះពលរដ្ឋធ្លាប់រាយការណ៍ទៅអាជ្ញាធរមូលដ្ឋានដែរ តែមិនឃើញមានវិធានការអ្វីសោះ៖ «អារឿងបញ្ហាដឹកខ្សាច់ហ្នឹង វាមានការលំបាកធ្ងន់ធ្ងរជាទីបំផុតហើយ! មួយថ្ងៃៗ គឺឡានបើកបន្តកន្ទុយគ្នាសុទ្ធតែឡានដឹកខ្សាច់ទាំងអស់។ ហុយប៉ះពាល់ដល់កូនខ្លះឈឺ កើតជំងឺសួតយកទៅពិនិត្យនៅមន្ទីរ។ ចាស់ៗក៏លំបាកពេលហូបបាយ ហូបនំចំណី ដូចហូបដីអ៊ីចឹង»។
ចំណែកអាជីវករលក់នំបញ្ចុកនៅមុខផ្ទះ ឋិតនៅបណ្ដោយផ្លូវលេខ៥៥ គឺអ្នកស្រី ស្រី សាវិន ដៃកំពុងរវល់ចិតល្បោយនំបញ្ចុកបណ្ដើរ និងមានប្រសាសន៍បណ្ដើរថា សកម្មភាពដឹកខ្សាច់ច្រើន និងហុយកាន់តែខ្លាំង គឺនៅក្នុងឆ្នាំ២០១៥ នេះ។
អ្នកស្រីថា បើនៅតែហុយបែបនេះទៀត មុខរបរលក់នំបញ្ចុកគាត់នឹងត្រូវខាតបង់ ដូច្នេះអាជ្ញាធរ ឬម្ចាស់ការដ្ឋានខ្សាច់ត្រូវតែគិតគូរ និងដោះស្រាយបញ្ហានេះ៖ «ការលក់ដូរអីវាហុយពេក មើលអីវ៉ាន់ខ្ញុំហ្នឹងពូឯងមើលឃើញស្រាប់ហើយសុទ្ធតែដី។ សូមឲ្យរដ្ឋអំណាចជួយដោះស្រាយចាក់ទឹកកុំឲ្យហុយ បានអីក្នុងមួយថ្ងៃបានស្រោចម្ដងក៏គ្រាន់បន្តិចដែរ»។
ឆ្លើយតបបញ្ហានេះប្រធានមន្ទីររ៉ែ និងថាមពលខេត្តពោធិ៍សាត់ លោក សេង ប៊ុនថុល បញ្ជាក់ថា បច្ចុប្បន្នមានការដ្ឋានបូមខ្សាច់ចំនួន២៤ នៅដងស្ទឹងពោធិ៍សាត់ ក្នុងនោះមានក្រុមហ៊ុនចំនួន ១៩ ហើយ បានទទួលអាជ្ញាប័ណ្ណធ្វើអាជីវកម្ម បន្ទាប់ពីពិនិត្យភាពត្រឹមត្រូវលើឯកសារ និងសិក្សាលើបច្ចេកទេសបូម។
ចំពោះក្រុមហ៊ុនផ្សេងទៀត លោកថា នឹងពិនិត្យមើលបច្ចេកទេស មុននឹងសម្រេចផ្ដល់អាជ្ញាប័ណ្ណជាបន្តបន្ទាប់ទៀត ប៉ុន្តែការដឹកជញ្ជូនលើសទម្ងន់បណ្ដាលឲ្យខូចផ្លូវ ឬហុយធូលីដីប៉ះពាល់ដល់ប្រជាពលរដ្ឋតាមមូលដ្ឋាននោះ ខាងលោកនឹងចុះត្រួតពិនិត្យក្រុមហ៊ុនជាប្រចាំ៖ «ការងារបូមខ្សាច់ខាងខ្ញុំបានចុះទៅត្រួតពិនិត្យត្រឹមត្រូវ។ អារឿងចាក់ទឹក (កុំឲ្យហុយ) ហូរចូលក្នុងផ្ទះគាត់អីហ្នឹងខាងខ្ញុំបានដោះស្រាយជួសជុលផ្លូវអីឲ្យគាត់ តែដល់ពេលរឿងនេះខ្ញុំទើបតែឮដំណឹង»។
យ៉ាងណាក្រុមពលរដ្ឋ និងអាជ្ញាធរសង្កាត់លលកស នៃក្រុងពោធិ៍សាត់ រិះគន់អាជ្ញាធរមូលដ្ឋាន និងជំនាញពាក់ព័ន្ធថា មិនទាន់គ្រប់គ្រងធនធានខ្សាច់ក្នុងស្ទឹងពោធិ៍សាត់ បានត្រឹមត្រូវនៅឡើយ។ នៅទីតាំងខ្លះមានសកម្មភាពបូមខ្សាច់ទាំងយប់ថ្ងៃ ដោយគ្មានបច្ចេកទេសត្រឹមត្រូវ បណ្ដាលឲ្យបាក់ច្រាំងស្ទឹងស្ទើរក្លាយទៅជាទន្លេសាប និងបង្កផលប៉ះពាល់ដល់ពលរដ្ឋ ខណៈធនធានខ្សាច់កាន់តែខ្សត់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។