មន្ត្រីស្ថានទូតសហរដ្ឋអាមេរិក បង្ហាញថា បច្ចុប្បន្ន រដ្ឋាភិបាលអាមេរិក និងរដ្ឋាភិបាលកម្ពុជា កំពុងភ្ជាប់ទំនាក់ទំនង ព្រមទាំងធ្វើកិច្ចសហការយ៉ាងជិតស្និទ្ធជាមួយគ្នា ដើម្បីលើកកម្ពស់សុខភាពរបស់ប្រជាពលរដ្ឋខ្មែរនៅតាមសហគមន៍ឲ្យកាន់តែប្រសើរឡើង។
ជាច្រើនឆ្នាំមកហើយ សហរដ្ឋអាមេរិក បានចូលរួមយ៉ាងសកម្មក្នុងការប្រយុទ្ធប្រឆាំងនឹងជំងឺគ្រុនចាញ់ ការកសាងមណ្ឌលសុខភាពនៅតាមទីជនបទជាច្រើនកន្លែងក្នុងប្រទេសកម្ពុជា។ ក្នុងចំណោមបណ្ដាខេត្តមួយចំនួនដែលសហរដ្ឋអាមេរិក ចាប់អារម្មណ៍ទៅលើបញ្ហាសុខភាពនោះ ក៏មានខេត្តសៀមរាប ដែលជាខេត្តមានសក្ដានុពលខាងទាក់ទាញភ្ញៀវទេសចរបរទេសដែរ។
រដ្ឋមន្ត្រីក្រសួងសុខាភិបាល និងអាជ្ញាធរខេត្តសៀមរាប ព្រមទាំងមន្ត្រីស្ថានទូតអាមេរិកប្រចាំកម្ពុជា បានរួមគ្នាបើកសម្ពោធអគារនៃមជ្ឈមណ្ឌលផ្ដល់ឈាមមួយ ដែលសាងសង់អស់ទឹកប្រាក់ជាង ៧៣ម៉ឺនដុល្លារ ជាជំនួយរបស់កងទ័ពជើងទឹកនៃសហរដ្ឋអាមេរិក ប្រចាំតំបន់អាស៊ី-ប៉ាស៊ីហ្វិក។
បទភ្លេងគោរពទង់ជាតិនៃសហរដ្ឋអាមេរិក បានបន្លឺឡើងកាលពីវេលាម៉ោងជាង ៨ព្រឹកថ្ងៃព្រហស្បតិ៍ ទី៣ ខែមីនា នៅក្នុងមន្ទីរពេទ្យបង្អែកខេត្តសៀមរាប ដែលជាកន្លែងសម្ពោធដាក់ឲ្យប្រើប្រាស់អគារនៃមជ្ឈមណ្ឌលផ្ដល់ឈាមដ៏ថ្មីសន្លាងមួយនេះ។
«ភ្លេងទង់ជាតិ»
អភិបាលរងខេត្តសៀមរាប ទទួលបន្ទុកការងារសុខាភិបាល គឺលោក សង់ រីហា។ លោកថ្លែងនៅក្នុងឱកាសបើកសម្ពោធអគារនៃមជ្ឈមណ្ឌលផ្ដល់ឈាមនោះថា ជាច្រើនឆ្នាំមកហើយ មន្ទីរពេទ្យខេត្តសៀមរាប បានប្រឹងប្រែងលើកកម្ពស់សុខភាព ព្រមទាំងព្យាបាលជំងឺជូនប្រជាពលរដ្ឋ ដោយពង្រីកអគារព្យាបាលជំងឺធំៗជាច្រើនផ្នែក ដូចជាអគារព្យាបាលភ្នែក អគារសម្ភព អគារពិសោធន៍វេជ្ជសាស្ត្រ អគារបណ្ដុះបណ្ដាលវិជ្ជាជីវៈ ជាដើម ហើយនៅថ្ងៃនេះ មន្ទីរពេទ្យទទួលបានសមិទ្ធផលថ្មីមួយទៀត គឺអគារនៃមជ្ឈមណ្ឌលផ្ដល់ឈាម។ លោក សង់ រីហា បានថ្លែងអំណរគុណរដ្ឋាភិបាល និងប្រជាពលរដ្ឋអាមេរិក ដែលផ្ដល់អគារដ៏មានសារសំខាន់មួយនេះ៖ « អគារនៃមជ្ឈមណ្ឌលឈាម ផ្ដល់នូវសារសំខាន់បំផុតក្នុងការផ្ដល់សេវាបន្ទាន់ ជួយដល់អ្នកជំងឺផ្សេងៗ ដែលត្រូវការឈាម ដោយមិន មាន ការរើសអើង ពិសេសជួយដល់ស្ត្រីដែលធ្លាក់ឈាមនៅមុន និងក្រោយពេលសម្រាលកូន »។
ប្រធានមន្ទីរសុខាភិបាលខេត្តសៀមរាប លោកវេជ្ជបណ្ឌិត ក្រូស សារ៉ាត់ ឲ្យដឹងថា អគារនៃមជ្ឈមណ្ឌលផ្ដល់ឈាមនេះ បានចំណាយពេលសាងសង់ចំនួន ១២ខែ ដោយបំពាក់ឧបករណ៍វេជ្ជសាស្ត្រជាច្រើន ពាក់ព័ន្ធនឹងផ្នែកពិនិត្យ ព្រមទាំងថែរក្សាឈាម។ អគារនេះសាងសង់អស់ទឹកប្រាក់ជាង ៧៣ម៉ឺនដុល្លារ ដែលជាជំនួយរបស់កងទ័ពជើងទឹកនៃសហរដ្ឋអាមេរិក ប្រចាំតំបន់អាស៊ី-ប៉ាស៊ីហ្វិក។
អគ្គរដ្ឋទូតរងនៃសហរដ្ឋអាមេរិកប្រចាំកម្ពុជា អ្នកស្រី ជូលី ជុង (Julie Chung) រំពឹងថា មជ្ឈមណ្ឌលផ្ដល់ឈាមដែលបើកឲ្យប្រើប្រាស់នៅក្នុងមន្ទីរពេទ្យខេត្តសៀមរាប ពេលនេះ នឹងប្រមូល ថែរក្សា ព្រមទាំងអាចផ្ដល់ឈាមទៅដល់សហគមន៍ ព្រមទាំងផ្ដល់ផលប្រយោជន៍យ៉ាងច្រើនទៅលើវិស័យសុខាភិបាលសាធារណៈ។ បច្ចុប្បន្ន តែងមានបញ្ហាគ្រោះថ្នាក់ចរាចរណ៍កើតឡើងជាញឹកញាប់ ដែលធ្វើឲ្យអ្នករងគ្រោះទាំងនោះត្រូវការឈាមជួយសង្គ្រោះជីវិត។ ដូច្នេះ មជ្ឈមណ្ឌលផ្ដល់ឈាម ដែលបើកឲ្យដំណើរការនៅខេត្តសៀមរាប ពេលនេះ គឺជាកន្លែងដែលទទួលស្ដុក ព្រមទាំងថែរក្សាឈាម ដើម្បីជួយសង្គ្រោះដល់អាយុជីវិតប្រជាពលរដ្ឋជាច្រើន៖ « នេះ គឺជាកិត្តិយសរបស់សហរដ្ឋអាមេរិក ដែលបានធ្វើជាដៃគូជួយខេត្តសៀមរាប ឲ្យក្លាយទៅជាទីរីករាយ និងមានសុខុមាលភាព ។ ខ្ញុំ មានមោ ទនភាព ចំពោះកង ទ័ពជើងទឹកនៃ សហរដ្ឋអាមេរិក ប្រចាំតំបន់អាស៊ី - ប៉ាស៊ីហ្វិក ដែលមិនត្រឹមតែជួយសាងសង់អគារផ្ដល់ឈាមទេ ថែមទាំង ជួយ បណ្ដុះបណ្ដាលបុ គ្គលិកខ្មែរ ឲ្យចេះធ្វើការផងដែរ »។
នេះ គឺជាអគារនៃមជ្ឈមណ្ឌលផ្ដល់ឈាមទីពីរហើយ ដែលជាជំនួយរបស់សហរដ្ឋអាមេរិក។ កាលពីពីរសប្ដាហ៍មុន អគារនៃមជ្ឈមណ្ឌលផ្ដល់ឈាមដូចគ្នានេះដែរ បានសម្ពោធបើកឲ្យប្រើប្រាស់នៅខេត្តកំពង់ចាម។
រដ្ឋមន្ត្រីក្រសួងសុខាភិបាល លោកវេជ្ជបណ្ឌិត ម៉ម ប៊ុនហេង មានជំនឿយ៉ាងមុតមាំថា ក្រោយពេលដែលអគារនៃមជ្ឈមណ្ឌលផ្ដល់ឈាមបើកឲ្យប្រើប្រាស់មក គឺប្រជាពលរដ្ឋដែលរស់នៅខេត្តសៀមរាប ព្រមទាំងបណ្ដាខេត្តជុំវិញ ប្រាកដជាបានទទួលសេវាព្យាបាលកាន់តែប្រសើរ ព្រមទាំងអាចផ្ដល់ឈាមជួយសង្គ្រោះជីវិតបានទាន់ពេលវេលា៖ « ឥឡូវយើងមានអគារនេះ មានបច្ចេកទេសទំនើបបំបែកឈាមឲ្យទៅជាគ្រាប់ឈាមដោយឡែកៗពីគ្រាប់ឈាមកក ឲ្ យទៅ ជាគ្រាប់ ឈាមក្រហម ឲ្ យទៅជាផ្លាស្មា ជាដើម »។
មន្ត្រីស្ថានទូតសហរដ្ឋអាមេរិកប្រចាំកម្ពុជា ឲ្យដឹងថា ក្រៅពីផ្ដល់ជំនួយសាងសង់មជ្ឈមណ្ឌលផ្ដល់ឈាមនៅខេត្តកំពង់ចាម និងខេត្តសៀមរាប សហរដ្ឋអាមេរិក ក៏បានជួយកសាងមជ្ឈមណ្ឌលផ្ដល់ឈាមថ្មីមួយទៀតនៅទីក្រុងភ្នំពេញ ដែលនឹងបើកសម្ពោធដាក់ឲ្យប្រើប្រាស់នៅពេលខាងមុខ។ សហរដ្ឋអាមេរិក នឹងជំរុញឲ្យមិត្តកាកបាទក្រហមអូស្ត្រាលី សហការជាមួយនឹងអង្គការសុខភាពពិភពលោក ជួយធ្វើផែនការយុទ្ធសាស្ត្របណ្ដុះបណ្ដាល និងអភិវឌ្ឍការផ្ដល់ឈាម ព្រមទាំងឲ្យមានការទទួលស្គាល់មជ្ឈមណ្ឌលជាតិផ្ដល់ឈាមនៅកម្ពុជា ជាខ្នាតអន្តរជាតិ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។