គ្លីនិកព្យាបាលជំងឺទូទៅចំនួន ៣កន្លែង នៅស្រុកជាប់ជាយដែនខ្មែរ-ថៃ ខេត្តបាត់ដំបង ត្រូវបានមន្ទីរសុខាភិបាលខេត្តបាត់ដំបង បិទមិនឲ្យដំណើរការព្យាបាលអ្នកជំងឺបន្ត ដោយសារគ្មានច្បាប់អនុញ្ញាតពីក្រសួងសុខាភិបាល។ ប៉ុន្តែម្ចាស់គ្លីនិកអះអាងថា មានច្បាប់អនុញ្ញាតព្យាបាលជំងឺត្រឹមត្រូវ។
ប្រធានមន្ទីរសុខាភិបាលខេត្តបាត់ដំបង មានប្រសាសន៍បញ្ជាក់នៅថ្ងៃទី២៨ ឧសភា ថា គ្លីនិកទាំង៣ នោះ ម្ចាស់ជាជនជាតិចិន ឈ្មោះគ្លីនិកមិត្តភាពខ្មែរ-ចិន បើកព្យាបាលជំងឺទូទៅ រួមមាននៅស្រុកសំពៅលូន ចំនួន ២កន្លែង និងស្រុកភ្នំព្រឹក មួយកន្លែង បានបើកដំណើរការព្យាបាលអ្នកជំងឺនៅតំបន់ជាយដែននោះប្រមាណជាងមួយឆ្នាំមកហើយ។
លោក វឿង ប៊ុនរ៉ែត ថ្លែងបន្តថា ការបិទគ្លីនិកនេះ ដើម្បីរក្សាសុវត្ថិភាពអាយុជីវិតរបស់ប្រជាពលរដ្ឋ បន្ទាប់ពីខាងមន្ទីរសុខាភិបាលខេត្តបាត់ដំបង ប្រាប់ទៅម្ចាស់គ្លីនិកឲ្យសុំច្បាប់អនុញ្ញាតព្យាបាលអ្នកជំងឺឲ្យបានត្រឹមត្រូវជាច្រើនលើកច្រើនសាមកហើយ តែម្ចាស់គ្លីនិករឹងរូសមិនព្រមអនុវត្តតាមការណែនាំ ទើបខាងមន្ទីរសុខាភិបាលខេត្តបញ្ជាឲ្យបិទទ្វារតែម្ដង៖ «គាត់ដំណើរការព្យាបាលជំងឺលួចលាក់ ដែលយើងឲ្យគាត់បិទហើយ ឲ្យធ្វើច្បាប់ត្រឹមត្រូវ តែគាត់នៅតែគាត់ធ្វើតាម។ បើគាត់មានច្បាប់ពេលណានោះ យើងនឹងអនុញ្ញាតឲ្យគាត់ដំណើរការឡើងវិញ»។
ឆ្លើយតបនឹងបញ្ហានេះ ប្រពន្ធម្ចាស់គ្លីនិកមិត្តភាពខ្មែរ-ចិន ឃុំសន្តិភាព អ្នកស្រី សៀង នឿន អះអាងថា គ្លីនិករបស់អ្នកស្រីដែលមន្ទីរសុខាភិបាលខេត្តបាត់ដំបង បញ្ជាឲ្យបិទទ្វារកាលពីថ្ងៃទី២៧ ឧសភា នោះ មានច្បាប់អនុញ្ញាតត្រឹមត្រូវ។ អ្នកស្រីសោកស្ដាយចំពោះបទបញ្ជាឲ្យបិទគ្លីនិកនេះ ព្រមទាំងស្នើសមត្ថកិច្ចពាក់ព័ន្ធ ពិចារណារកហេតុផលសាជាថ្មី៖ «ខាងមន្ទីរសុខាភិបាលបិទគ្លីនិកខ្ញុំ ដោយចោទប្រកាន់ថា គ្មានច្បាប់អនុញ្ញាត និងប្រើប្រាស់ថ្នាំចិន ក្នុងការព្យាបាលជំងឺ។ ប៉ុន្តែកន្លែងព្យាបាលរបស់ខ្ញុំមានច្បាប់សមាគមចេញពីក្រសួងមហាផ្ទៃ ត្រឹមត្រូវ»។
មន្ត្រីសម្របសម្រួលសមាគមការពារសិទ្ធិមនុស្សអាដហុក (Adhoc) ខេត្តបាត់ដំបង លោក យិន ម៉េងលី ស្វាគមន៍ចំពោះវិធានការរបស់មន្ទីរសុខាភិបាលខេត្តបាត់ដំបង ទៅនឹងការបិទគ្លីនិកព្យាបាលជំងឺទូទៅនេះ ថាជាសកម្មភាពមួយល្អ។ យ៉ាងណា លោកស្នើឲ្យសមត្ថកិច្ចពាក់ព័ន្ធ ត្រូវពិនិត្យមន្ទីរព្យាបាលទាំងអស់ក្នុងខេត្តបាត់ដំបង ឲ្យដំណើរប្រតិបត្តិការឲ្យបានត្រឹមត្រូវ ឈរលើគោលការណ៍ច្បាប់ និងមិនលម្អៀង៖ «ពីព្រោះបើសិនជាប្រតិបត្តិការណាមួយធ្វើឡើងដោយគ្មានការចុះបញ្ជី ចាត់ជាខុសច្បាប់។ ក៏ប៉ុន្តែសកម្មភាពនេះ ត្រូវដោយប្រុងប្រយ័ត្ន គឺមិនត្រូវធ្វើរំលោភច្បាប់ដែលមានចែងនោះទេ ដូចជាករណីដែលម្ចាស់គ្លីនិកអះអាងថា សមត្ថកិច្ចចោទប្រកាន់ការប្រើប្រាស់ថ្នាំរបស់ចិន នោះមិនត្រឹមត្រូវឡើយ»។
មន្ទីរសុខាភិបាលខេត្ត រឹតបន្តឹងគ្លីនិកព្យាបាលជំងឺនៅពេលនេះ ទំនងដោយសារជួបប្រទះមេរៀនពាក់ព័ន្ធករណីគ្រូពេទ្យព្យាបាលជំងឺប្រជាពលរដ្ឋឆ្លងមេរោគអេដស៍ ប្រមាណជិត ៣០០នាក់នៅឃុំរកា ស្រុកសង្កែ ខេត្តបាត់ដំបង។
សមត្ថកិច្ច ពុំទាន់មានវិធានការផ្លូវច្បាប់យ៉ាងណាទៅលើគ្លីនិក ដែលបើកព្យាបាលជំងឺដែលគ្មានច្បាប់អនុញ្ញាតនេះនៅឡើយទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។