លោកឧកញ៉ា ម៉ុង ឫទ្ធី មានប្រសាសន៍ថា លោកនឹងសង់រោងសម្រាប់អង្គុយរង់ចាំនៅខាងក្រៅមន្ទីរពេទ្យគន្ធបុប្ផា មួយចំនួនឱ្យរួចមុនថ្ងៃបុណ្យភ្ជុំបិណ្ឌ ជូនប្រជាពលរដ្ឋដែលរង់ចាំទទួលសេវាពិនិត្យព្យាបាលជំងឺនៅមន្ទីរពេទ្យគន្ធបុប្ផា។
លោកឧកញ៉ា ម៉ុង ឫទ្ធី៖ «គម្រោងដែលយើងគ្រោងសាងសង់រោងហ្នឹង ដំបូងគឺធ្វើចំនួន ១០រោងសិន។ បើសិនមានទីតាំងសម្រាប់សាងសង់បង្គន់អនាម័យ ខ្ញុំសង់ជូនពលរដ្ឋ ហើយប្រសិនបើមានសប្បុរសជនចូលរួមក៏ចូលទៅ បើអត់ក៏អត់ទៅ»។
ការប្រកាសសាងសង់នេះ បន្ទាប់ពីប្រជាពលរដ្ឋអ្នកជំងឺស្នើសុំដល់រដ្ឋាភិបាលកម្ពុជា ឱ្យជួយធ្វើកៅអីអង្គុយ និងរោងសម្រាប់ជ្រកក្រោមកម្ដៅថ្ងៃ និងក្រោមដំណក់ទឹកភ្លៀងដើម្បីរង់ចាំចូលពិនិត្យជំងឺនៅខាងក្រៅមន្ទីរពេទ្យគន្ធបុប្ផា។
លោកបន្ថែមថា ពលរដ្ឋអ្នកជំងឺមិនត្រឹមតែត្រូវការកន្លែងសម្រាប់ជ្រក បង់ ឬកៅអីអង្គុយនោះទេ ប៉ុន្តែថែមទាំងត្រូវការបង្គន់អនាម័យសម្រាប់បន្ទោបង់ និងទឹកស្អាតសម្រាប់ទទួលទានថែមទៀតផង។
ពលរដ្ឋដែលមកទទួលសេវាមានការលំបាកជាខ្លាំង និងបានស្នើសុំឲ្យរដ្ឋាភិបាលជួយសម្រួលរៀបចំឱ្យមានកន្លែងជ្រក អង្គុយរង់ចាំ និងសង់បង្គន់អនាម័យសម្រាប់បន្ទោបង់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។