ប្រជាពលរដ្ឋមួយចំនួនរស់នៅស្រុកភ្នំស្រុក ខេត្តបន្ទាយមានជ័យ ចោទប្រកាន់គ្រូពេទ្យនៅមណ្ឌលសុខភាពមួយនៃស្រុកនេះ ថាមិនយកចិត្តទុកដាក់នៅប្រចាំការក្នុងមណ្ឌលសុខភាព មើលថែប្រជាពលរដ្ឋនោះទេ ដោយយកពេលវេលាទៅមើលអ្នកជំងឺតាមភូមិយកកម្រៃផ្ទាល់ខ្លួនទៅវិញ។
ទាក់ទងនឹងបញ្ហានេះ ប្រធានមណ្ឌលសុខភាពទទួលស្គាល់ថា គ្រូពេទ្យពិតជាមើលថែប្រជាពលរដ្ឋមិនបានដិតដល់ប្រាកដមែន ប៉ុន្តែបញ្ហានេះ ដោយសារមណ្ឌលសុខភាពមានគ្រូពេទ្យមិនគ្រប់គ្រាន់។
ប្រជាពលរដ្ឋនៅស្រុកភ្នំស្រុក មិនពេញចិត្តទៅនឹងសកម្មភាពរបស់ក្រុមគ្រូពេទ្យមណ្ឌលសុខភាពនេះ ថាជាកាយវិការមួយគិតតែពីផលប្រយោជន៍របស់ខ្លួនហួសហេតុ ដោយមិនខ្វល់ពីទុក្ខលំបាកប្រជាពលរដ្ឋក្រីក្រនោះទេ។
ក្រុមប្រជាពលរដ្ឋរស់នៅឃុំស្ពានស្រែង ស្រុកភ្នំស្រុក ខេត្តបន្ទាយមានជ័យ អះអាងនៅថ្ងៃទី១៤ កក្កដា ថា គ្រូពេទ្យប្រចាំនៅមណ្ឌលសុខភាពស្ពានស្រែង ស្រុកភ្នំស្រុក មិនយកចិត្តទុកដាក់មើលថែអ្នកជំងឺក្នុងមណ្ឌលសុខភាព ឲ្យបានទៀងទាត់នោះទេ ដោយយកពេលវេលាក្នុងម៉ោងការងាររដ្ឋ ទៅប្រកបអាជីវកម្មមើលថែអ្នកជំងឺតាមផ្ទះ យកកម្រៃផ្ទាល់ខ្លួនទៅវិញ។
អ្នកភូមិអំពាវនាវសុំឲ្យប្រធានមន្ទីរសុខាភិបាលខេត្តបន្ទាយមានជ័យ និងមន្ត្រីពាក់ព័ន្ធ ជំរុញឲ្យគ្រូពេទ្យប្រចាំការក្នុងមណ្ឌលសុខភាពស្ពានស្រែង ២៤ម៉ោង ដើម្បីមើលថែសុខភាពប្រជាពលរដ្ឋនៅទីជនបទឲ្យបានទៀងទាត់៖ «បើនិយាយទៅ គ្រូពេទ្យទៅព្យាបាលអ្នកជំងឺនៅខាងក្រៅច្រើនជាងក្នុងមណ្ឌលសុខភាព។ ចំពោះក្នុងមណ្ឌលសុខភាពវិញ គ្រូពេទ្យធ្វើការតែពេលព្រឹកបន្តិចបន្តួចទេ»។
ឆ្លើយតបនឹងបញ្ហានេះ ប្រធានមណ្ឌលសុខភាពស្ពានស្រែង លោក ឈើត ស្វិត ទទួលស្គាល់ថា គ្រូពេទ្យពិតជាពុំបានប្រចាំការក្នុងមណ្ឌលសុខភាព មើលថែប្រជាពលរដ្ឋឲ្យបានទៀងទាត់ប្រាកដមែន ប៉ុន្តែលោកអះអាងថា មូលហេតុដែលគ្រូពេទ្យប្រចាំការក្នុងមណ្ឌលសុខភាពមិនបានទៀងទាត់នោះ ដោយសារមណ្ឌលសុខភាពទើបតែសាងសង់ថ្មី ហើយម្យ៉ាងទៀតមានគ្រូពេទ្យរដ្ឋចំនួន ៣នាក់ ដែលមិនគ្រប់គ្រាន់សម្រាប់មើលថែដល់អ្នកជំងឺនោះ៖ «បាទ! បុគ្គលិកតិច ហើយបើពេលខ្លះគ្រូពេទ្យណាគាត់ឡើងទៅរៀនទៅ វាកាន់តែលំបាកខ្លាំង។ បាទ! ចាប់ពីថ្ងៃទី៣០ កក្កដា ទៅ ប្រហែលជាខាងមន្ទីរសុខាភិបាល បញ្ជូនគ្រូពេទ្យមកបន្ថែមក្នុងមណ្ឌលសុខភាពគ្រប់ចំនួនហើយ»។
ទោះយ៉ាងនេះក្ដី មន្ត្រីសម្របសម្រួលនៃសមាគមការពារសិទ្ធិមនុស្សអាដហុក (Adhoc) ខេត្តបន្ទាយមានជ័យ លោក ស៊ុំ ច័ន្ទគា មានប្រសាសន៍ថា គ្រូពេទ្យប្រចាំការក្នុងមណ្ឌលសុខភាពជារឿងសំខាន់ណាស់ដល់ប្រជាពលរដ្ឋ ដែលមានជីវភាពក្រីក្រនៅតាមទីជនបទ ដើម្បីព្យាបាលដល់អ្នកជំងឺនោះ ប៉ុន្តែលោកអះអាងថា នៅតាមមណ្ឌលសុខភាពដាច់ស្រយាលជាច្រើននៅខេត្តបន្ទាយមានជ័យ គ្រូពេទ្យមិនបានប្រចាំការដិតដល់ថែទាំអ្នកជំងឺនោះទេ គឺច្រើនយកឱកាសទៅព្យាបាលអ្នកជំងឺរកប្រាក់កម្រៃនៅខាងក្រៅវិញ៖ «ប្រសិនបើបញ្ហានេះនៅតែកើតមានបន្តទៀត ប្រជាពលរដ្ឋក្រីក្រនឹងជួបការលំបាកកាន់តែខ្លាំងឡើង ពីព្រោះពួកគាត់ត្រូវទៅព្យាបាលនៅមន្ទីរពេទ្យឯកជនដែលមានតម្លៃសេវាខ្ពស់»។
មណ្ឌលសុខភាពស្ពានស្រែង បើកដំណើរការប្រមាណ ៣ខែមកហើយ មានគ្រូពេទ្យទាំងអស់ ៤នាក់ ដែលគ្របដណ្ដប់ភូមិចំនួន៦ នៃឃុំស្ពានស្រែង ស្រុកភ្នំស្រុក ខេត្តបន្ទាយមានជ័យ និងមានប្រជាពលរដ្ឋប្រមាណជាង ៤.៣០០នាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។