ស្ថានទូតកម្ពុជា ប្រចាំនៅក្រុងម៉ានីល (Manila) នៃប្រទេសហ្វីលីពីន (Philippines) ជួយសង្គ្រោះនាវិកខ្មែរចំនួន ៤នាក់ ដែលរត់គេចពីការរំលោភបំពានសិទ្ធិការងារនៅលើកប៉ាល់បរទេសមួយគ្រឿង។
សេចក្ដីប្រកាសរបស់អ្នកនាំពាក្យក្រសួងការបរទេសកម្ពុជា ចេញផ្សាយនៅថ្ងៃទី២៩ ខែសីហា បញ្ជាក់ថា នាវិកទាំង ៤នាក់នោះបានគេចខ្លួនចេញពីកប៉ាល់ឈ្មោះ ប្លូ អឹមភឺរ៉ឺ វ៉័ន (Blue Emperor1) នៃក្រុមហ៊ុន ញូវ យូណាយ អេច្ឆ.ខេ ម៉ារីន (New Unite HK Marine Shipping Ltd) កាលពីថ្ងៃទី២៧ ខែសីហា ដោយបានទៅរកជំនួយអន្តរាគមន៍ពីស្ថានទូត ដោយមូលហេតុភាគីក្រុមហ៊ុនបានរំលោភលើលក្ខខណ្ឌការងារបង្ខំឲ្យធ្វើការទាំងមានជំងឺ និងពុំបានផ្ដល់ប្រាក់ខែតាមការសន្យា។ ពួកគេក៏សុំអន្តរាគមន៍ក្នុងបំណងបានត្រឡប់ទៅស្រុកកំណើតវិញ។
សេចក្ដីប្រកាសព័ត៌មានដដែលអោយដឹងដែរថា ស្ថានទូតបានអន្តរាគមន៍ជួយនាវិកទាំង ៤នាក់នោះ អោយទៅដល់ស្ថានទូត និងស្នាក់នៅនិវេសនដ្ឋានឯកអគ្គរាជទូត។ ចំណែកក្រុមហ៊ុនក៏បានសន្យានឹងស្ថានទូតថា នឹងដោះស្រាយការវិលត្រឡប់មកប្រទេសវិញរបស់នាវិកទាំង ៤នាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។