ពលរដ្ឋមួយគ្រួសាររស់នៅឃុំជ្រោយបន្ទាយ ស្រុកព្រែកប្រសព្វ ខែត្រក្រចេះ អំពាវនាវឲ្យសាលាដំបូងខែត្រនេះលើកលែងបទចោទមន្ត្រីការពារបរិស្ថាន និងអភិវឌ្ឍន៍ម្នាក់ឲ្យមានសេរីភាពវិញ។ អធិការស្រុកព្រែកប្រសព្វ និងអភិបាលស្រុកព្រែកប្រសព្វ រួមទាំងសមត្ថកិច្ចចម្រុះបានឃាត់ខ្លួនមន្ត្រីអង្គការការពារបរិស្ថាន និងអភិវឌ្ឍន៍ ម្នាក់កាលពីយប់ថ្ងៃទី១៥ កុម្ភៈ ដោយចោទពីបទកំហែងយក។ មន្ត្រីសង្គមស៊ីវិលចាត់ទុកការឃាត់ខ្លួននេះ គឺជាករណីល្មើសច្បាប់។
ក្រុមគ្រួសារមន្ត្រីការពារបរិស្ថាន និងអភិវឌ្ឍន៍ នៅខែត្រក្រចេះ កំពុងស្វែងរកការអន្តរាគមន៍ពីអង្គការសង្គមស៊ីវិល និងស្ថាប័នពាក់ព័ន្ធឲ្យជួយជ្រោមជ្រែងផ្នែកច្បាប់ នៅថ្ងៃទី២១ កុម្ភៈ។
បុរសដែលត្រូវជាឪពុកមន្ត្រីបរិស្ថានដែលកំពុងជាប់ឃុំ លោក ស៊ិន ធី យល់ថាការចាប់ខ្លួនកូនប្រុសរបស់លោក ជារឿងមិនត្រឹមត្រូវ។ លោកទទួលស្គាល់ថា កូនប្រុសរបស់លោកបានទទួលប្រាក់ពីអ្នកដឹកឈើ ៤គោយន្តចំនួន ១ម៉ឺន ៥ពាន់រៀល កាលពីរសៀលថ្ងៃទី១៥ កុម្ភៈ ក៏ប៉ុន្តែប្រាក់នោះកូនប្រុសរបស់លោកពុំបានគំរាមកំហែង ឬជំរិតទារប្រាក់នោះទេ ហើយអ្នកដឹកឈើទាំងនោះទៅវិញទេជាអ្នកសូកប៉ាន់កូនប្រុសរបស់លោក ដើម្បីជាថ្នូរបិទព័ត៌មាន។
លោកថា បុរសដឹកជញ្ជូនឈើប្រណិត ៤គោយន្ត បានយកប្រាក់សូកប៉ាន់កូនរបស់លោក ពុំឃើញសមត្ថកិច្ចឃាត់ខ្លួននោះទេ។ បញ្ហានេះ លោកមានមន្ទិលថា តើសមត្ថកិច្ចអនុវត្តច្បាប់មានតម្លាភាពឬទេ នៅគ្រាដែលចាប់ខ្លួនមន្ត្រីការពារបរិស្ថានដាក់គុក ក៏ប៉ុន្តែឈ្មួញរកស៊ីឈើបែរជាត្រូវរួចខ្លួន៖ « វាដឹកឈើខុសច្បាប់យកទៅលក់ ៤គោយន្ត។ វាឲ្យថ្ងៃរសៀល ដល់យប់វាប្ដឹងចៅហ្វាយស្រុកឲ្យមកចាប់ ថាយកលុយវា ហើយលុយ ១ម៉ឺន ៥ពាន់រៀល។ ខ្ញុំដូចពិបាកដែរដល់ពេលចឹង ធ្វើអត់មានមូលហេតុទោសត្រូវដាក់គុក »។
កាលពីរសៀលថ្ងៃទី១៥ កុម្ភៈ អភិបាលស្រុកព្រែកប្រសព្វ លោក សេក ប៊ុនហេង និងអធិការស្រុកព្រែកប្រសព្វ លោក ចាន់ សុផល្លា រួមទាំងសមត្ថកិច្ចចម្រុះបានឃាត់ខ្លួនមន្ត្រីអង្គការការពារបរិស្ថាន និងអភិវឌ្ឍន៍ម្នាក់ឈ្មោះ វឿន ប៊ុនធឿន ពីបទកំហែងយក។ ការឃាត់ខ្លួនក្រោយពីមានពាក្យបណ្ដឹងពីអ្នកដឹកឈើម្នាក់ ដែលប្ដឹងមន្ត្រីបរិស្ថានរូបនោះថាជំរិតទារប្រាក់ពីពួកគេចំនួន ១ម៉ឺន ៥ពាន់រៀល។
អធិការស្រុកព្រែកប្រសព្វ លោក ចាន់ សុផល្លា ថ្លែងបញ្ជាក់ថា ប្រតិបត្តិការឃាត់ខ្លួននេះបន្ទាប់ពីមានពាក្យបណ្ដឹងពីពលរដ្ឋដែលចោទមន្ត្រីអង្គការការពារបរិស្ថាន និងអភិវឌ្ឍន៍ ថាបានជំរិតទារប្រាក់តាមទូរស័ព្ទពីពួកគេដឹកជញ្ជូនឈើបន្តិចបន្តួច។ លោកចាត់ទុកការជំរិតទារប្រាក់ពីពលរដ្ឋដឹកជញ្ជូនឈើ គឺជាបទល្មើសព្រហ្មទណ្ឌជាក់ស្តែង ហេតុនេះសមត្ថកិច្ចមានសិទ្ធិចាប់ខ្លួនមន្ត្រីអង្គការរូបនោះទាំងយប់បាន។ លោកបញ្ជាក់ថា ការឃាត់ខ្លួននេះផ្អែកតាមបទបញ្ជាអភិបាលខែត្រក្រចេះ ដែលហាមមិនឲ្យមានកុងត្រូលជជុះខុសច្បាប់ចាំស្ទាក់ទារប្រាក់ពីពលរដ្ឋ និងមានការសហការពីអភិបាលស្រុកព្រែកប្រសព្វ ផង៖ « យើងបានផ្សព្វផ្សាយហើយថា កុំឲ្យគាត់ធ្វើអីខុសច្បាប់កន្លងទៅ យើងបានទាំងដេញកុំឲ្យធ្វើអីខុសចឹងថាខុសច្បាប់ តែពួកគាត់ក្បាលរឹងមិនស្តាប់ទេ។ គណៈកម្មការចុះទៅបាត់ទៅ ដល់ពេលគេចេញមកវិញ ពលរដ្ឋដឹកតិចតួចជំរិតគេយកទៅ »។
អ្នកនាំពាក្យសមាគមការពារសិទ្ធិមនុស្សអាដហុក (ADHOC) លោក សំ ច័ន្ទគា ចាត់ទុកការឃាត់ខ្លួននេះ ថាជាករណីរំលោភក្រមនីតិវិធីព្រហ្មទណ្ឌ ព្រោះពុំមែនជាបទល្មើសជាក់ស្តែង ដែលសមត្ថកិច្ចពុំមានសិទ្ធិឃាត់ខ្លួនមនុស្សទាំងយប់បានទេ លើកលែងតែបទល្មើសជួញដូរគ្រឿងញៀន និងជួញដូរមនុស្ស ដែលអនុញ្ញាតឲ្យសមត្ថកិច្ចចាប់ខ្លួនដោយគ្មានដីកាពីតុលាការ។ លោកជំរុញឲ្យសាលាដំបូងខែត្រក្រចេះ ពិនិត្យករណីនេះឡើងវិញ និងលើកលែងបទចោទ ប្រសិនរកឃើញថា ការចាប់ខ្លួននេះបំពានច្បាប់។ លោកយល់ថា សមត្ថកិច្ចគួរតែមានការអប់រំណែនាំ និងធ្វើកិច្ចសន្យាព្រមានឲ្យបញ្ឈប់ ប្រសើរជាងដាក់ទណ្ឌកម្មច្បាប់៖ « ការចាប់ខ្លួនគេទាំងយប់ដោយគ្មានដីកាពីតុលាការនេះ ហើយពុំមែនជាករណីជាក់ស្តែង គឺជាការរំលោភនីតិវិធីព្រហ្មទណ្ឌហើយ គួរតែត្រូវធ្វើការព្រមាន ព្រោះការឃាត់យកលុយវាតិច »។
កាលពីដើមខែកុម្ភៈ ឆ្នាំ២០១៧ មន្ត្រីនៃអង្គការមិនមែនរដ្ឋាភិបាលមួយរូប និងពលរដ្ឋ ៤នាក់ ត្រូវបានសាលាដំបូងខែត្រក្រចេះ សម្រេចឃុំខ្លួនបណ្ដោះអាសន្ន បន្ទាប់ពីពួកគេបានឃាត់រថយន្តដឹកឈើមករក្សាទុក ដោយមិនបានផ្តល់ព័ត៌មានទៅមន្ត្រីរដ្ឋបាលព្រៃឈើជាមុន និងសង្ស័យថាជំរិតទារប្រាក់ពីម្ចាស់រថយន្តដឹកឈើ។ ការឃាត់ខ្លួននោះ អាជ្ញាធរពាក់ព័ន្ធ និងតុលាការពុំបានធ្វើការចោទប្រកាន់អ្នកដឹកឈើខុសច្បាប់នោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។