របាយការណ៍អង្គការលើកលែងទោសអន្តរជាតិ (Amnesty International) រកឃើញថា មានការកើនឡើងនូវករណីបង្ក្រាបលើសេរីភាពបញ្ចេញមតិ ការប្រមូលផ្ដុំ និងការជួបជុំដោយសន្តិវិធី នៅមុនពេលបោះឆ្នោតឃុំ-សង្កាត់ ឆ្នាំ២០១៧ និងការបោះឆ្នោតថ្នាក់ជាតិឆ្នាំ២០១៨ នៅកម្ពុជា។
របាយការណ៍ស្តីអំពីស្ថានភាពរំលោភសិទ្ធិមនុស្សក្នុងពិភពលោក ឆ្នាំ២០១៦-២០១៧ ដែលបានចេញផ្សាយកាលពីថ្ងៃពុធ ទី២២ ខែកុម្ភៈ ឲ្យដឹងថា មានការកើនឡើងនូវករណីរំលោភបំពានប្រព័ន្ធយុត្តិធម៌ពីសំណាក់អាជ្ញាធរកម្ពុជា ហើយថា កងកម្លាំងប្រដាប់អាវុធនៅតែបន្តរុកកួនដាក់ទោសទណ្ឌប្រឆាំងអង្គការសង្គមស៊ីវិល និងបំបិទមាត់ក្រុមអ្នករិះគន់រដ្ឋាភិបាល។
របាយការណ៍បន្តថា ក្រុមអ្នកការពារសិទ្ធិមនុស្សត្រូវបានចាប់ខ្លួន និងឃុំខ្លួនមុនពេលសវនាការ ខណៈដែលគណបក្សប្រឆាំងក្លាយជាគោលដៅនៃការធ្វើទុក្ខបុកម្នេញផ្នែកនយោបាយ ហើយសកម្មជនរបស់គណបក្សប្រឆាំងត្រូវបានកាត់ទោសឲ្យជាប់ពន្ធនាគាររយៈពេលយូរ។ បន្ថែមពីនេះ មេដឹកនាំរបស់គណបក្សប្រឆាំងក៏កំពុងទទួលរងនូវចំណាត់ការផ្លូវច្បាប់ថ្មីៗបន្ថែមទៀតផងដែរ។
របាយការណ៍ក៏បានសង្កត់ធ្ងន់ដែរថា អ្នកវិភាគសង្គមដ៏ល្បីល្បាញ គឺលោកបណ្ឌិត កែម ឡី ត្រូវបានឃាតកបាញ់សម្លាប់ ហើយថា បញ្ហានិទណ្ឌភាពនៅតែបន្តកើតមានដដែលក្នុងសង្គមកម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។