សហគមន៍មានទំនាស់ដីធ្លីដ៏រ៉ាំរ៉ៃនៅបុរីកីឡា ប្រកាសធ្វើយុទ្ធនាការថ្ងៃច័ន្ទពណ៌ខ្មៅសប្ដាហ៍ទី៤០ នៅថ្ងៃទី៦ ខែកុម្ភៈ ឆ្នាំ២០១៧ ដើម្បីទាមទារយុត្តិធម៌ឲ្យសកម្មជនសិទ្ធិមនុស្ស មន្ត្រី គ.ជ.ប ឃាតកម្មលើលោកបណ្ឌិត កែម ឡី និងដោះស្រាយបញ្ចប់រឿងជម្លោះដីធ្លីនៅសហគមន៍របស់ពួកគេ។ ចំណែកសហគមន៍បឹងកក់ ប្រកាសថា មិនបានរៀបចំយុទ្ធនាការថ្ងៃច័ន្ទពណ៌ខ្មៅសប្ដាហ៍ទី៤០ ឡើយ ដោយសារតែជាប់រវល់នឹងភារកិច្ចផ្សេង។
សហគមន៍បុរីកីឡាដែលមានចំនួនជាង ១០គ្រួសារមិនទាន់ទទួលបានសំណង និងអ្នកសហគមន៍មកពីភ្នំបាត មួយចំនួនទៀត នឹងសហការគ្នាបន្តធ្វើយុទ្ធនាការថ្ងៃច័ន្ទពណ៌ខ្មៅសប្ដាហ៍ទី៤០ នៅសហគមន៍របស់ពួកគេ ដើម្បីទាមទាររកយុត្តិធម៌សម្រាប់អ្នកដែលត្រូវបានតុលាការឃុំខ្លួន និងបាញ់សម្លាប់ដោយអយុត្តិធម៌។
តំណាងសហគមន៍បុរីកីឡា លោកស្រី សរ ស៊ន ថ្លែងប្រាប់អាស៊ីសេរីនៅថ្ងៃទី៥ កុម្ភៈ ថា ថ្វីត្បិតតែគ្មានលុយកាក់ដើម្បីដើរហែក្បួនយុទ្ធនាការថ្ងៃច័ន្ទពណ៌ខ្មៅ ប៉ុន្តែពួកគេនឹងរៃអង្គាសគ្នាបន្តិចបន្តួច ដើម្បីធ្វើយុទ្ធនាការនេះនៅកន្លែងសហគមន៍តែម្ដង ដើម្បីទាមទារដោះលែងមន្ត្រីសមាគមអាដហុក (ADHOC) មន្ត្រី គ.ជ.ប សកម្មជនដីធ្លីបឹងកក់ និងពន្លឺយុត្តិធម៌លើឃាតកម្មលើបណ្ឌិត កែម ឡី៖ « ពួកខ្ញុំ ដែលនៅសេសសល់ មិនទាន់ ទទួលបាន សំណង ប្រមូលគ្នា និងអ្នកផ្សេងៗមកពីភ្នំបាត គាត់ស្នាក់នៅកន្លែង គាត់ចូលរួមដែរ »។
រយៈពេលកន្លងទៅ មន្ត្រីសមាគមអាដហុក បួនរូបរួមមាន លោក យី សុខសាន្ដ លោក នី សុខា លោក ណៃ វ៉ង់ដា និងអ្នកស្រី លឹម មុន្នី រួមទាំងអគ្គលេខាធិការរង គ.ជ.ប លោក នី ចរិយា ដែលត្រូវតុលាការបន្តឃុំខ្លួនអស់រយៈពេលជាច្រើនខែ ពីបទចោទប្រកាន់សូកប៉ាន់សាក្សីក្នុងសំណុំរឿងសញ្ចារកម្ម ដែលចោទលោក កឹម សុខា មានអាស្រូវស្នេហាជាមួយអ្នកនាង ខុម ចាន់តារាទី ហៅស្រីមុំ ត្រូវបានមជ្ឈដ្ឋានទូទៅទាំងជាតិ និងអន្តរជាតិ ជាពិសេសអ្នកសហគមន៍ទំនាស់ដីធ្លីបុរីកីឡា និងបឹងកក់ គិតថាជារឿងនយោបាយ ដែលជាការរៀបចំរបស់បក្សកាន់អំណាចក្នុងគោលបំណងបំបាក់ស្មារតីអ្នកលើកកម្ពស់សិទ្ធិមនុស្ស ការពារសិទ្ធិមនុស្ស និងអ្នកទាមទារសិទ្ធិសេរីភាព។
ប៉ុន្តែមន្ត្រីរដ្ឋាភិបាលវិញបានទាត់ចោលការលើកឡើងនេះ ហើយបកស្រាយថា ជារឿងអនុវត្តច្បាប់ដើម្បីលើកកម្ពស់នីតិរដ្ឋ។ លើសពីនេះ រដ្ឋាភិបាលក៏បានចាត់ទុកការរៀបចំយុទ្ធនាការថ្ងៃច័ន្ទពណ៌ខ្មៅ ថាជាចរិតរបស់ក្រុមឧទ្ទាម ឬបដិវត្តន៍ពណ៌ដើម្បីផ្ដួលរំលំរដ្ឋាភិបាលទៅវិញ។
ទោះជាយ៉ាងណា យុទ្ធនាការថ្ងៃច័ន្ទពណ៌ខ្មៅក៏ទាមទារឲ្យអាជ្ញាធររដ្ឋាភិបាលបញ្ចេញកាមេរ៉ានៅក្នុងហាងលក់ទំនិញស្តារម៉ាត (Star Mart) កាល់តិច (Caltext) ក្បែរស្តុបបូកគោ ជាទីដែលលោកបណ្ឌិត កែម ឡី អ្នកវិភាគនយោបាយដ៏ល្បីនៅកម្ពុជា ត្រូវបានជនសង្ស័យឈ្មោះ អឿត អាង ហៅ ជួប សម្លាប់ បាញ់សម្លាប់កាលពីថ្ងៃទី១០ ខែកក្កដា ឆ្នាំ២០១៦ បន្ទាប់ពីជនសង្ស័យនេះត្រូវបានគេចោទថា ជាឃាតកក្លែងក្លាយ។ ជាមួយគ្នានោះ ថ្ងៃច័ន្ទពណ៌ខ្មៅ ក៏ទាមទារឲ្យដោះលែងអ្នកស្រី ទេព វន្នី តំណាងសហគមន៍ទំនាស់ដីធ្លីនៅបឹងកក់ ដែលតុលាការកំពុងឃុំខ្លួនអស់ជិត ២០០ថ្ងៃ ឲ្យមានសេរីភាពវិញ។
មេធាវីអង្គការលីកាដូ (LICADHO) ដែលការពារក្ដីឲ្យអ្នកស្រី ទេព វន្នី អ្នកស្រី សាម សុគន្ធា អះអាងថា ស្របពេលកូនស្រីរបស់អ្នកស្រី ទេព វន្នី ទើបទទួលការវះកាត់ពោះវៀនដុះខ្នែង និងកំពុងរង់ចាំម្ដាយចេញពីពន្ធនាគារវិញ គឺអំពាវនាវឲ្យតុលាការក្រុងភ្នំពេញ បើកសវនាការជំនុំជម្រះក្ដីសំណុំរឿងរបស់អ្នកស្រី ទេព វន្នី ឡើងវិញឲ្យបានឆាប់ បន្ទាប់ពីចៅក្រមប្រកាសផ្អាកសវនាការនេះកាលពីថ្ងៃទី៣ កុម្ភៈ ដោយគ្មានកាលបរិច្ឆេទ៖ « ស្នើសុំលោកចៅក្រមក្នុងសវនាការហើយ ថាគាត់មានសុខភាពល្អហើយ ឲ្យគាត់ជួយជំនុំជម្រះក្ដីឲ្យបានឆាប់ »។
តំណាងសហគមន៍បឹងកក់ លោកស្រី បូវ សោភា អះអាងថា ថ្វីត្បិតតែសហគមន៍លោកស្រីមិនបានរៀបចំយុទ្ធនាការថ្ងៃច័ន្ទពណ៌ខ្មៅសប្ដាហ៍ទី៤០ ដោយសាររវល់ចូលរួមសិក្ខាសាលានិយាយអំពីយេនឌ័រស្ត្រីនៅខេត្ត ប៉ុន្តែសហគមន៍បឹងកក់ មិនបោះបង់ចោលការធ្វើយុទ្ធនាការនេះឡើយ៖ « យើងនៅតែ បន្តធ្វើ យុទ្ធនាការថ្ងៃច័ន្ទពណ៌ខ្មៅ យើងផ្អាកពីរសប្ដាហ៍ តែ មិនមែន មានន័យថា យើងឈប់ទេ។ អ៊ីចឹងយើងនៅតែបន្ត រហូត មានការ ដោះលែងអ្នកស្រី ទេព វន្នី ក៏ដូចជាមន្ត្រីសង្គមស៊ីវិល »។
មន្ត្រីសង្គមស៊ីវិលតែងតែជំរុញឲ្យរដ្ឋាភិបាលដោះស្រាយចំពោះការទាមទាររបស់សហគមន៍ដីធ្លី ដែលតែងតែរៀបចំយុទ្ធនាការថ្ងៃច័ន្ទពណ៌ខ្មៅ និងមិនត្រូវទុកបណ្ដោយឲ្យការទាមទារនេះកើតទៀតឡើយ ព្រោះវានឹងធ្វើឲ្យមានការរំលោភសិទ្ធិពលរដ្ឋកាន់តែធ្ងន់ធ្ងរ ហើយមុខមាត់ប្រទេសជាតិក៏កាន់តែរងការអាម៉ាស់ខ្លាំងនៅលើឆាកជាតិ និងអន្តរជាតិដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។