សហគមន៍ទំនាស់ដីធ្លីតំបន់បុរីកីឡា នឹងបន្តធ្វើយុទ្ធនាការ "ថ្ងៃច័ន្ទពណ៌ខ្មៅ" នៅថ្ងៃច័ន្ទ ទី៣០ ខែមករា ស្អែកនេះទៀត ដើម្បីទាមទារឱ្យតុលាការដោះលែងមន្ត្រីសិទ្ធិមនុស្ស មន្ត្រី គ.ជ.ប សកម្មជនដីធ្លី និងរកយុត្តិធម៌ជូនបណ្ឌិត កែម ឡី។ ចំណែកឯសហគមន៍ដីធ្លីតំបន់បឹងកក់វិញ សម្រេចផ្អាកយុទ្ធនាការនៅថ្ងៃស្អែកនេះ ព្រោះពួកគេមានគម្រោងដាក់ញត្តិតាមស្ថានទូតនានា នៅថ្ងៃទី១ ខែកុម្ភៈ ដើម្បីស្នើសុំឱ្យអង្គទូតទាំងនោះ ឱ្យតាមដានសវនាការអ្នកស្រី ទេព វន្នី នៅថ្ងៃសុក្រ សប្ដាហ៍ក្រោយ។
តំណាងសហគមន៍បុរីកីឡា លោកស្រី សរ ស៊ន បញ្ជាក់ប្រាប់អាស៊ីសេរី នៅថ្ងៃទី២៩ ខែមករា ថា ក្រុមពលរដ្ឋមានទំនាស់ដីធ្លីប្រមាណ ២០នាក់ នឹងប្រមូលផ្តុំគ្នាក្នុងសហគមន៍បុរីកីឡា នៅព្រឹកថ្ងៃទី៣០ ខែមករា ដើម្បីទាមទារឱ្យរដ្ឋាភិបាលអនុវត្តច្បាប់ឱ្យបានត្រឹមត្រូវទៅលើសកម្មជនសិទ្ធិមនុស្ស មន្ត្រី គ.ជ.ប និងសកម្មជនដីធ្លី ព្រមទាំងបង្ហាញកាមេរ៉ាសុវត្ថិភាពនៅហាងស្តារម៉ាត កាល់តិច ស្តុបបូកគោ ដើម្បីឱ្យសាធារណជនបានឃើញវីដេអូនៃការបាញ់សម្លាប់បណ្ឌិត កែម ឡី៖ « យើងនៅតែទាមទារ ដោយសារតែយើងគិតថា បើមិនមានតុលាការស្រុកខ្មែរ ក៏មានតុលាការក្រៅប្រទេសនឹងជួយដល់ប្រជាពលរដ្ឋខ្មែរដែរ។ បើយើងនិយាយពីតុលាការស្រុកខ្មែរវិញ សូន្យហើយរាល់ថ្ងៃនេះ។ គាត់មិនធ្វើអ្វីបម្រើប្រជាពលរដ្ឋ។ គាត់មិនធ្វើអ្វីបម្រើប្រជាពលរដ្ឋ គាត់មិនធ្វើអ្វីតាមឆន្ទៈពិតប្រាកដទេ។ គាត់ធ្វើតាមតែមេបញ្ជា តាមតែបក្ស តាមតែបុគ្គលម្នាក់ បញ្ជាមកថាឆ្វេង ឆ្វេង ថាស្តាំ ស្តាំ។ ចង់ចាប់អ្នកណាក៏បាន ចង់ដាក់គុកអ្នកណាក៏បាន ចង់ដោះលែងអ្នកណាក៏បាន »។
មិនខុសពីសប្ដាហ៍មុនៗឡើយ យុទ្ធនាការថ្ងៃច័ន្ទពណ៌ខ្មៅសប្ដាហ៍ទី៣៩ របស់អ្នកបុរីកីឡា មានគោលបំណងទាមទារឱ្យរដ្ឋាភិបាលទម្លាក់ចោលការចោទប្រកាន់ និងដោះលែងមន្ត្រីសិទ្ធិមនុស្សសមាគមអាដហុក (ADHOC) ៤រូប និងអគ្គលេខាធិការរង គ.ជ.ប លោក នី ចរិយា ដែលត្រូវបានតុលាការចោទប្រកាន់ពីបទសូកប៉ាន់សាក្សី និងបទសមគំនិតសូកប៉ាន់សាក្សី ពាក់ព័ន្ធការចោទប្រកាន់រឿងអាស្រូវស្នេហារវាង លោក កឹម សុខា និងនាង ខុម ចាន់តារាទី ហៅ ស្រីមុំ។ ពួកគេក៏ទាមទារឱ្យរដ្ឋាភិបាលពន្លឿនការរកយុត្តិធម៌ជុំវិញឃាតកម្មលើលោកបណ្ឌិត កែម ឡី ដែលត្រូវឃាតកបាញ់សម្លាប់កាលខែកក្កដា កន្លងទៅ។ បន្ថែមពីលើនេះ ពួកគេអំពាវនាវឱ្យអាជ្ញាធរដោះលែងសកម្មជនដីធ្លីតំបន់បឹងកក់ អ្នកស្រី ទេព វន្នី ដែលត្រូវបានចាប់ខ្លួន បន្ទាប់ពីរៀបចំយុទ្ធនាការថ្ងៃចន្ទពណ៌ខ្មៅ កាលពីពាក់កណ្ដាលខែសីហា កន្លងទៅ។ ចំណែកឯសហគមន៍ដីធ្លីតំបន់បឹងកក់វិញ បានសម្រេចផ្អាកយុទ្ធនាការថ្ងៃច័ន្ទពណ៌ខ្មៅ សប្តាហ៍ទី៣៩ នេះ។
តំណាងសហគមន៍បឹងកក់ លោកស្រី បូវ សោភា ប្រាប់ពីមូលហេតុនៃការផ្អាកនេះថា ដោយសារមានសមាជិកសហគមន៍ខ្លះមានធុរៈផ្ទាល់ខ្លួន ហើយម្យ៉ាងដោយសារសហគមន៍គ្រោងដង្ហែញត្តិដាក់តាមស្ថានទូតប្រទេសប្រជាធិបតេយ្យនានា នៅទីក្រុងភ្នំពេញ នៅថ្ងៃទី១ ខែកុម្ភៈ ដើម្បីសុំឱ្យអង្គទូតទាំងនោះចូលរួមតាមដានសវនាការរបស់អ្នកស្រី ទេព វន្នី នៅសាលាដំបូងរាជធានីភ្នំពេញ ដែលនឹងប្រព្រឹត្តទៅនៅថ្ងៃទី៣ ខែកុម្ភៈ ខាងមុខនេះ។ លោកស្រី បូវ សោភា សង្កត់ធ្ងន់ថា បើសិនជាតុលាការសម្រេចដោះលែង អ្នកស្រី ទេព វន្នី នោះ សហគមន៍បឹងកក់ នឹងបញ្ឈប់យុទ្ធនាការថ្ងៃច័ន្ទពណ៌ខ្មៅ៖ « ពួកខ្ញុំពេលនេះ គឺចង់បានសេរីភាពអ្នកស្រី ទេព វន្នី ច្រើនលើសលប់ តែសម្រាប់មន្ត្រីសង្គមស៊ីវិល គឺពួកគាត់ស្ថិតក្នុងការចរចារបស់គណបក្សទាំងពីរ។ អ៊ីចឹងខ្ញុំគិតថា បើសិនជាគណបក្សទាំងពីរគាត់ចរចាគ្នាត្រូវ ពួកគាត់នឹងមានសេរីភាព មិនមែនដោយសារតែពួកខ្ញុំធ្វើយុទ្ធនាការឲ្យមានការដោះលែងទេ ទោះពួកខ្ញុំធ្វើរហូតដល់ស្លាប់ខ្លួនទៀត បើសិនជាគណបក្សទាំងពីរមិនចរចាត្រូវគ្នាទេ ក៏ពួកគាត់ ( មន្ត្រីអង្គការសង្គមស៊ីវិល ) មិនមានសេរីភាពដែរ »។
គិតត្រឹមថ្ងៃទី២៩ ខែមករា ឆ្នាំ២០១៧ តំណាងសហគមន៍ដីធ្លីតំបន់បឹងកក់ អ្នកស្រី ទេព វន្នី បានជាប់ពន្ធនាគារអស់រយៈពេល ១៦៦ថ្ងៃមកហើយ ពាក់ព័ន្ធនឹងសំណុំរឿងហិង្សាក្បែរផ្ទះនាយករដ្ឋមន្ត្រីកាលពីឆ្នាំ២០១៣ កន្លងទៅ។ ក្រៅពីនេះ សកម្មជនដីធ្លីរូបនេះ និងអ្នកបឹងកក់ ៣រូបទៀត ក៏ត្រូវបានតុលាការក្រុងភ្នំពេញ កាត់ទោសឱ្យជាប់ពន្ធនាគារក្នុងមា្នក់ៗចំនួន ៦ខែ ពីបទប្រមាថ និងប្រឆាំងអ្នករាជការសាធារណៈ ប្រព្រឹត្តទៅនៅមុខសាលារាជធានីភ្នំពេញ កាលពីឆ្នាំ២០១១ កន្លងទៅ។
យុទ្ធនាការថ្ងៃច័ន្ទពណ៌ខ្មៅ ត្រូវបានអាជ្ញាធរក្រុងភ្នំពេញ និងមន្ត្រីរដ្ឋាភិបាលចាត់ទុកថា ជាទម្រង់នៃបដិវត្តន៍ពណ៌ ហើយតែងប្រកាសប្រឆាំងនឹងយុទ្ធនាការមួយនេះ។ អាជ្ញាធរតែងចុះបង្ក្រាប ឃាត់ខ្លួន និងឃុំខ្លួន អ្នកធ្វើយុទ្ធនាការនេះជាបន្តបន្ទាប់ រាប់តាំងពីពលរដ្ឋ សកម្មជនដីធ្លី រហូតដល់មន្ត្រីអង្គការសង្គមស៊ីវិល។
ប្រធានគ្រប់គ្រងផ្នែកអង្កេតនៃអង្គការសិទ្ធិមនុស្សលីកាដូ (LICADHO) លោក អំ សំអាត ថ្លែងថា យុទ្ធនាការថ្ងៃចន្ទពណ៌ខ្មៅ មិនមែនជាបដិវត្តន៍ពណ៌នោះទេ ប៉ុន្តែជាទម្រង់នៃការបញ្ចេញមតិរបស់ពលរដ្ឋដែលធានាដោយច្បាប់ជាតិ និងអន្តរជាតិ៖ « កន្លងមកគាត់ធ្វើតែនៅក្នុងមូលដ្ឋានរបស់គាត់ ក្នុងសហគមន៍របស់គាត់។ អ៊ីចឹងគួរតែទុកឱកាស ពីព្រោះនេះជាសិទ្ធិសេរីភាពរបស់គាត់ ជាការសម្ដែងមតិរបស់គាត់។ ដូច្នេះអាជ្ញាធរត្រូវឈ្វេងយល់ពីសិទ្ធិសេរីភាពក្នុងការបញ្ចេញមតិ ហើយនិងបទល្មើស។ កុំគ្រាន់តែគេសម្ដែងមតិ យើងទៅបង្ក្រាប អាហ្នឹងវាជាការរំលោភសិទ្ធិមនុស្សយ៉ាងធ្ងន់ធ្ងរ »។
លោក អំ សំអាត យល់ឃើញថា រដ្ឋាភិបាលគួរពិចារណាទៅលើការទាមទារ និងដោះស្រាយបញ្ហាទាំងនោះវិញ ជាជាងការប្រឹងបំបិទមាត់ពលរដ្ឋ ពីព្រោះវាប៉ះពាល់ដល់សិទ្ធិពលរដ្ឋធ្ងន់ធ្ងរ និងបំផ្លាញកេរ្តិ៍ឈ្មោះរបស់ខ្លួននៅលើឆាកអន្តរជាតិ ថាជារដ្ឋាភិបាលមិនគោរពសិទ្ធិមនុស្ស៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។