មជ្ឈមណ្ឌលសិទ្ធិមនុស្សកម្ពុជា (CCHR) ស្នើឲ្យរដ្ឋាភិបាលបង្កើតយន្តការថ្នាក់ជាតិ ដើម្បីធានាសិទ្ធិសេរីភាពឲ្យបានពេញលេញដល់ស្ត្រីដែលប្រឡូកក្នុងសកម្មភាពការពារសិទ្ធិមនុស្ស។
អង្គការនេះ ក៏ស្នើឲ្យបណ្ដាអង្គការសង្គមស៊ីវិល និងស្ថាប័នអន្តរជាតិដទៃទៀត ដែលធ្វើការជាមួយស្ត្រី និងអ្នកការពារសិទ្ធិមនុស្ស បញ្ចូលកម្មវិធីយេនឌ័រទៅក្នុងការអនុវត្តគម្រោងរបស់ខ្លួន ដើម្បីលើកស្ទួយអ្នកការពារសិទ្ធិមនុស្សជាស្ត្រី។ សំណើរបស់អង្គការសង្គមស៊ីវិល ធ្វើឡើងនៅខណៈអង្គការនេះសង្កេតឃើញថា ស្ត្រីជាអ្នកការពារសិទ្ធិមនុស្ស នៅតែប្រឈមនឹងការរឹតត្បិតសិទ្ធិសេរីភាពនៅពេលធ្វើសកម្មភាពការពារសិទ្ធិរបស់ពួកគេ។
ក្នុងកំណត់ត្រាសង្ខេបស្ដីពីស្ថានភាពអ្នកការពារសិទ្ធិមនុស្សស្ត្រីនៅកម្ពុជា ក្នុងឆ្នាំ២០១៥ ចេញផ្សាយនៅថ្ងៃទី២៧ ខែធ្នូ មជ្ឈមណ្ឌលសិទ្ធិមនុស្សកម្ពុជា លើកឡើងថា រដ្ឋាភិបាលមិនទាន់មានគោលនយោបាយ ឬចំណាត់ការច្បាស់លាស់ណាមួយ ដើម្បីធានាដល់សិទ្ធិសេរីភាពរបស់សកម្មជនការពារសិទ្ធិមនុស្សទូទៅ រួមទាំងស្ត្រីនៅឡើយ។
អ្នកសម្របសម្រួលគម្រោងស្ដីពីការការពារសេរីភាពជាមូលដ្ឋាន នៃមជ្ឈមណ្ឌលសិទ្ធិមនុស្សកម្ពុជា កញ្ញា ឆាយ ឈុនលី កត់សម្គាល់ឃើញថា ស្ថានភាពរបស់ស្ត្រីជាអ្នកការពារសិទ្ធិមនុស្សនៅកម្ពុជា នៅតែមិនទាន់មានភាពប្រសើរនៅឡើយ៖ «គាត់នៅតែរងការគំរាមកំហែងតាមរយៈការប្រើប្រាស់ប្រព័ន្ធតុលាការ ឃើញថាស្ថានភាពហ្នឹងនៅតែកើតឡើងច្រើន។ ហើយមួយទៀត ទាក់ទងនឹងរឿងផ្ទាល់ខ្លួនរបស់គាត់វិញ យើងឃើញថា ស្ត្រីអ្នកការពារសិទ្ធិមនុស្សរងសម្ពាធច្រើនពីគ្រួសារដែរ។ អ្នកខ្លះគាត់រងការលែងលះពីក្រុមគ្រួសារគាត់ទៀត។ យើងមើលទៅសម្ពាធដែលគាត់រងហ្នឹង វាមានតាំងពីខាងគ្រួសារផង និងពីសំណាក់រដ្ឋាភិបាលផង នៅពេលដែលគាត់ដើរតួជាស្ត្រីអ្នកការពារសិទ្ធិមនុស្សហ្នឹង»។
អនុសាសន៍មួយចំនួនដែលមជ្ឈមណ្ឌលសិទ្ធិមនុស្សកម្ពុជា ស្នើដល់រដ្ឋាភិបាល រួមមាន បញ្ឈប់ការរឹតត្បិតសិទ្ធិសេរីភាពរបស់ស្ត្រីជាអ្នកការពារសិទ្ធិមនុស្ស ជៀសវាងការប្រើពាក្យអសុរោះទៅលើអ្នកការពារសិទ្ធិមនុស្សជាស្ត្រី និងស្នើឲ្យបង្កើតស្ថាប័នសិទ្ធិមនុស្សជាតិ ជាដើម។
ក្រៅពីនេះ មជ្ឈមណ្ឌលសិទ្ធិមនុស្សកម្ពុជា ស្នើឲ្យរដ្ឋាភិបាលបញ្ឈប់ការយាយីតាមប្រព័ន្ធតុលាការលើអ្នកការពារសិទ្ធិមនុស្សទាំងអស់ និងដោះលែងជាបន្ទាន់ដោយគ្មានលក្ខខណ្ឌ នូវសកម្មជនដែលកំពុងជាប់ឃុំដោយសារហេតុផលនយោបាយ។ អង្គការនេះ ក៏ស្នើឲ្យរដ្ឋាភិបាលបង្កើតយន្តការ និងកម្មវិធីការពារថ្នាក់ជាតិដល់អ្នកការពារសិទ្ធិមនុស្សដែលប្រឈមនឹងហានិភ័យ។
ឆ្លើយតបនឹងអនុសាសន៍របស់មជ្ឈមណ្ឌលសិទ្ធិមនុស្សកម្ពុជា អនុប្រធានគណៈកម្មការសិទ្ធិមនុស្ស ទទួលពាក្យបណ្ដឹង អង្កេត និងទំនាក់ទំនងរដ្ឋសភា ព្រឹទ្ធសភា និងជាអ្នកនាំពាក្យគណបក្សប្រជាជនកម្ពុជា លោក សុខ ឥសាន លើកឡើងថា ក្របខ័ណ្ឌច្បាប់នៅកម្ពុជា នាពេលបច្ចុប្បន្ន គ្រប់គ្រាន់ហើយសម្រាប់ការពារសិទ្ធិសេរីភាពរបស់សកម្មជនសិទ្ធិមនុស្ស។
បន្ថែមលើនេះ លោក សុខ ឥសាន បដិសេធថា មិនមានការគាបសង្កត់លើអ្នកការពារសិទ្ធិមនុស្សជាស្ត្រីនោះទេ។ លោកបន្ទោសអង្គការសង្គមស៊ីវិលមួយចំនួន ដោយមិនសំដៅចំពោះអង្គការណាមួយទេ ថាបានធ្វើសកម្មភាពតវ៉ាទាមទារសិទ្ធិដោយមិនបានគោរពតាមនីតិវិធីត្រឹមត្រូវ ទើបនៅពេលខ្លះបណ្ដាលឲ្យមានការប៉ះទង្គិចរវាងសមត្ថកិច្ច និងសកម្មជនសិទ្ធិមនុស្សមួយចំនួន៖ «ខ្ញុំមើលទៅវាដូចជាអត់មានបញ្ហាអីដែលគួរតែចោទថា គាបសង្កត់ទេ ប៉ុន្តែអង្គការនីមួយៗហ្នឹងសុំធ្វើម៉េចឲ្យបានត្រឹមត្រូវទៅតាមគោលការណ៍ ដែលមានចែងនៅក្នុងរដ្ឋធម្មនុញ្ញ ធ្វើអីទៅតាមនីតិវិធីនៃច្បាប់ ដែលមានជាធរមាននៅកម្ពុជា អាហ្នឹងបានយើងអាចធានាបាននូវសុខដុមរមនាជាមួយគ្នា ហើយបើសិនណាជាយើងធ្វើអីមិនមាននីតិវិធីត្រឹមត្រូវទេ អាហ្នឹងវាចេះតែកើតមានហើយការប៉ះទង្គិចគ្នា»។
សកម្មជនដីធ្លីតំបន់បឹងកក់ អ្នកស្រី ទេព វន្នី លើកឡើងពីបញ្ហាប្រឈមមួយចំនួនដែលខ្លួន និងស្ត្រីជាសកម្មជនដីធ្លីតំបន់បឹងកក់មួយចំនួនបានជួបប្រទះ ក្នុងសកម្មភាពតវ៉ាទាមទារសិទ្ធិដីធ្លីរបស់ខ្លួនកន្លងទៅ៖ «មិនត្រឹមតែប្រើអំពើហិង្សាមកលើជាស្ត្រីឲ្យបែកក្បាល រលូតកូន បាក់ដៃ ឬក៏ឆក់ឲ្យសន្លប់ ឬក៏ចាប់យើងដាក់ឃុំខ្លួននៅស្នងការក្រុងម្ដងហើយម្ដងទៀត ឬក៏យកយើងទៅដាក់នៅពន្ធនាគារម្ដងហើយម្ដងទៀតទេ យើងឃើញថា រហូតដល់គាត់មានការវាយ អាក្រាតសម្លៀកបំពាក់យើងអីជាដើមទៀតផង។ មួយទៀត ក៏យើងជួបប្រទះនូវផលលំបាកមិនសូវមានពេលវេលាគ្រប់គ្រាន់នៅក្នុងការផ្ដល់ភាពកក់ក្ដៅទៅដល់ក្រុមគ្រួសារ។ ហើយយើងក៏មានបញ្ហាច្រើនពាក់ព័ន្ធទៅនឹងបញ្ហាជីវភាពអីជាដើម។ សម្រាប់បញ្ហាផ្លូវចិត្ដជាមួយក្រុមគ្រួសារយើង ក៏យើងមានការប៉ះទង្គិចគ្នាច្រើនដែរ រហូតដល់មានស្ត្រីមួយចំនួននៅសហគមន៍បឹងកក់យើងហ្នឹង មានការសម្រេចចិត្តលែងលះគ្នាអី ជាដើម»។
ពាក់ព័ន្ធនឹងការរឹតត្បិតសិទ្ធិសេរីភាពរបស់សកម្មជនសិទ្ធិមនុស្សជាស្ត្រី កាលពីខែសីហា លោកនាយករដ្ឋមន្ត្រី ហ៊ុន សែន ធ្លាប់រងការរិះគន់ពីសំណាក់អង្គការសង្គមស៊ីវិលជាង ៥០ ធ្វើការងារការពារសិទ្ធិស្ត្រី បន្ទាប់ពីលោកបានហៅស្ត្រីម្នាក់ដោយមិនបញ្ចេញឈ្មោះថា «ញី» និង «មីស្រី» ដែលត្រូវបានចោទប្រកាន់ថា ប្រើអំពើហិង្សាលើសន្តិសុខក្នុងអំឡុងពេលបាតុកម្មនៅទីលានប្រជាធិបតេយ្យ កាលពីខែកក្កដា ឆ្នាំ២០១៤៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។