ការចរចាគ្នារវាងរដ្ឋាភិបាលកម្ពុជា និងរដ្ឋាភិបាលអូស្ត្រាលី ក្នុងការបញ្ជូនជនភៀសខ្លួនអូស្ត្រាលី មកនៅកម្ពុជា នោះ ត្រូវបានអង្គការសិទ្ធិមនុស្ស និងអ្នកច្បាប់លើកឡើងថា កម្ពុជា កំពុងមានវិបត្តិសិទ្ធិមនុស្សដោយខ្លួន ដូចនេះរដ្ឋាភិបាលកម្ពុជា មិនអាចទទួលយកជនភៀសខ្លួនទាំងនោះឲ្យមកតាំងទីលំនៅក្នុងប្រទេសកម្ពុជា បានឡើយ ពីព្រោះថា កម្ពុជា មិនមែនជាកន្លែងមានសុវត្ថិភាពសម្រាប់ជនភៀសខ្លួនទេ។
គណៈកម្មាធិការប្រព្រឹត្តិកម្មនៃអង្គការសមាគមការពារសិទ្ធិមនុស្សកម្ពុជា (CHRAC) ជាសម្ព័ន្ធភាពនៃអង្គការមិនមែនរដ្ឋាភិបាលចំនួន ២១អង្គការ ក្នុងវិស័យសិទ្ធិមនុស្ស លទ្ធិប្រជាធិបតេយ្យ និងនីតិរដ្ឋ បានចេញសេចក្ដីថ្លែងការណ៍មួយនៅថ្ងៃទី៤ មិថុនា ដោយសម្ដែងពីការព្រួយបារម្ភយ៉ាងខ្លាំងអំពីការទទួលជនភៀសខ្លួនអូស្ត្រាលី មកនៅកម្ពុជា។
សេចក្ដីថ្លែងការណ៍នោះ អំពាវនាវដល់រដ្ឋាភិបាលអូស្ត្រាលី ពិចារណាឡើងវិញលើកិច្ចព្រមព្រៀងជនភៀសខ្លួន ដែលបានព្រមព្រៀងជាមួយរដ្ឋាភិបាលកម្ពុជា។ កិច្ចព្រមព្រៀងនេះបំពារបំពានលើអនុសញ្ញាជនភៀសខ្លួន ដោយសារតែវាមិនមានមធ្យោបាយណាមួយ ដែលរដ្ឋាភិបាលអូស្ត្រាលី អាចធានាថា ខណៈដែលជនភៀសខ្លួនទាំងនេះមកដល់កម្ពុជា ពួកគេនឹងទទួលបានការការពារសិទ្ធិមនុស្សមូលដ្ឋាន ដូចដែលមាននៅប្រទេសអូស្ត្រាលី។
ប្រធានលេខាធិការដ្ឋានគណៈកម្មាធិការប្រព្រឹត្តិកម្មនៃអង្គការសមាគមការពារសិទ្ធិមនុស្សកម្ពុជា លោក សួន ប៊ុនស័ក្ដិ មានប្រសាសន៍ថា បើសិនជាអូស្ត្រាលី បញ្ជូនជនភៀសខ្លួនមកកម្ពុជា មែននោះ សិទ្ធិជនភៀសខ្លួនទាំងនោះនឹងមិនត្រូវបានការពារទេ នៅគ្រាដែលកម្ពុជា កំពុងតែដោះស្រាយបញ្ហារំលោភសិទ្ធិមនុស្សមិនបានផងនោះ។
«សំឡេង»
វិទ្យុអាស៊ីសេរី មិនអាចទាក់ទងអ្នកនាំពាក្យក្រសួងការបរទេស ដើម្បីសុំបំភ្លឺអំពីបញ្ហានេះបានទេនៅថ្ងៃទី៤ មិថុនា។
ប៉ុន្តែ លោក កុយ គួង បានឲ្យដឹងកាលពីថ្ងៃទី៣ មិថុនា ថា កម្ពុជា មិនទាន់សម្រេចលើសំណើទទួលយកជនភៀសខ្លួន ដែលកំពុងជាប់ឃុំនៅប្រទេសអូស្ត្រាលី មករស់នៅកម្ពុជា នៅឡើយទេ ប៉ុន្តែជាគោលការណ៍ កម្ពុជា ព្រមទទួលយកជនភៀសទាំងឡាយណាដែលស្ម័គ្រចិត្តមករស់នៅកម្ពុជា តែប៉ុណ្ណោះ។
«សំឡេង»
ប្រធានគណៈកម្មាធិការពង្រឹងវិស័យច្បាប់ ដើម្បីការពារសិទ្ធិមនុស្សនៅកម្ពុជា លោកបណ្ឌិត ហៀង រិទ្ធី មានប្រសាសន៍ថា នៅក្នុងបរិបទនេះ រដ្ឋាភិបាលមិនត្រូវទទួលយកជនភៀសខ្លួនមកនៅកម្ពុជា ទេ ទោះបីជាការមកដោយស្ម័គ្រចិត្ត ឬមិនស្ម័គ្រចិត្តនោះក្ដី ពីព្រោះថា កម្ពុជា កំពុងជួបបញ្ហាលំបាកទាំងសេដ្ឋកិច្ច ទាំងសិទ្ធិមនុស្ស។
«សំឡេង»
រដ្ឋមន្ត្រីអន្តោប្រវេសន៍អូស្ត្រាលី លោក ស្កុត ម៉ូរីសុន (Scott Morrison) ឲ្យដឹងកាលពីពេលថ្មីៗថា ឋានៈជាជនភៀសខ្លួនមិនមែនជាសំបុត្រសម្រាប់តែផ្ញើទៅកាន់ប្រទេសមានសេដ្ឋកិច្ចលេខ១នោះទេ រឿងសំខាន់ថា តើពួកគេអាចមានសុវត្ថិភាពដែរទេ?
របាយការណ៍របស់ទីភ្នាក់ងារអង្គការសហប្រជាជាតិ (UNOHCHR) ឲ្យដឹងថា អ្នកស្វែងរកសិទ្ធិជ្រកកោនជិត ១លាននាក់នៅឆ្នាំ២០១២ ក្នុងនោះប្រទេសអូស្ត្រាលី ទទួលយកជាង ២% បើប្រៀបធៀបទៅនឹងប្រទេសអភិវឌ្ឍន៍ផ្សេងទៀត។
កិច្ចព្រៀមព្រៀងស្នើសុំរបស់រដ្ឋាភិបាលអូស្ត្រាលី មករដ្ឋាភិបាលកម្ពុជា នោះ ត្រូវបានបិទបាំងក្នុងភាពសម្ងាត់ ដែលគណបក្សប្រឆាំងក្នុងប្រទេសអូស្ត្រាលី និងសាធារណជន មិនបានទទួលព័ត៌មានអ្វីសោះទាក់ទងនឹងកិច្ចព្រមព្រៀងនេះ។ សារព័ត៌មានរាយការណ៍ថា រដ្ឋាភិបាលអូស្ត្រាលី សន្យាផ្ដល់ទឹកប្រាក់ពី ៤០លានទៅ ៨០លានដុល្លារសហរដ្ឋអាមេរិក ឲ្យរដ្ឋាភិបាលកម្ពុជា ជាជំនួយអភិវឌ្ឍន៍ ជាថ្នូរដល់ការផ្ដល់ជម្រកដល់ជនភៀសខ្លួនទាំងនេះ។
សេចក្ដីថ្លែងការណ៍របស់គណៈកម្មាធិការប្រព្រឹត្តិកម្មនៃអង្គការសមាគមការពារសិទ្ធិមនុស្សកម្ពុជា បញ្ជាក់ថា អ្នកស្វែងរកសិទ្ធិជ្រកកោន និងជនភៀសខ្លួនចំនួន ៦៨នាក់ បច្ចុប្បន្នកំពុងរស់នៅកម្ពុជា ជីវិតប្រចាំថ្ងៃពួកគេ គឺជាការតស៊ូ។ ពួកគេភាគច្រើនគ្មានការងារធ្វើ ពីព្រោះមិនមានការអនុញ្ញាតឲ្យធ្វើការងារ មិនអាចបើកគណនេយ្យធនាគារ ឬទិញផ្ទះ និងផ្ញើលុយទៅក្រៅប្រទេស មិនទទួលបានការអប់រំ និងសេវាសុខភាពសមរម្យថែមទៀត។
ម្យ៉ាងទៀត ដោយកម្ពុជា នៅក្រោមសម្ពាធពីប្រទេសចិន កម្ពុជា បាននិរទេសដោយបង្ខំអ្នកស្វែងរកសិទ្ធិជ្រកកោនជនជាតិភាគតិចអ៊ុយហ្គរ៍ ចំនួន ២០នាក់ ត្រឡប់ទៅកាន់ប្រទេសចិន វិញកាលពីឆ្នាំ២០០៩ ដែលជាកន្លែងពួកគេប្រឈមនឹងការប្រហារជីវិត និងការកាត់ទោសឲ្យជាប់ពន្ធនាគាររយៈពេលយូរ។ លើសពីនេះទៀត រដ្ឋាភិបាលកម្ពុជា ក៏ត្រូវទទួលខុសត្រូវដែរចំពោះការបញ្ជូនព្រះសង្ឃខ្មែរក្រោមដោយបង្ខំ ទៅឲ្យអាជ្ញាធរវៀតណាម។ បន្ទាប់មក អាជ្ញាធរកម្ពុជា បានប្រើការនិរទេសនេះជាការគំរាមកំហែងចំពោះខ្មែរក្រោម ដើម្បីរារាំងពួកគេក្នុងការទាមទារសិទ្ធិសេរីភាព ក្នុងការលើកស្ទួយសិទ្ធិរបស់ពួកគេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។