ក្រុមអង្គការសង្គមស៊ីវិលចំនួន៣០ស្ថាប័ន បានចេញសេចក្ដីការណ៍រួមគ្នាមួយ អំពាវដល់រដ្ឋាភិបាល ឲ្យដោះលែងអ្នកការពារសិទ្ធិដីធ្លីចំនួន១២នាក់ជាបន្ទាន់ នៅមុនទិវាសិទ្ធិនារីអន្តរជាតិ ៨មីនាឆ្នាំ២០១៥។ តែមន្ត្រីជាន់នៃរាជរដ្ឋាភិបាលកម្ពុជាបញ្ជាក់ថា រដ្ឋាភិបាលគ្មានសិទ្ធិបង្គាប់បញ្ជាឲ្យតុលាការដោះលែងអ្នកជាប់ឃុំណាម្នាក់ឡើយ។
សេចក្ដីថ្លែងការណ៍របស់ក្រុមអង្គការសង្គមស៊ីវិលចុះថ្ងៃទី៦ មីនា មុនថ្ងៃទិវាសិទ្ធិនារីអន្តរជាតិលើកទី១០៤ បានអំពាវឲ្យមានការដោះលែងអ្នកការពារសិទ្ធិដីធ្លីទាំង១២នាក់ ក្នុងនោះ១១នាក់ជាស្ត្រីបឹងកក់ មានលោកស្រី ទេព វន្នីជាដើម។
អ្នកជាប់ឃុំ១១នាក់ក្នុងចំណោម១២នាក់ ត្រូវបានសមត្ថកិច្ចចាប់ខ្លួនមុនក្រោយគ្នាមួយថ្ងៃ កាលពីដើមខែវិច្ឆិកា ឆ្នាំ២០១៤ នៅពេលដែលពួកគេ តវ៉ាមុខសាលារាជធានីភ្នំពេញ ខណៈដែលពួកគេទាមទារឲ្យមានដំណោះស្រាយទឹកលិចផ្ទះសម្បែងរបស់ពួកគាត់។ ប៉ុន្តែអ្នកទាំងនោះត្រូវបានសមត្ថកិច្ចចាប់ខ្លួនបញ្ជូនមកតុលាការដើម្បីដាក់ទោស ហើយចៅក្រមសាលាដំបូងរាជធានីភ្នំពេញក៏បានប្រកាសសាលក្រមដាក់ពន្ធនាគារក្នុងម្នាក់ ១ឆ្នាំ និងពិន័យជាប្រាក់២លានរៀល។
ចំណែកកញ្ញា លី ស៊ីវមិញ ត្រូវបានសមត្ថកិច្ចចាប់ខ្លួនជាមួយឪពុក គឺលោក លី ស្រ៊ាខេង ក្នុងជម្លោះដីជាមួយក្រុមហ៊ុនរបស់ឧកញ៉ា ឃុន សៀ នៅពេលពួកគេមិនព្រមចេញពីដីមានជម្លោះនៅតំបន់បឹងកក់១ កាលពីថ្ងៃទី ១៨ វិច្ឆិកា ២០១៤។
ដោយឡែកព្រះតេជព្រះគុណ សឺន ហាយ ជាព្រះសង្ឃគង់នៅវត្តស្ទឹងមានជ័យ ត្រូវបានសមត្ថកិច្ចចាប់ខ្លួននៅពេលដែលព្រះអង្គ ចូលរួមការតវ៉ាទាមទារឲ្យដោះលែងស្ត្រីបឹងកក់កាលពីថ្ងៃទី១១ វិច្ឆិកា ២០១៤។
ក្រុមអង្គការសង្គមស៊ីវិលបញ្ជាក់ថា អ្នកជាប់ឃុំទាំង១២នាក់នោះ ពុំទទួលបានការការពារដោយសិទ្ធិសេរីភាពខាងការបញ្ចេញមតិ និងការប្រមូលផ្ដុំដោយសន្តិវិធី ដែលមានចែងក្នុងច្បាប់រដ្ឋធម្មនុញ្ញជាតិ និងអន្តរជាតិ រួមមាន សេចក្ដីប្រកាសជាសាកលស្ដីពីសិទ្ធិមនុស្ស និងកតិកាសញ្ញា អនុសញ្ញាទាក់ទងនឹងសិទ្ធិមនុស្ស សិទ្ធិនារី និងសិទ្ធិកុមារ ដែលកម្ពុជាព្រមព្រៀងអនុលោមតាមនោះឡើយ។
ទាក់ទងបញ្ហានេះដែរ នាយិកាមជ្ឈមណ្ឌលសិទ្ធិមនុស្សកម្ពុជា អ្នកស្រី ចក់ សុភាព គូសបញ្ជាក់ថា កម្ពុជានៅមានបញ្ហាច្រើនណាស់ ដែលមិនទាន់បានគោរពសិទ្ធិជាមូលដ្ឋានរបស់ពលរដ្ឋ ដូចជាការបញ្ចេញមតិ និងការប្រមូលផ្ដុំទាមទារឲ្យមានការដោះស្រាយបញ្ហារបស់ពលរដ្ឋជាដើម។ មជ្ឈមណ្ឌលសិទ្ធិមនុស្សកម្ពុជា ក៏បានបើកយុទ្ធនាការធ្វើប័ណ្ណសារ (Postcard) នៅមុនថ្ងៃទិវាសិទ្ធិនារីអន្តរជាតិផងដែរ ដើម្បីអនុញ្ញាតឲ្យពលរដ្ឋអាចផ្ញើសារទៅកាន់ស្ត្រីកំពុងជាប់ឃុំ ដើម្បីបង្ហាញពីការយកចិត្តទុករបស់ពលរដ្ឋផ្សេងទៀត ដែលចង់ឲ្យតុលាការដោះលែងពួកគាត់ទាំងនោះ និងក៏ជាការលើកទឹកចិត្តដល់ពួកគាត់ កុំឲ្យអស់សង្ឃឹមផងដែរ។
យ៉ាងណាក៏ដោយក្រុមអង្គការសង្គមស៊ីវិល បានក្រើនរំលឹកដល់រាជរដ្ឋាភិបាលកម្ពុជាថា គួរតែដោះលែងអ្នកទាំង១២នាក់នោះជាបន្ទាន់ នៅមុនទិវាសិទ្ធិនារីអន្តរជាតិឆ្នាំនេះ ដើម្បីបង្កើនភាពជឿជាក់ពីសំណាក់សហគមន៍អន្តរជាតិ ដោយទទួលស្គាល់សារសំខាន់ និងភាពស្របច្បាប់នៃអ្នកការពារសិទ្ធិមនុស្ស ជាពិសេសអ្នកការពារសិទ្ធិមនុស្សជាស្ត្រី ក្នុងការលើកកម្ពស់ ការការពារសិទ្ធិមនុស្ស លទ្ធិប្រជាធិបតេយ្យ និងនីតិរដ្ឋនៅកម្ពុជា។
ឆ្លើយតបនឹងសេចក្ដីថ្លែងការណ៍របស់ក្រុមអង្គការសង្គមស៊ីវិល ដែលអំពាវនាវឲ្យរដ្ឋាភិបាលដោះលែងអ្នកជាប់ឃុំទាំងនោះ រដ្ឋលេខាធិការ និងជាអ្នកនាំពាក្យនៃទីស្ដីការគណៈរដ្ឋមន្ត្រី លោក ផៃ ស៊ីផាន បញ្ជាក់ថា តុលាការជាស្ថាប័នឯករាជ្យ ដូច្នេះរដ្ឋាភិបាលគ្មានសិទ្ធិបង្គាប់បញ្ជាឲ្យតុលាការដោះលែងអ្នកណាម្នាក់បានទេ ហើយរដ្ឋាភិបាលកម្ពុជាក៏មិនធ្វើការបម្រើ ឬផ្គាប់ចិត្តបរទេសណាមួយដែរ។
ជាងនេះទៅទៀតលោក ផៃ ស៊ីផាន បានរិះគន់ក្រុមសង្គមស៊ីវិលទាំងនោះវិញថា ជាក្រុមធ្វើសកម្មភាពបំផុសឲ្យរំលោភច្បាប់របស់កម្ពុជាទៅវិញទេ។ លោកបន្តថា បើសង្គមស៊ីវិលទាំងនោះខ្មាស ឬខ្លាចមិនអាចបំពេញចិត្តសហគមន៍អន្តរជាតិបាន គួរទៅធ្វើការនៅក្រៅស្រុកវិញល្អជាង។
ទោះយ៉ាងណាក្តីសេចក្ដីថ្លែងការណ៍របស់ក្រុមអង្គការសង្គម ស៊ីវិលនៅតែបង្ហាញជំហរដ៏ច្បាស់លាស់មួយថាបើសិនរដ្ឋាភិបាល ដោះលែងសកម្មជនការពារសិទ្ធិដីធ្លីទាំង១២នាក់នេះ គឺជាឱកាសល្អមួយសម្រាប់រដ្ឋាភិបាល ដើម្បីបង្ហាញពីការប្ដេជ្ញាចិត្តដ៏ខ្លាំងក្លារបស់ខ្លួន ក្នុងការគោរពសិទ្ធិមនុស្ស ចំពោះមុខសហគមន៍អន្តរជាតិ ស្របពេលដែលក្រុមប្រឹក្សាសិទ្ធិមនុស្សរបស់អង្គការសហប្រជាជាតិឆ្នាំ២០១៤ នឹងត្រួតពិនិត្យជាលើកទី២ នៅថ្ងៃទី១៧ និង១៨ មីនាខាងមុខ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។