សង្គម​ស៊ីវិល​ថ្កោល​ទោស​ការ​ដក​មេ​ប៉ុស្តិ៍​នៅ​ប៉ៃលិន

ដោយ ម៉ម មុនីរតន៍
2013-03-29
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល
មេ​ប៉ុស្តិ៍​បរថ្មី ច្រក​អូរអែម សង្កាត់​បរយ៉ាខា ខេត្ត​ប៉ៃលិន ដែល​ត្រូវ​បញ្ឈប់​ពី​តួនាទី លោក មួន ទឹម ហៅ ញ៉ន (ស្ដាំ) អង្គុយ​ក្បែរ​បង្គោល​ឡាក់​លេខ ៦៤ កាល​ពី​ថ្ងៃ​ទី​១៩ មីនា ឆ្នាំ​២០១៣។
មេ​ប៉ុស្តិ៍​បរថ្មី ច្រក​អូរអែម សង្កាត់​បរយ៉ាខា ខេត្ត​ប៉ៃលិន ដែល​ត្រូវ​បញ្ឈប់​ពី​តួនាទី លោក មួន ទឹម ហៅ ញ៉ន (ស្ដាំ) អង្គុយ​ក្បែរ​បង្គោល​ឡាក់​លេខ ៦៤ កាល​ពី​ថ្ងៃ​ទី​១៩ មីនា ឆ្នាំ​២០១៣។
RFA/Morm Moniroth

អង្គការ​សង្គម​ស៊ីវិល ដែល​ធ្វើ​ការ​ពាក់ព័ន្ធ​នឹង​បញ្ហា​ព្រំដែន បាន​បញ្ចេញ​ប្រតិកម្ម​ប្រឆាំង​នឹង​អាជ្ញាធរ​ខេត្ត​ប៉ៃលិន ដែល​បាន​បញ្ឈប់​មេ​ប៉ុស្តិ៍​បរថ្មី កាល​ពី​ពេល​ថ្មីៗ​នេះ។ អង្គការ​ដដែល​នេះ ក៏​បង្ហាញ​ការ​សោកស្ដាយ​ចំពោះ​មន្ត្រី​រដ្ឋាភិបាល ដែល​គំរាម​ប្ដឹង​វិទ្យុ​អាស៊ីសេរី ថែម​ទៀត​ពាក់ព័ន្ធ​នឹង​ការ​ផ្សាយ​ព័ត៌មាន​ស្ដីពី​បញ្ហា​ព្រំដែន។

ប៉ុន្តែ អ្នក​នាំ​ពាក្យ​នៃ​ទីស្ដីការ​គណៈរដ្ឋមន្ត្រី អះអាង​ថា នេះ​ពុំ​មែន​ជា​ការ​ដក ឬ​បញ្ឈប់​ទេ គឺ​គ្រាន់​តែ​ផ្លាស់​ប្ដូរ​ការងារ​ក្នុង​ស្ថាប័ន​រដ្ឋ​ប៉ុណ្ណោះ។

ក្រុម​ប្រឹក្សា​ឃ្លាំ​មើល​កម្ពុជា ថ្កោល​ទោស​អាជ្ញាធរ​ខេត្ត​ប៉ៃលិន ដែល​សម្រេច​ដក​តួនាទី​មេ​ប៉ុស្តិ៍​បរថ្មី នៃ​វរព្រំដែន​៨២១ បញ្ឈប់​ពី​ការងារ និង​ការ​គំរាម​ប្ដឹង​វិទ្យុ​អាស៊ីសេរី ដោយ​ចាត់​ទុក​ថា នេះ​គឺ​ជា​សារ​គំរាម​កំហែង​ដល់​សិទ្ធិ​បញ្ចេញ​មតិ និង​សេរីភាព​អ្នក​សារព័ត៌មាន​ដែល​ធានា​ដោយ​ច្បាប់។

សេចក្ដី​ថ្លែងការណ៍​របស់​ក្រុម​ប្រឹក្សា​ឃ្លាំ​មើល​កម្ពុជា ចុះ​ថ្ងៃ​ទី២៩ មីនា ឲ្យ​ដឹង​ថា ខ្លួន​ពុំ​អាច​ទទួល​យក​បាន​ឡើយ​ចំពោះ​ទង្វើ​របស់​អាជ្ញាធរ​ខេត្ត​ប៉ៃលិន ដែល​សម្រេច​ដក​តួនាទី​លោក មួន ទឹម ចេញ​ពី​មេ​ប៉ុស្តិ៍​នៅ​ចំណុច​បរថ្មី នៃ​ខេត្ត​ប៉ៃលិន នោះ។ លិខិត​បន្ត​ថា អ្វី​ដែល​មន្ត្រី​រដ្ឋាភិបាល​គំរាម​ប្ដឹង​ថែម​ទៀត​ទៅ​តុលាការ​យោធា ចំពោះ​អ្នក​យក​ព័ត៌មាន​វិទ្យុ​អាស៊ីសេរី ជុំវិញ​សេចក្ដី​រាយការណ៍​ថា ថៃ បាន​រំលោភ​ព្រំដែន​ចូល​មក​ក្នុង​ទឹកដី​កម្ពុជា នោះ គឺ​ជា​ការ​គំរាម​កំហែង​ធ្ងន់ធ្ងរ​ដល់​សិទ្ធិ​បញ្ចេញ​មតិ និង​សេរីភាព​អ្នក​សារព័ត៌មាន។

ក្រុម​ប្រឹក្សា​ឃ្លាំ​មើល​កម្ពុជា ថ្កោល​ទោស​យ៉ាង​ដាច់​អហង្ការ​ចំពោះ​ចេតនា​ទាំង​នេះ ដោយ​ចាត់​ទុក​ថា នេះ​គឺ​ជា​សារ​ដើម្បី​បិទ​បាំង​ការ​ពិត និង​អសមត្ថភាព​ក្នុង​ការ​ការពារ​បូរណភាព​ទឹកដី​ពី​ការ​ឈ្លាន​ពាន​របស់​ប្រទេស​ជិត​ខាង។

លិខិត​បន្ត​ថា ក្រុម​ប្រឹក្សា​ឃ្លាំ​មើល​កម្ពុជា យល់​ឃើញ​ថា អ្នក​ដឹកនាំ​រដ្ឋ​ត្រូវ​ឲ្យ​ពលរដ្ឋ​បាន​ដឹង​យ៉ាង​ទូលាយ​អំពី​បញ្ហា​ព្រំដែន​រវាង​កម្ពុជា និង​ប្រទេស​ជិត​ខាង។ ពោល គឺ​មិន​ត្រូវ​លាក់​បាំង​ជាមួយ​ប្រជាពលរដ្ឋ​ខ្លួន​ឯង​នោះ​ទេ ហើយ​រដ្ឋាភិបាល​ត្រូវ​អនុញ្ញាត​ឲ្យ​ប្រជាពលរដ្ឋ​ចូលរួម​ក្នុង​ការ​ការពារ​បូរណភាព​ទឹកដី ដោយ​មិន​ត្រូវ​គំរាម និង​ប្ដឹង​ចំពោះ​អ្នក​ដែល​គិត​អំពី​បញ្ហា​ព្រំដែន​ឡើយ។

បន្ថែម​លើ​នេះ​ទៀត សមាជិក​ក្រុម​ប្រឹក្សា​ឃ្លាំ​មើល​កម្ពុជា លោក រ៉ុង ឈុន ថ្លែង​ថា រដ្ឋាភិបាល​គួរ​លើក​ទឹក​ចិត្ត​អ្នក​ដែល​គិត​អំពី​បញ្ហា​អធិបតីភាព និង​បូរណភាព​ទឹកដី​របស់​ខ្លួន ហើយ​រដ្ឋាភិបាល​ពុំ​គួរ​ប្រតិកម្ម​ប្រឆាំង​ចំពោះ​ការ​រក​ឃើញ​កំហុស ដោយ​ប្រើប្រាស់​ប្រព័ន្ធ​តុលាការ​នោះ​ឡើយ៖ «បញ្ហា​អស់​ទាំង​ហ្នឹង យើង​គិត​ថា រដ្ឋាភិបាល​កំពុង​តែ​បិទ​បាំង​នូវ​ទង្វើ​អសកម្ម​របស់​ខ្លួន​ក្នុង​ការ​ការពារ​បូរណភាព​ទឹកដី​នៃ​កម្ពុជា»

ក៏ប៉ុន្តែ អ្នក​នាំ​ពាក្យ​នៃ​ទីស្ដីការ​គណៈរដ្ឋមន្ត្រី លោក ផៃ ស៊ីផាន អះអាង​កាល​ពី​ថ្ងៃ​ទី២៨ មីនា នៅ​ក្នុង​សន្និសីទ​កាសែត​នៅ​ទីស្ដីការ​គណៈរដ្ឋមន្ត្រី​ថា មេ​ប៉ុស្តិ៍​បរថ្មី មិន​ត្រូវ​បញ្ចប់​តួនាទី​ទេ គឺ​គ្រាន់​តែ​ផ្លាស់​ប្ដូរ​ការ​ទទួល​ខុស​ត្រូវ​ប៉ុណ្ណោះ។ លោក​បន្ត​ថា ចំណែក​ការ​គំរាម​ប្ដឹង​វិទ្យុ​អាស៊ីសេរី ក៏​ព្រោះ​ស្ថាប័ន​នេះ​ផ្សាយ​ព័ត៌មាន​អំពី​ការ​បាត់បង់​ដី​នៅ​តំបន់​ព្រំដែន​ភាគ​ខាង​លិច​ទៅ​ភាគី​ថៃ ហើយ​លោក​ចាត់​ទុក​ថា ព័ត៌មាន​នេះ​នាំ​ឲ្យ​ប៉ះពាល់​ដល់​សន្តិសុខ​ជាតិ។

លោក ផៃ ស៊ីផាន៖ «គាត់​ធ្វើ​ជា​របៀប​អ្នក​យុទ្ធនាការ​ក្នុង​ការ​វាយ​ប្រហារ ឬ​ក៏​បំផុស​ចលនា​មួយ ដើម្បី​ពាក់ព័ន្ធ​នឹង​បញ្ហា​ព្រំដែន។ ដូច​ខ្ញុំ​បាន​ជម្រាប​ហើយ បញ្ហា​ព្រំដែន​គឺ​វា​ជា​បញ្ហា​សន្តិសុខ​ជាតិ ហើយ​យើង​ឃើញ​ជា​បន្តបន្ទាប់​ទៀត​ហ្នឹង គឺ​វិទ្យុ​អាស៊ីសេរី ហ្នឹង បាន​ធ្វើ​ការ​វាយ​ប្រហារ មិន​មែន​ត្រឹម​តែ​ប៉ុណ្ណឹង​ទេ បញ្ចូល​នូវ​គំនិត​ខ្លួន​ឯង ហាក់​បី​ដូច​ជា​ការ​និយាយ​មួយ​មិន​សមស្រប​ក្នុង​វិជ្ជាជីវៈ ក៏​ដូច​ជា​ក្រម​សីលធម៌​ដែល​ទទួល​ខុស​ត្រូវ»

ទោះ​ជា​បែប​ណា លោក​បណ្ឌិត ឡៅ ម៉ុងហៃ ចាត់​ទុក​ថា អ្វី​ដែល​វិទ្យុ​អាស៊ីសេរី ផ្សាយ​ពី​ការ​បាត់បង់​ទឹកដី​ទៅ​ប្រទេស​ជិត​ខាង មិន​រាប់​ថា​ជា​ការ​ប៉ះពាល់​ដល់​សន្តិសុខ​ជាតិ​ឡើយ៖ «យុទ្ធសាស្ត្រ​របស់​កងទ័ព​យើង ឬ​ក៏​ចំនួន​កម្លាំង​កងទ័ព​យើង​អីៗ​អ៊ីចឹង​ផ្សព្វផ្សាយ​ឲ្យ​គេ​ដឹង អា​ហ្នឹង​ប៉ះពាល់​ដល់​សន្តិសុខ​អ្ហា អីចេះ។ ក៏ប៉ុន្តែ ថា​យក​ព័ត៌មាន​រឿង​ព្រំ​ប្រទល់​ដែន រឿង​អី​គ្មាន​អី​ឲ្យ​ប៉ះពាល់ ប៉ុន្តែ​បើ​ថា​រឿង​ហ្នឹង​វា​មិន​ពិត យើង​បដិសេធ​វិញ​ទៅ បើ​មិន​អ៊ីចឹង​ទេ ចាំបាច់​គំរាម​កំហែង​គេ​ប្ដឹង​ផ្ដល់»

ប្រតិកម្ម​របស់​រដ្ឋាភិបាល ធ្វើ​ឡើង​បន្ទាប់​ពី​ការ​ផ្សាយ​របស់​វិទ្យុ​អាស៊ីសេរី អំពី​ការ​ការ​បាត់បង់​អធិបតីភាព និង​បូរណភាព​ទឹកដី​របស់​កម្ពុជា ដែល​ពលរដ្ឋ​នៅ​ទីនោះ​បាន​អះអាង​ថា ថៃ លួច​រំកិល​ព្រំដែន​ចូល​មក​កម្ពុជា ក្រោយ​ពី​ប្រទេស​កម្ពុជា ធ្វើ​សមាហរណកម្ម​ជាមួយ​ភាគី​ម្ខាង​ទៀត​ដែល​តស៊ូ​នៅ​តំបន់​ជាយ​ដែន​កម្ពុជា-ថៃ នៅ​ឆ្នាំ​១៩៩៨៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (6)
  • បោះពុម្ព
  • ចែករំលែក
  • អ៊ីម៉ែល

Pheap

ពី SIEM REAP

It's freedom in box,some one given really information position will collapse, is living style in Cambodia.

Mar 30, 2013 11:09 AM

អ្នក​អាន​អនាមិក

ដីបាក់អស់ច្រើនណាស់

Mar 29, 2013 06:40 PM

អ្នក​អាន​អនាមិក

hun sen government is strong to destroy own khmer people ,but has no capacity to protect the country.It's shame.

Mar 29, 2013 01:32 PM

អ្នក​អាន​អនាមិក

government hun sen has good politic win,win to destroy khmer people ,he has bad politic lost lost with thai and vietnam ,it's shame,when khmer people have the leader like that.

Mar 29, 2013 01:29 PM

Pheap

ពី SIEM REAP

នៅពេលដែលខ្ញុំចុះទៅធ្វើការនៅខេត្តបន្ទាយមានជ័យ​និង​ព្រះវិហារ​ខ្ញុំបានជួបអតីតខ្មែរក្រហម ដែលបាននិយាយអំពីការបាត់ទឹកដីខ្លះដែរ
ព្រោះនៅសម័យខ្មែរក្រហមថៃមិនហានរំកិលមកទេ ហើយបន្ទាប់មកនៅពេលសម័យអ៊ុន​តាក់​ក៏ការតាំងទីរបស់ទ័ព​​​មានកំណត់ច្បាស់​ដែល​អ៊ុន​តាក់បានធ្វើ​ការកត់ត្រានិង​ពិនិត្យ​​ច្បាស់លាស់។​​បើចង់ដឹងច្បាស់គួរតែសាកសួរ
ប្រជាជននៅតាមទល់ដែន​និង​អតីតទាហានខ្មែរក្រហម​ខ្ញុំជឿជាក់ថានឹងបានចម្លើយមិនខុសពីអាសីសេរីសរសេរនោះទេ។

Mar 29, 2013 10:12 AM

មើល​មតិ​ទាំង​អស់.

គេហទំព័រ​ទាំងមូល