ពលរដ្ឋរងគ្រោះនៅឃុំចំណារក្រោម ស្រុកស្ទោង ខេត្តកំពង់ធំ ត្រៀមប្ដឹងមេប៉ុស្តិ៍ឃុំចំណារក្រោម ពីបទប្រើប្រាស់អំពើហិង្សា និងគំរាមកំហែង។ មេប៉ុស្តិ៍ឃុំចំណារក្រោម កាលពីយប់ថ្ងៃទី១៩ មេសា បានវាយពលរដ្ឋឲ្យរងរបួសក្បាល ខណៈពួកគេត្រឡប់មកពីមើលគេរាំធុងបាសក្នុងភូមិវិញ។ នាយនគរបាលប៉ុស្តិ៍ឃុំចំណារក្រោម បញ្ជាក់ថា ខ្លួនមិនមានចេតនាវាយពលរដ្ឋរូបនោះទេ តែជាការការពារខ្លួនប៉ុណ្ណោះ។
ប្រជាពលរដ្ឋ និងជាសកម្មជនគណបក្សសង្គ្រោះជាតិ នៅភូមិព្រះនង្គ័ល ឃុំចំណារក្រោម យល់ថា សកម្មភាពវាយដំ និងគំរាមកំហែងមកលើខ្លួនពីសំណាក់មេប៉ុស្តិ៍ឃុំចំណារក្រោម ធ្វើឡើងដោយគ្មានការគិតពិចារណា ហើយក៏ជាការបំពានលើច្បាប់ថែមទៀត។
សកម្មជនគណបក្សសង្គ្រោះជាតិ នៅភូមិព្រះនង្គ័ល អ្នកស្រី ឆាន លីម ឲ្យដឹងថា កាលពីយប់កើតហេតុថ្ងៃទី១៩ មេសា ខណៈអ្នកស្រី និងប្ដីអ្នកស្រី ព្រមទាំងអ្នកភូមិផ្សេងទៀត ត្រឡប់មកពីមើលគេរាំធុងបាសវិញ ប្ដីគាត់ឃើញរថយន្តមេប៉ុស្តិ៍ ស្មានតែមិត្តភ័ក្ដិខ្លួន ក៏ហៅឈ្មោះច្រឡំ ស្រាប់តែមេប៉ុស្តិ៍ចំណារក្រោម លោក ហ៊ាង ថូន មកវាយប្ដីអ្នកស្រី បណ្ដាលឲ្យរងរបួសក្បាល។ អ្នកស្រីឲ្យដឹងទៀតថា ក្រោយកើតហេតុ អ្នកស្រីនាំគ្នាទៅសួរនាំមេប៉ុស្តិ៍រូបនោះ ហើយលោកក៏បាញ់កាំភ្លើងមួយគ្រាប់ទៀតដើម្បីគំរាមពួកគាត់៖ « តើច្បាប់នេះវាយ៉ាងណា ? នៅពេលក្មេងវាយគ្នាចេះហ៊ានចាប់ ដល់ពេលប៉ូលិសវ៉ៃប្ដីខ្ញុំទាំងមូល ហេតុអីបានជាវាមិនបានពោលពាក្យមួយម៉ាត់ផង »។
ចំណែកប្ដីអ្នកស្រីដែលរងរបួសក្បាលកំពុងសម្រាកព្យាបាលរបួសនៅផ្ទះ លោក ឡាំ ជុន មានប្រសាសន៍ថា លោកមិនដែលមានទំនាស់ជាមួយមេប៉ុស្តិ៍រូបនោះឡើយ។ ម្យ៉ាង លោកក៏មិនបានបង្កបញ្ហានៅក្នុងពេលរាំ ឬមើលគេរាំធុងបាសនោះទេ ប៉ុន្តែអាចមេប៉ុស្តិ៍រូបនោះវាយមនុស្សច្រឡំច្រើនជាង៖ « លេងដាក់មួយពិលម៉ូង លេងខ្ញុំសន្លប់ពេញតាវាលហ្នឹងឯង ហើយខ្ញុំគ្មានកាំបិតពីណារករឿងគេទេ »។
បន្ថែមពីនេះទៀត លោក និងក្រុមគ្រួសារ នឹងដាក់ពាក្យបណ្ដឹងទៅអាជ្ញាធរមូលដ្ឋាន ដោយប្ដឹង លោក ហ៊ាង ថូន ដើម្បីស្វែងរកយុត្តិធម៌។
ទាក់ទងបញ្ហានេះ មេប៉ុស្តិ៍ឃុំចំណារក្រោម លោក ហ៊ាង ថូន បដិសេធចំពោះការចោទប្រកាន់ទាំងឡាយ។ លោកបញ្ជាក់ថា នៅយប់កើតហេតុមានសេចក្តីរាយការណ៍ថា មានក្រុមក្មេងបង្កបញ្ហាក្នុងវង់រាំ ប៉ុន្តែខណៈលោកទៅ បែរជា លោក ឡាំ ជុន មករារាំងលោកមិនឲ្យចូលទៅជិត និងមានបំណងបង្ករឿងជាមួយលោកថែមទៀតផង ហើយលោកក៏គ្រវាសដៃទៅត្រូវមួយពិល។ ក្រោយមកមានមនុស្សច្រើនបម្រុងមកបង្កបញ្ហាជាមួយលោក លោកក៏បាញ់មួយគ្រាប់ទៅ៖ « ដាក់ពាក្យបណ្ដឹងមកលើខ្ញុំ ប្រើអំពើហិង្សា គឺមិនយុត្តិធម៌ទេ។ ខ្ញុំគ្មានចេតនានឹងប្រើអំពើហិង្សាលើគាត់ទេ »។
ទោះបីជាយ៉ាងនេះក្តី សមាជិកក្រុមប្រឹក្សាស្រុកស្ទោង មកពីគណបក្សសង្គ្រោះជាតិ លោក ឆាយ ចែង ស្នើឲ្យមន្ត្រីថ្នាក់លើ ត្រូវស៊ើបអង្កេតករណីនេះ ដ្បិតសកម្មភាពមន្ត្រីប៉ូលិសរូបនោះ គឺបណ្ដាលឲ្យមានភាពអសន្តិសុខ និងធ្វើឲ្យពលរដ្ឋមានក្តីបារម្ភទៀតផង។ លោកបញ្ជាក់ថា នឹងរៀបចំពាក្យបណ្ដឹងដាក់ទៅស្ថាប័នពាក់ព័ន្ធដើម្បីស្វែងរកយុត្តិធម៌ ជុំវិញករណីហិង្សាលើក្រុមគ្រួសារសកម្មជនរបស់ខ្លួន៖ « ខ្ញុំគិតថាសកម្មភាពរបស់គាត់ហ្នឹង មិនបានពិនិត្យពិចារណាឲ្យបានច្បាស់លាស់ទេក្នុងគាត់ជាអ្នកកាន់ច្បាប់ហ្នឹង »។
មន្ត្រីសម្របសម្រួលនៃអង្គការការពារសិទ្ធិមនុស្សលីកាដូ (LICADHO) ខេត្តកំពង់ធំ លោក ញូង សាមឿន មានប្រសាសន៍ថា ការបង្កអំពើហិង្សាលើបុគ្គលណាម្នាក់ គឺជារឿងខុសច្បាប់។ លោកបន្តថា ទោះបីជាករណីនេះសមត្ថកិច្ចបញ្ជាក់ថា គេប្រើសិទ្ធិការពារខ្លួនក៏ដោយ ប៉ុន្តែវាមិនមែនជារឿងសមហេតុសមផលនោះដែរ ពីព្រោះភាគីប្រជាពលរដ្ឋមិនមានអាវុធដើម្បីតបតឡើយ។ លោកបញ្ជាក់ថា ពលរដ្ឋរងគ្រោះ គឺមានសិទ្ធិគ្រប់គ្រាន់ក្នុងការប្ដឹងជនដែលបានប្រើអំពើហិង្សាលើខ្លួនដើម្បីទាមទាររកយុត្តិធម៌៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។