រដ្ឋាភិបាលកម្ពុជា មានគម្រោងនឹងបញ្ជូនជនជាតិម៉ុងតាញ៉ា ទៅប្រទេសវៀតណាម វិញទាំងអស់នៅដើមឆ្នាំ២០១៦ ខាងមុខនេះ។ ទាក់ទិននឹងចំណាត់ការរបស់រដ្ឋាភិបាលនាពេលនេះ ត្រូវបានអង្គការសង្គមស៊ីវិលយល់ថា បើរដ្ឋាភិបាលធ្វើបែបនេះ គឺជាការរំលោភយ៉ាងធ្ងន់ធ្ងរទៅលើកាតព្វកិច្ចអន្តរជាតិ ស្តីអំពីការទទួលបានក្នុងឋានៈជាជនភៀសខ្លួន។
ជនជាតិចារ៉ាយ-វៀតណាម ឬម៉ុងតាញ៉ា ដែលភៀសខ្លួនពីប្រទេសវៀតណាម ឆ្លងដែនចូលកម្ពុជា នោះ នឹងអាចគ្មានជោគវាសនារស់នៅកម្ពុជា ទៀតនោះទេ ចាប់ពីដើមឆ្នាំ២០១៦ តទៅ បន្ទាប់ពីរដ្ឋាភិបាលកម្ពុជា រកឃើញថា ពួកគេមិនមែនជាជនភៀសខ្លួនពិតប្រាកដនោះ។
តាមសេចក្តីជូនព័ត៌មានរបស់ក្រសួងការបរទេស និងសហប្រតិបត្តិការអន្តរជាតិ ឲ្យដឹងថា រដ្ឋាភិបាលកម្ពុជា បានទុកពេលឲ្យ ៣ខែទៀត សម្រាប់ឧត្តមស្នងការអង្គការសហប្រជាជាតិ ទទួលបន្ទុកជនភៀសខ្លួន យូ.អិន.អេច្ឆ.ស៊ី.អ (UNHCR) ដើម្បីបន្តស្វែងរកប្រទេសទី៣ សម្រាប់ការតាំងទីលំនៅដល់ជនភៀសខ្លួនចំនួន ១៣នាក់។ ការកំណត់ពេលនេះ បន្ទាប់ពីកម្ពុជា បានទុកពេល ៦ខែកន្លងផុតទៅហើយ ប៉ុន្តែ យូ.អិន.អេច្ឆ.ស៊ី.អ នៅតែពុំទាន់អាចរកប្រទេសទី៣ សម្រាប់ក្រុមម៉ុងតាញ៉ា ជ្រកកោនបាននៅឡើយ។ ដូច្នេះ ក្រុមម៉ុងតាញ៉ា ទាំង ១៣នាក់នេះ អាចបន្តរស់នៅក្នុងប្រទេសកម្ពុជា រហូតដល់ថ្ងៃទី១០ ខែមករា ឆ្នាំ២០១៦។
ចំណែកម៉ុងតាញ៉ា ជាង ២០០នាក់ផ្សេងទៀត រដ្ឋាភិបាលកម្ពុជា ស្នើឲ្យ យូ.អិន.អេច្ឆ.ស៊ី.អ បញ្ជូនទៅវៀតណាម វិញជាបន្តបន្ទាប់រហូតដល់អស់ត្រឹមថ្ងៃទី៦ ខែកុម្ភៈ ឆ្នាំ២០១៦។
ទាក់ទិនរឿងម៉ុងតាញ៉ា នេះ ប្រធានលេខាធិការដ្ឋាននៃគណៈកម្មាធិការប្រព្រឹត្តិកម្មការពារសិទ្ធិមនុស្សកម្ពុជា លោក សួន ប៊ុនស័ក្តិ យល់ថា ចំណាត់ការរបស់រដ្ឋាភិបាលដោយគ្មានការឆ្លងកាត់នីតិវិធីវាយតម្លៃចំពោះការស្នើសុំសិទ្ធិជ្រកកោន ក្នុងឋានៈជាជនភៀសខ្លួននេះ គឺជាការរំលោភយ៉ាងធ្ងន់ធ្ងរទៅលើកាតព្វកិច្ចអន្តរជាតិ ស្តីអំពីសិទ្ធិទទួលបានក្នុងឋានៈជាជនភៀសខ្លួន៖ «ខ្ញុំសុំអោយរដ្ឋាភិបាល មុននឹងបញ្ជូនម៉ុងតាញ៉ាទៅវិញ ខ្ញុំសុំឲ្យអនុវត្តតាមនីតិវិធីដូចដែលមានចែងនៅក្នុងអនុក្រឹត្យស្ដីពីការវាយតម្លៃជនភៀសខ្លួនរបស់រដ្ឋាភិបាល គឺធ្វើតាមអាហ្នឹងទៅ។ បានសេចក្ដីថា យើងបានបំពេញនូវកាតព្វកិច្ចអន្តរជាតិ ជាពិសេសកាតព្វកិច្ចនៅក្រោមសន្ធិសញ្ញាស្ដីពីស្ថានភាពជនភៀសខ្លួន។ រដ្ឋាភិបាលត្រូវធ្វើអាហ្នឹងអស់សិន ទើបយើងដឹងថា ជនទាំងអស់ហ្នឹងពិតជាជនរត់មកស្វែងរកសិទ្ធិជ្រកកោន ឬគ្រាន់តែមានចេតនាភៀសខ្លួនមកកម្ពុជា ដើម្បីមករកស៊ីផ្នែកសេដ្ឋកិច្ចនោះទេ ត្រូវមើលកន្លែងនេះអោយច្បាស់មុននឹងបញ្ជូនទៅវិញ»។
សេចក្តីជូនព័ត៌មានដដែលបញ្ជាក់ថា ការបញ្ជូនជនជាតិម៉ុងតាញ៉ា នេះ គឺអនុវត្តទៅតាមអនុស្សរណៈយោគយល់គ្នា អឹម.អូ.យូ (MOU) ដែលចុះហត្ថលេខាកាលពីថ្ងៃទី២៥ ខែមករា ឆ្នាំ២០០៥ រវាងកម្ពុជា-វៀតណាម និងឧត្តមស្នងការអង្គការសហប្រជាជាតិ ទទួលបន្ទុកជនភៀសខ្លួន។ តាមស្មារតី អឹម.អូ.យូ គឺ យូ.អិន.អេច្ឆ.ស៊ី.អ ត្រូវបានរកប្រទេសទី៣ សម្រាប់តាំងទីលំនៅដល់ជនភៀសខ្លួនចំនួន ១៣នាក់ ក្នុងរយៈពេល ៦ខែ។
លោក សួន ប៊ុនស័ក្តិ បន្ថែមថា ការដែលរដ្ឋាភិបាលកម្ពុជា មិនទទួលយកជនភៀសខ្លួនក្រុមម៉ុងតាញ៉ា នោះ គឺដើម្បីជួយបិទបាំងភាពអាម៉ាស់របស់ប្រទេសវៀតណាម ព្រោះការរត់ភៀសខ្លួនរបស់ជនជាតិម៉ុងតាញ៉ា គឺក្រោមហេតុផលនយោបាយ៖ «ហេតុផលរបស់គាត់ (ក្រុមម៉ុងតាញ៉ា) ប្រាកដជានឹងនិយាយពីរបបគ្រប់គ្រងរបស់ប្រទេសវៀតណាម ហើយ ដូច្នេះដោយសារខ្លាចប៉ះពាល់មុខមាត់មិត្តជិតខាងហ្នឹង អាចថា ជាកត្តាជំរុញអោយកម្ពុជា មិនគិតគូរអីច្រើនទេ ដឹងថា បើកាលណាមានជនរត់មកសុំសិទ្ធិជ្រកកោនដឹងតែបញ្ជូនទៅវិញតែម្ដង»។
ជនភៀសខ្លួនម៉ុងតាញ៉ា អះអាងថា មូលហេតុដែលពួកគេចាកចេញពីស្រុកកំណើត ផ្សងព្រេងតាមផ្លូវដ៏វែងឆ្ងាយចូលក្នុងប្រទេសកម្ពុជា នោះ គឺដោយសាររដ្ឋាភិបាលវៀតណាម ធ្វើទុក្ខបុកម្នេញពួកគេគ្មានពេលល្ហែ ទាំងការចូលរួមផ្នែកនយោបាយ ការរស់នៅ និងជំនឿសាសនា ជាដើម។ ក្រុមម៉ុងតាញ៉ា ដែលភៀសខ្លួនមកនោះ សុំអង្វររដ្ឋាភិបាលកម្ពុជា និងក្រុមអង្គការអន្តរជាតិ ជួយសង្គ្រោះជីវិតពួកគេ ដោយកុំបញ្ជូនត្រឡប់ទៅប្រទេសវៀតណាម វិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។