អង្គការឃ្លាំមើលសិទ្ធិមនុស្សអន្តរជាតិ យូមែន រ៉ៃត៍ វ៉ច្ឆ (Human Rights Watch) ដែលមានមូលដ្ឋានក្នុងបុរីញីវយ៉ក (New York) សហរដ្ឋអាមេរិក កាលពីរសៀលថ្ងៃព្រហស្បតិ៍ ទី១៣ វិច្ឆិកា បានជំរុញឲ្យក្រុមប្រទេសផ្តល់ជំនួយដល់កម្ពុជា គួរនិយាយប្រឆាំងនឹងការរំលោភបំពានរបស់រដ្ឋាភិបាលកម្ពុជា ដែលចាប់ខ្លួន ក្រុមអ្នកតវ៉ាតាមទំនើងចិត្ត និងទាមទារឲ្យរដ្ឋាភិបាលបញ្ចប់ការបង្ក្រាបបែបនេះ។
ចាប់តាំងពីថ្ងៃទី១០ ខែវិច្ឆិកា មក អាជ្ញាធរប្រទេសកម្ពុជា បានចាប់ខ្លួនក្រុមបាតុករដោយសន្តិវិធីចំនួន ១៦នាក់។
អង្គការ យូមែន រ៉ៃត៍ វ៉ច្ឆ អះអាងថា ការចាប់ខ្លួននេះ ធ្វើឡើងនៅចំពេលដែលរបត់នយោបាយរបស់គណបក្សប្រជាជនកម្ពុជា ព្យាយាមប្រើយុទ្ធនាការរបស់ខ្លួនក្នុងការដាក់សម្ពាធលើគណបក្សប្រឆាំង ឲ្យបញ្ឈប់ការទាមទារកែទម្រង់ប្រព័ន្ធបោះឆ្នោតដែលមានភាពខុសឆ្គងនោះ។
លោក ប្រ៊ែដ អាដាម (Brad Adams) នាយកប្រតិបត្តិទទួលកិច្ចការតំបន់អាស៊ី របស់អង្គការឃ្លាំមើលសិទ្ធិមនុស្សអន្តរជាតិ មួយនេះ បានថ្លែងនៅក្នុងសេចក្តីប្រកាសព័ត៌មានថា ការបង្ក្រាបរបស់សមត្ថកិច្ចកម្ពុជា កាលពីពេលថ្មីៗនេះ បានចំអកដល់ការសន្យាអំពីការកែទម្រង់ប្រជាធិបតេយ្យ ហើយក្រុមប្រទេសអ្នកផ្តល់ជំនួយ ត្រូវនាំគ្នាថ្កោលទោសចំពោះសកម្មភាពរំលោភបំពានសិទ្ធិពលរដ្ឋរបស់អាជ្ញាធរ។
លោក ប្រ៊ែដ អាដាម បន្តថា ការខកខានមិនបាននិយាយ ឬធ្វើការថ្កោលទោសរបស់ប្រទេសម្ចាស់ជំនួយដល់កម្ពុជា គឺជាការលើកទឹកចិត្តឲ្យគណបក្សកាន់អំណាច បន្តបិទលំហនយោបាយ និងរាំងខ្ទប់នូវក្តីសង្ឃឹមទាំងឡាយសម្រាប់ដំណើរការលទ្ធិប្រជាធិបតេយ្យ សេរីពហុបក្សពិតប្រាកដ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។