មន្ត្រីសម្របសម្រួល មន្ត្រីផ្នែកអង្កេត និងគ្រូពេទ្យនៃអង្គការសិទ្ធិមនុស្សលីកាដូ (Licadho) ដែលតាមឃ្លាំមើលសកម្មភាពរបស់ក្រុមធម្មយាត្រាសិទ្ធិយាត្រា នៅតាមបណ្ដោយផ្លូវជាតិលេខ៥ ត្រូវបានអាជ្ញាធរស្រុកបរិបូរណ៍ តាមសួរនាំ និងកត់ឈ្មោះរបស់ពួកគាត់ដោយមិនប្រាប់ពីមូលហេតុ។
មន្ត្រីសម្របសម្រួលនៃអង្គការសិទ្ធិមនុស្សលីកាដូ ប្រចាំខេត្តកំពង់ឆ្នាំង លោក គង់ ច័ន្ទមុនី មានប្រសាសន៍ថា ក្រៅពីការកត់ឈ្មោះរបស់លោក និងក្រុមការងារ នៅល្ងាចថ្ងៃទី៤ ខែធ្នូ នេះ អភិបាលរងខេត្តកំពង់ឆ្នាំង អ្នកស្រី ដោក សុធា ក៏ហៅលោកទៅសាកសួរទាក់ទងនឹងធម្មយាត្រានេះដែរ ក៏ប៉ុន្តែលោកគិតថា សកម្មភាពរបស់អាជ្ញាធរនាពេលនេះមិនបានធ្វើឲ្យប៉ះពាល់អ្វីឡើយ៖ «គាត់យកឈ្មោះយើង ដើម្បីការពារសុវត្ថិភាព ព្រោះយប់មិញយើងគេងនៅហ្នឹង ហើយនិងល្ងាចនេះ គាត់ហៅយើងទៅពិភាក្សាហ្នឹង ដើម្បីសាកសួរព័ត៌មានអំពីធម្មយាត្រាអីហ្នឹង ហើយនិងសិទ្ធិមនុស្សអីហ្នឹង គឺយើងឃើញថា អត់មានបញ្ហាអីទេ។ យើងចង់បានការជួបសំណេះសំណាលជាមួយអភិបាលស្រុក ហើយលោកជំទាវអភិបាលរងខេត្តហ្នឹងដែរ»។
វិទ្យុអាស៊ីសេរី នៅមិនទាន់អាចស្នើសុំការអត្ថាធិប្បាយពីអាជ្ញាធរស្រុកបរិបូរណ៍ និងអភិបាលរងខេត្តកំពង់ឆ្នាំង អ្នកស្រី ដោក សុធា ជុំវិញបញ្ហានេះបានទេ នៅថ្ងៃទី៤ ខែធ្នូ។
ចំណែកប្រធានបណ្ដាញព្រះសង្ឃឯករាជ្យដើម្បីយុត្តិធម៌សង្គម ព្រះតេជព្រះគុណ ប៊ុត ប៊ុនតេង បានមានថេរដីកាថា ព្រះអង្គ និងក្រុមធម្មយាត្រាសិទ្ធិយាត្រាជាច្រើនទៀត មានទឹកចិត្តសប្បាយរីករាយនៅពេលដែលបានឃើញសមត្ថកិច្ចតាមការពារសន្តិសុខ និងមានប្រជាពលរដ្ឋយ៉ាងច្រើនកុះកររស់នៅតាមបណ្ដោយផ្លូវជាតិ៥ ក្នុងទឹកដីខេត្តកំពង់ឆ្នាំង មានការស្វាគមន៍ចំពោះធម្មយាត្រានេះ៖ «អាជ្ញាធរយើងឃើញថា ពីទីក្រុងពោធិ៍សាត់ មានការរឹតត្បិត ប៉ុន្តែដល់ពេលយើងឆ្លងផុតពីទឹកដីពោធិ៍សាត់ មកដល់ដីកំពង់ឆ្នាំង គឺឃើញប្រសើរមែនទែន ប៉ូលិសគ្រប់គ្នា សមត្ថកិច្ចមានការសំណេះសំណាលគ្នាសុំទឹកគ្នាទទួលទានអីស្រួលបួល ហើយជួយសម្រួលចរាចរណ៍ ដើរហាលក្ដៅជាមួយហាក់បីដូចជាសប្បាយចិត្តនឹងរួមធម្មយាត្រា។ ដោយឡែកខេត្តពោធិ៍សាត់ មួយនេះ អាត្មាគិតថារដ្ឋាភិបាលគួរតែដាក់អនុសាសន៍ ឬក៏ចាត់វិធានការល្អៗណាមួយ ដើម្បីឲ្យអាជ្ញាធរថ្នាក់ក្រោមជាតិហ្នឹងគិតគូរពីកិច្ចសហប្រតិបត្តិការល្អជាមួយនឹងរាស្ដ្រ»។
នៅថ្ងៃទី៤ ខែធ្នូ ឆ្នាំ២០១៣ ត្រូវនឹងថ្ងៃទី៤ នៃក្បួនធម្មយាត្រាសិទ្ធិយាត្រារយៈពេល ១០ថ្ងៃ ដើម្បីអបអរសាទរទិវាសិទ្ធិមនុស្សអន្តរជាតិខួបលើកទី៦៥ ឆ្នាំ២០១៣ មានព្រះសង្ឃ និងប្រជាពលរដ្ឋជាង ៧០នាក់ ចេញពីខេត្តពោធិ៍សាត់ តាមបណ្ដោយផ្លូវជាតិលេខ៥ គឺមានចំនួនអ្នកចូលរួមថយចុះបន្តិចបន្តួច បើប្រៀបធៀបទៅនឹងថ្ងៃទី១។ នៅថ្ងៃដដែល ក្រុមធម្មយាត្រាសិទ្ធិយាត្រា បានចេញដំណើរពីចំណុចវត្តក្បាលដំរី ស្ថិតនៅក្នុងឃុំត្រពាំងចាន់ ស្រុកបរិបូរណ៍ និងបានសម្រាកហូបបាយនៅក្នុងបរិវេណវត្តពន្លៃ នៅម៉ោងប្រហែល ១២ថ្ងៃត្រង់ ហើយនៅម៉ោង ២ បានបន្តដំណើរទៅមុខទៀត ដោយគ្រោងនឹងសម្រាកយប់នៅក្នុងបរិវេណវត្តស្រះកែវ ស្ថិតនៅក្នុងឃុំមេលំ ស្រុកបរិបូរណ៍ ខេត្តកំពង់ឆ្នាំង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។