គណៈកម្មការចំពោះកិច្ចនៃក្រសួងព័ត៌មាន ចុះស៊ើបអង្កេតករណីចោទប្រកាន់ថា មានការប្រើអំពើហិង្សាគំរាមកំហែងលើអ្នកសារព័ត៌មានមួយក្រុម ដែលចុះយកព័ត៌មានស្ដីពីបទល្មើសព្រៃឈើនៅស្រុកវើនសៃ ខេត្តរតនគិរី។ ការស៊ើបអង្កេតនេះ មិនមានលទ្ធផលណាមួយត្រូវបានក្រុមស៊ើបអង្កេតបញ្ចេញឲ្យដឹងនៅឡើយទេ។
គណៈកម្មការចំពោះកិច្ចមានសមាសភាពមន្ត្រីក្រសួងព័ត៌មាន រួមទាំងមន្ត្រីសមាគមអ្នកសារព័ត៌មាន និងវិទ្យុទូរទស្សន៍មានគ្នាសរុប ១១នាក់ បានបញ្ចប់បេសកកម្មស៊ើបអង្កេតករណីចោទប្រកាន់គំរាមកំហែងការបំពេញវិជ្ជាជីវៈរបស់អ្នកសារព័ត៌មាននៅស្រុកវើនសៃ ខេត្តរតនគិរី ហើយនៅរសៀលថ្ងៃទី១៥ ខែកុម្ភៈ នេះ។
ប្រធានគណៈកម្មការចំពោះកិច្ច និងជាអនុរដ្ឋលេខាធិការក្រសួងព័ត៌មាន លោក អ៊ុក គឹមសេង បញ្ជាក់ថា ក្រុមការងារមិនទាន់វាយតម្លៃលទ្ធផលជាក់លាក់យ៉ាងណានៅឡើយ ក៏ប៉ុន្តែក្រុមការងារស៊ើបអង្កេតបានចុះទៅដល់ទីតាំងកើតហេតុជាច្រើនកន្លែង គ្រាដែលក្រុមអ្នកសារព័ត៌មានអះអាងថា បានរងនូវការគំរាមកំហែងដោយបង្កគ្រោះថ្នាក់ចរាចរណ៍ និងការប្រើអំពើហិង្សាស្ទាក់វាយក្រុមអ្នកកាសែតកំពុងបំពេញការងារយកព័ត៌មាន នៅស្រុកវើនសៃ។
លោកកត់សម្គាល់ថា អាជ្ញាធរមូលដ្ឋាន រួមទាំងជនពាក់ព័ន្ធ បានសហការល្អផ្តល់ព័ត៌មានជូនក្រុមការងារដែលធ្វើឲ្យការស៊ើបអង្កេតអាចបំពេញការងារបានចប់សព្វគ្រប់៖ « កន្លែងណាដែលយើងចង់ទៅ គាត់តែងបង្ហាញឲ្យយើងទៅ គេបង្ហាញកន្លែងរថយន្តប៉ះគ្នានៅបាតអូរ។ គេបង្ហាញកំណាត់ផ្លូវមួយដែលគេថាមានការពួនស្ទាក់វាយឡាន »។
កាលពីថ្ងៃទី២ ខែកុម្ភៈ អ្នកកាសែតក្នុងស្រុក ៦នាក់ និងមន្ត្រីអង្គការបរិស្ថានម្នាក់ បានដាក់ពាក្យប្ដឹងទៅអធិការដ្ឋាននគរបាលស្រុកវើនសៃ ខណៈដែលក្រុមអ្នកកាសែតបានជួបប្រទះពីរករណីក្នុងថ្ងៃតែមួយ ពោលគឺរថយន្តអ្នកកាសែតបីគ្រឿងត្រូវបានមនុស្សពីរក្រុម មួយក្រុមព្យាយាមបើកគោយន្តបុករថយន្តអ្នកកាសែតមួយគ្រឿង បន្ទាប់មកមនុស្សមួយក្រុមទៀត បានយកឈើបង្កប់ដែកគោលដាក់លើផ្លូវ ដើម្បីបញ្ឈប់រថយន្ត ហើយមនុស្សប្រមាណ ១០នាក់ប្រដាប់ដោយដំបងឈើ ដំបងដែក និងញញួរ ព្រួតគ្នាវាយបំបែកកញ្ចក់រថយន្តអ្នកកាសែតពីរគ្រឿង កាលពីថ្ងៃទី១ ខែកុម្ភៈ ប៉ុន្តែក្រុមអ្នកកាសែតជិះក្នុងរថយន្ត ព្យាយាមរត់គេចពីការវាយប្រហារនេះ។
អធិការប៉ូលិសស្រុកវើនសៃ លោក ទឺ នូថង បញ្ជាក់ដែរថា សមត្ថកិច្ចមូលដ្ឋានបានសហការបង្ហាញទីតាំងកើតហេតុ និងជនពាក់ព័ន្ធជូនក្រុមការងារសាកសួររឿងហេតុដែលកើតឡើងអស់ហើយ។ លោកថា រហូតពេលនេះ អធិការដ្ឋានប៉ូលិសបានរកឃើញករណីទីមួយទាក់ទិនគ្រោះថ្នាក់ចរាចរណ៍។ ករណីនេះ ប៉ូលិសបានបញ្ជូនរបាយការណ៍ទៅស្នងការដ្ឋានប៉ូលិសរួចហើយ ដោយឡែកទាក់ទិនការវាយបំផ្លិចបំផ្លាញរថយន្តអ្នកកាសែត ប៉ូលិសកំពុងបន្តស៊ើបអង្កេតរកមុខសញ្ញាពាក់ព័ន្ធមកទទួលខុសត្រូវតាមផ្លូវច្បាប់៖ « គ្រោះថ្នាក់ចរាចរណ៍មានម្ចាស់ យើងហៅមក យើងមានកន្លែងត្រួតពិនិត្យរឿងហេតុនេះ តើគ្រោះថ្នាក់ចរាចរណ៍ហ្នឹងវាកើតដោយរបៀបណា ? វានៅរឿងបំផ្លិចបំផ្លាញរថយន្តរបស់គាត់ ឋិតនៅការស្រាវជ្រាវរបស់សមត្ថកិច្ច »។
ប្រធានក្រុមប្រឹក្សាសារព័ត៌មានកម្ពុជា លោក សុខ សុវណ្ណ ដែលជាដើមបណ្ដឹងក្នុងករណីនេះ បានស្វាគមន៍ក្រុមការងារស៊ើបអង្កេតរបស់ថ្នាក់ក្រសួង និងរំពឹងថា យុត្តិធម៌នឹងត្រូវរកឃើញពាក់ព័ន្ធការវាយប្រហារមកលើក្រុមអ្នកកាសែតនេះ។ លោកនៅតែរក្សាជំហរចោទថា ការប្រើអំពើហិង្សានេះជារឿងប៉ុនប៉ងធ្វើឃាតក្រុមអ្នកកាសែតដោយក្រុមឈ្មួញរកឃើញឈើនៅតំបន់នោះ៖ « យើងកំពុងរង់ចាំថា តើចំណាត់ការយ៉ាងម៉េច ? យុត្តិធម៌អាចរកឃើញអត់ ? ការទាមទារនៅដដែល មិនមែនគ្រោះថ្នាក់របៀបហ្នឹង។ យើងប្រហែសតែបន្តិច គ្នាយើងមានស្លាប់ខ្លះ »។
អ្នកកាសែត និងមន្ត្រីបរិស្ថាន រងការគំរាមកំហែង រួមមាន អង្គភាពក្រុមប្រឹក្សាសារព័ត៌មានកម្ពុជា កាសែតជួយខ្មែរ កាសែតភ្នំពេញប្រែស កាសែតថ្ងៃនេះ មជ្ឈមណ្ឌលព័ត៌មានថ្ងៃនេះ សមាគមខ្មែរ អ្នកសារព័ត៌មានប្រជាធិបតេយ្យ និងអង្គការឃ្លាំមើលថែរក្សាធនធានធម្មជាតិ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។