មន្ត្រីជាន់ខ្ពស់របស់ក្រសួងមហាផ្ទៃកម្ពុជា កាលពីថ្ងៃពុធ ទី៤ កុម្ភៈ បានព្រមានធ្ងន់ៗទៅកាន់មន្ត្រីសិទ្ធិមនុស្សក្នុងស្រុក កុំឲ្យប្រើប្រាស់ពាក្យម៉ុងតាញ៉ា ក្នុងការហៅក្រុមជនជាតិភាគតិចចារ៉ាយ-វៀតណាម ដែលតែងភៀសខ្លួនសុំសិទ្ធិជ្រកកោនក្នុងប្រទេសកម្ពុជា។ ប៉ុន្តែមន្ត្រីសិទ្ធិមនុស្សរូបនោះអះអាងថា ខ្លួនបានបំពេញការងារតាមផ្លូវច្បាប់ប៉ុណ្ណោះ។
អ្នកនាំពាក្យក្រសួងមហាផ្ទៃ លោកឧត្តមសេនីយ៍ ខៀវ សុភ័គ បានព្រមាន លោក ឆាយ ធី ដែលជាអ្នកសម្របសម្រួលរបស់សមាគមការពារសិទ្ធិមនុស្សអាដហុក (ADHOC) ថាមិនត្រូវប្រើពាក្យម៉ុងតាញ៉ា ក្នុងការហៅឈ្មោះក្រុមជនជាតិដើមភាគតិចចារ៉ាយ-វៀតណាម នោះឡើយ បើមិនដូច្នោះទេនោះ វិធានការច្បាប់នឹងយកមកអនុវត្ត។ លោក ខៀវ សុភ័គ ចោទប្រកាន់ លោក ឆាយ ធី ថាកំពុងផ្សព្វផ្សាយព័ត៌មានមិនពិត៖ «គ្រាន់តែជម្រាបជូនគាត់ថា ឲ្យគាត់ប្រយ័ត្នប្រយែងក្នុងការផ្សព្វផ្សាយព័ត៌មានហ្នឹង។ យើងក៏មិនចង់យកវិធានការច្បាប់មកអនុវត្តដែរ វាដូចជាព្រមានអ៊ីចឹង។ គឺថា កុំងងើលក្នុងការផ្សព្វផ្សាយព័ត៌មានមិនពិត បើមិនដូច្នោះទេ គឺគេមានវិធានការហើយ។ តែនេះជាការព្រមានមួយ បើមានករណីចាំបាច់មកទៀត អាហ្នឹងគឺត្រូវហើយ»។
លោកបន្តថា ការប្រើពាក្យម៉ុងតាញ៉ា បាន លុះត្រាតែអ្នកទាំងនោះរងការគាបសង្កត់ដោយនយោបាយពីរដ្ឋាភិបាលវៀតណាម។ ហើយអ្នកដែលគ្រាន់តែចូលមកធ្វើចម្ការលួចលាក់ មិនត្រូវចាត់ទុកថាជាម៉ុងតាញ៉ា នោះឡើយ។ លោកថា ពួកគេគ្រាន់តែក្រុមចារ៉ាយ-វៀតណាម ប៉ុណ្ណោះ។
ទោះជាយ៉ាងណាក៏ដោយ លោក ឆាយ ធី មានប្រសាសន៍ថា ពាក្យចារ៉ាយ-វៀតណាម និងពាក្យម៉ុងតាញ៉ា គឺដូចគ្នា។ លោកបន្តថា ពាក្យម៉ុងតាញ៉ា ជាពាក្យដែលបារាំង បានដាក់ឈ្មោះឲ្យពួកគេប៉ុណ្ណោះ ដោយសារពលរដ្ឋម៉ុងតាញ៉ា ជាក្រុមមនុស្សដែលរស់នៅតាមតំបន់ភ្នំនៃប្រទេសវៀតណាម។ លោកបន្តថា ការភៀសខ្លួនរបស់ចារ៉ាយ-វៀតណាម ឬក្រុមម៉ុងតាញ៉ា នោះ ភាគច្រើនគឺដើម្បីបុព្វហេតុសុំសិទ្ធិជ្រកកោនផ្នែកនយោបាយក្នុងប្រទេសកម្ពុជា ដោយសារកម្ពុជា ជាប្រទេសម្ចាស់ហត្ថលេខីនៃអនុសញ្ញាស្ដីពីជនភៀសខ្លួនរបស់អង្គការសហប្រជាជាតិ ឆ្នាំ១៩៥១។
ទាក់ទិននឹងការព្រមានរបស់មន្ត្រីក្រសួងមហាផ្ទៃ នេះដែរ លោក ឆាយ ធី អះអាងថា លោកនៅតែបន្តធ្វើការងាររបស់លោកស្របតាមច្បាប់ដដែល បើទោះបីមានការគំរាម ឬព្រមានរបស់សមត្ថកិច្ចរដ្ឋាភិបាលក៏ដោយ៖ «យើងនៅតែបន្តបំពេញតួនាទីដដែល ទោះជាយើងរងនូវការគំរាមកំហែងក៏ដោយ ព្រោះជាតួនាទីរបស់ខ្ញុំ គឺខ្ញុំមិនចាកចេញទៅណាទេ។ ជាទូទៅ ពាក្យហ្នឹងមិនមែនខ្ញុំជាអ្នកប្រើទេ គឺអ្នកកាសែតតែងតែសរសេរអ៊ីចឹង។ ហើយខ្ញុំមិនបានដាក់ឈ្មោះទេ។ តាមពិតទៅអត្តសញ្ញាណពួកគាត់ហ្នឹង គឺជាចារ៉ាយ-វៀតណាម ហើយ ប៉ុន្តែដោយសារមានសារព័ត៌មានសរសេរម៉ុងតាញ៉ា ហ្នឹងទៅ ហើយមានអ្នកខ្លះគេថាជាភាសាបរទេសទេ សំដៅទៅលើតំបន់ភ្នំ។ ម៉ុងតាញ៉ាៗ គឺសំដៅទៅលើក្រុមកុលសម្ព័ន្ធតំបន់ភ្នំ»។
កាលពីខែមករា ឆ្នាំ២០១៥ ក្រុមម៉ុងតាញ៉ា ប្រហែល ៣២នាក់បានភៀសខ្លួនមកកាន់កម្ពុជា ជាបន្តបន្ទាប់ ដើម្បីសុំសិទ្ធិជ្រកកោនផ្នែកនយោបាយ ប៉ុន្តែត្រូវសមត្ថកិច្ចកម្ពុជា ចាប់ខ្លួនបាន ៥នាក់ ហើយបញ្ជូនទៅកាន់ប្រទេសវៀតណាម វិញ។ រហូតមកទល់ពេលនេះមានក្រុមម៉ុងតាញ៉ា ទាំងនោះនៅសល់តែ ២៧នាក់ប៉ុណ្ណោះ ដែលបន្តលាក់ខ្លួនក្នុងព្រៃនៃខេត្តរតនគិរី។
ក្រុមកុលសម្ព័ន្ធម៉ុងតាញ៉ា ត្រូវបានបារាំង ដាក់ឲ្យរស់នៅជាស្វយ័តក្នុងភូមិភាគកណ្ដាលនៃប្រទេសវៀតណាម។ នៅឆ្នាំ១៩៥៥ ទឹកដីស្វយ័តនេះត្រូវបានបារាំង លុបចោលទាំងស្រុង ហើយកាត់ទៅឲ្យរដ្ឋាភិបាលវៀតណាមខាងត្បូង ដែលដឹកនាំដោយលោកប្រធានាធិបតី ងូវ ដីញយៀម (Ngo Dinh Diem)។ មួយឆ្នាំក្រោយមក រដ្ឋាភិបាលវៀតណាមខាងត្បូង បានប្ដូរមេដឹកនាំរបស់កុលសម្ព័ន្ធម៉ុងតាញ៉ា ដាក់ជំនួសដោយជនជាតិវៀតណាម ធ្វើជាមេដឹកនាំវិញ។ វៀតណាម មិនត្រឹមតែគ្រប់គ្រងកងទ័ពទាំងមូលរបស់កុលសម្ព័ន្ធម៉ុងតាញ៉ា ប៉ុណ្ណោះទេ តែថែមទាំងបានប្ដូរឈ្មោះរបស់ជនជាតិដើមភាគតិចមួយនេះ ឲ្យទៅជាឈ្មោះវៀតណាម ទាំងអស់។
ក្រោយមកទៀត រដ្ឋាភិបាលរបស់ លោក ងូវ ដីញយៀម (Ngo Dinh Diem) នៃរដ្ឋាភិបាលវៀតណាមខាងត្បូង បានបញ្ចូលជនភៀសខ្លួនវៀតណាមខាងជើង ១លាននាក់ ឲ្យទៅរស់នៅក្នុងទឹកដីភូមិភាគកណ្ដាលនៃក្រុមកុលសម្ព័ន្ធម៉ុងតាញ៉ា ថែមទៀត។ ពេលនោះ សាសនា ប្រពៃណី ទំនៀមទម្លាប់ និងវប្បធម៌របស់ពួកគេ ត្រូវបានបំផ្លាញ និងសាបរលាប៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។