សង្គមស៊ីវិល សម្ដែងក្តីព្រួយបារម្ភជាថ្មីចំពោះអំពើហិង្សា និងឃាតកម្មកើតលើស្ត្រី។ ក្តីព្រួយបារម្ភនេះ ដោយសារក្នុងរយៈពេលចុងក្រោយនេះ មានករណីអំពើហិង្សា និងឃាតកម្មសាហាវលើស្ត្រី បានក្លាយជាប្រធានបទនៃការផ្សព្វផ្សាយ និងពិភាក្សាគ្នាជាប់មិនដាច់នៅឡើយ ទាំងនៅលើទំព័រសារព័ត៌មាន ប្រព័ន្ធផ្សព្វផ្សាយ និងបណ្ដាញសង្គមហ្វេសប៊ុក (Facebook) ជាដើម។
ក្រុមអង្គការមិនមែនរដ្ឋាភិបាលធ្វើការងារលើកកម្ពស់សិទ្ធិស្ត្រី បានមើលឃើញថា ការអនុវត្តច្បាប់មិនមានប្រសិទ្ធភាព និងធូររលុងនេះហើយ ដែលជាមូលហេតុមួយក្នុងចំណោមមូលហេតុជាច្រើនទៀត ដែលធ្វើឲ្យអំពើហិង្សាលើស្ត្រីនៅតែបន្តកើតមាន មិនថាក្នុងសង្គមគ្រួសារ និងសង្គមជាតិទាំងមូល។
នាយិកាប្រតិបត្តិនៃអង្គការសីលការ (SILAKA)និងជាប្រធានដឹកនាំនៃគណៈកម្មាធិការលើកស្ទួយស្ត្រីក្នុងវិស័យនយោបាយ អ្នកស្រី ធីតា ឃឹះ មានប្រសាសន៍ថា មូលហេតុចម្បងមួយនៃអំពើហិង្សាលើស្ត្រី គឺការរើសអើងពីសង្គម មិនឲ្យតម្លៃ ដែលសង្គមនៅចាត់ទុកស្ត្រីថាជាភេទដែលអាចប្រមាថ និងបំពានសិទ្ធិពីដៃគូជាបុរស។ ករណីនេះ អ្នកស្រីជំរុញឲ្យសមត្ថកិច្ចមានចំណាត់ការឲ្យបានម៉ឺងម៉ាត់ ដើម្បីស្វែងរកយុត្តិធម៌ជូនស្ត្រីរងគ្រោះ៖ « សង្គមយើងនៅមានការរើសអើង ការមើលស្រាលទៅលើស្ត្រី មិនទទួលស្គាល់ស្ត្រី ថាជាមនុស្សពេញលក្ខណៈ។ ខ្ញុំសូមឲ្យសមត្ថកិច្ចផ្ដន្ទាទោសតាមបទប្បញ្ញត្តិ »។
អ្នកគ្រប់គ្រងបច្ចេកទេសការិយាល័យស៊ើបអង្កេតនៃអង្គការលីកាដូ (LICADHO) លោក អំ សំអាត សង្កេតឃើញថា អំពើហិង្សាគ្រប់រូបភាពលើស្ត្រីនៅមានកម្រិតខ្ពស់នៅឡើយ ក្នុងនោះរួមទាំងអំពើហិង្សាក្នុងគ្រួសារ ឃាតកម្ម ការរំលោភសេពសន្ថវៈ អំពើហិង្សាផ្លូវភេទ និងការកេងប្រវ័ញ្ច ជាដើម។ លោកបន្តថា បញ្ហានេះកើតឡើងភាគច្រើនមកពីការអនុវត្តគោលនយោបាយ និងប្រព័ន្ធច្បាប់នៅខ្វះចន្លោះ ខ្វះការគាំទ្រឲ្យស្ត្រីចេញមុខទាមទារយុត្តិធម៌ វប្បធម៌និទ្ទណ្ឌភាព ការសម្រុះសម្រួល និងផ្ដល់សំណងក្រៅប្រព័ន្ធតុលាការ និងចំណេះដឹងផ្នែកយេនឌ័រ ជាដើម។
អ្នកការពារសិទ្ធិមនុស្សរូបនេះ ស្នើរដ្ឋាភិបាលគួរមានគោលនយោបាយច្បាស់លាស់ ពង្រឹងសមត្ថភាពផ្នែកបច្ចេកទេសមន្ត្រីសមត្ថកិច្ច ក្នុងការអនុវត្តច្បាប់ និងស៊ើបអង្កេត ពិសេសកំណែទម្រង់ប្រព័ន្ធតុលាការ៖ « រដ្ឋាភិបាលគួរតែពិចារណាឡើងវិញអំពីសមត្ថកិច្ចឲ្យធ្វើការបង្ក្រាបឲ្យមានប្រសិទ្ធភាព បូកផ្សំទាំងតុលាការផង ត្រូវតែអនុវត្តឲ្យបានម៉ត់ចត់ »។
វិទ្យុអាស៊ីសេរី មិនអាចទាក់ទងមន្ត្រីក្រសួងកិច្ចការនារី ដើម្បីដឹងពីវិធានការទប់ស្កាត់អំពើហិង្សាលើស្ត្រីបាននៅឡើយ នៅថ្ងៃទី២០ ខែកុម្ភៈ។
ករណីហិង្សាលើស្ត្រីនេះដែរ ក្នុងឱកាសចុះសួរសុខទុក្ខពលរដ្ឋនៅខេត្តកំពង់ធំ នៅថ្ងៃទី២០ ខែកុម្ភៈ ប្រធានកាកបាទក្រហមកម្ពុជា អ្នកស្រី ប៊ុន រ៉ានី ហ៊ុន សែន ក៏អំពាវនាវប្រជាពលរដ្ឋកម្ពុជា ទាំងអស់ នាំគ្នាលុបបំបាត់អំពើហិង្សានានា និងការជួញដូរមនុស្ស កុមារ និងគ្រឿងញៀនផ្សេងៗ ដើម្បីស្ថិរភាពសង្គមកម្ពុជា។
ក្នុងរយៈពេលជិតមួយខែមកនេះ នៅតាមប្រព័ន្ធផ្សព្វផ្សាយនានា ជាពិសេសបណ្ដាញសង្គមហ្វេសប៊ុក បានផ្សព្វផ្សាយករណីអំពើហិង្សាធំៗលើស្ត្រីមួយចំនួន ដែលរួមមាន ករណីឃាតកម្មលើស្ត្រីម្នាក់ដោយកាត់ក្បាលនៅខេត្តសៀមរាប ករណីជះទឹកអាស៊ីតលើស្ត្រីដែលជាកម្មកររោងចក្រនៅខេត្តកំពង់ចាម និងករណីស្ត្រីដែលស្លាប់ដោយត្រូវប្ដីបើកឡានបុក ជាដើម។
របាយការណ៍របស់អង្គការលីកាដូ បង្ហាញថា គិតចាប់ពីខែមករា ដល់ខែកុម្ភៈ ឆ្នាំ២០១៦ នេះ អង្គការលីកាដូ ទទួលបានករណីអំពើហិង្សាលើស្ត្រីនៅប្រទេសកម្ពុជា បានជិត ២០ករណី ភាគច្រើនជាករណីហិង្សាដែលមានស្ថានភាពធ្ងន់ធ្ងរជាងឆ្នាំ២០១៥។ មូលហេតុសំខាន់ៗនៃអំពើហិង្សាទាំងនោះ គឺកើតឡើងដោយសារជម្លោះស្នេហាត្រីកោណ ការគុំកួន និងការប្រច័ណ្ឌ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។