ឪពុកម្ដាយសិស្សចំនួន ៤នាក់ បានប្ដឹងចោទប្រកាន់គ្រូបង្រៀននៅសាលាបឋមសិក្សាថ្មកែវ ស្ថិតក្នុងភូមិថ្មកែវ ឃុំស្វាយជ្រំ ស្រុករលាប្អៀរ ខេត្តកំពង់ឆ្នាំង ថាបានបៀតបៀនកេរ្តិ៍ខ្មាសកូនស្រីពួកគាត់។
ឪពុកកុមារីអាយុ ១៤ឆ្នាំ ជាសិស្សថ្នាក់ទី៦ នៃសាលាបឋមសិក្សាថ្មកែវ។ គាត់បានឲ្យដឹងនៅព្រឹកថ្ងៃទី២៦ ឧសភា ថា ឈ្មោះ កែម ចាន់ឈេន ជាគ្រូបង្រៀនថ្នាក់ទី៦ នៅសាលាបឋមសិក្សាថ្មកែវ បានប្រព្រឹត្តអំពើពុំគប្បីចំពោះកូនស្រីគាត់ជាច្រើនលើកច្រើនសា តែនៅលើកចុងក្រោយ គឺលោកគ្រូរូបនេះមានបំណងចាប់រំលោភ តែពុំបានសម្រេច៖ «រឿងនេះមិនមែនធម្មតាឯណាអូន មិនមែនតែកូនខ្ញុំម្នាក់ឯណា មានកូនគេ ៣នាក់ទៀត។ ដល់ពួកខ្ញុំប្ដឹងឡើងទៅ ហើយខាងប៉ូលិស ប៉េអិម គេបែរជាធ្វើមិនដឹង។ ឥឡូវគ្រូហ្នឹងគាត់មកបង្រៀនវិញ ធ្វើឲ្យក្មេងៗខ្លាចអត់ហ៊ានទៅរៀនទេ»។
កុមារី ៤នាក់ ដែលរងការបៀតបៀនកេរ្តិ៍ខ្មាសពីសំណាក់លោកគ្រូ កែម ចាន់ឈេន បានឲ្យដឹងដូចៗគ្នាថា គ្រូរូបនេះបានប្រព្រឹត្តអំពើឥតកេរ្តិ៍ខ្មាសមកលើពួកខ្លួនទាំង ៤នាក់នេះជាច្រើនដងរាប់មិនអស់ ហើយបានគំរាមថា បើដឹងឮដល់អ្នកផ្សេង ពួកនាងនឹងរងទណ្ឌកម្ម និងដាក់ពិន្ទុសូន្យជាដើម៖ «ពេលគេចេញទៅពលកម្ម គាត់ឲ្យខ្ញុំនៅចាំថ្នាក់។ ដល់ពេលគេចេញទៅអស់ គាត់មកចាប់សម្រាតសំពត់ខ្ញុំៗរើបម្រាសយ៉ាងខ្លាំង ខ្ញុំធាក់ចំពងគាត់មួយជើង រួចខ្ញុំស្ទុះរត់ចេញ។ គាត់គំរាមខ្ញុំ និងមិត្តភ័ក្ដិខ្ញុំ ថាបើខ្ញុំប្រាប់ម៉ែឪ គាត់អត់ដាក់ពិន្ទុឲ្យពួកខ្ញុំទេ»។
ប៉ុន្តែ លោកគ្រូ កែម ចាន់ឈេន បានបដិសេធការចោទប្រកាន់របស់សិស្សទាំង ៤រូប ព្រមទាំងឪពុកម្ដាយសិស្សទាំងនោះ ថាបានចោទប្រកាន់លោកដោយគ្មានភស្តុតាង៖ «ខ្ញុំអត់បានធ្វើអ៊ីចឹងទេបង គេស្អប់ខ្ញុំ ហើយចេះតែចោទប្រកាន់ខ្ញុំទេ»។
បន្ទាប់ពីឪពុកម្ដាយកុមារីទាំង ៤រូបនេះបានដាក់ពាក្យបណ្ដឹង អាជ្ញាធរបានកោះហៅលោកគ្រូបង្រៀនរូបនេះទៅសាកសួរ។ តែបច្ចុប្បន្ន គេឃើញលោកគ្រូ កែម ចាន់ឈេន នៅតែបន្តបង្រៀនដដែល ជាហេតុធ្វើឲ្យកុមារីទាំង ៤រូប ដែលបានបើកកកាយអំពើអាស្រូវនេះមានការភ័យខ្លាច និងបោះបង់ចោលការសិក្សា។
ទាក់ទិនចំពោះបញ្ហានេះ ប្រធានការិយាល័យស្រាវជ្រាវផ្នែកព្រហ្មទណ្ឌកងរាជអាវុធហត្ថខេត្តកំពង់ឆ្នាំង លោក លឹម ហាក់ មានប្រសាសន៍ថា បន្ទាប់ពីហៅមកសាកសួរលោកគ្រូ កែម ចាន់ឈេន បានបដិសេធការចោទប្រកាន់។ លោកថា ដោយករណីនេះមិនមែនជារឿងព្រហ្មទណ្ឌជាក់ស្ដែង គេពុំអាចឃាត់ខ្លួនជនសង្ស័យបានទេ៖ «ដោយករណីនេះជាករណីមិនជាក់ស្ដែង ដូច្នេះយើងគ្រាន់តែឃាត់ខ្លួនគេបណ្ដោះអាសន្ន ដើម្បីសាកសួរប៉ុណ្ណោះ យើពុំអាចឃុំខ្លួនគេទេ។ លុះត្រាព្រះរាជអាជ្ញា ទើបមានសិទ្ធិបញ្ជាការឃុំខ្លួន។ តែរឿងនេះ គាត់អត់បញ្ជាឲ្យឃុំខ្លួនទេ ហេតុបើយើងឃុំខ្លួនគេ គឺខុសនឹងនីតិវិធីហើយ»។
យ៉ាងនេះក្ដី មន្ត្រីសម្របសម្រួលសមាគមអាដហុក (Adhoc) ខេត្តកំពង់ឆ្នាំង លោក សំ ច័ន្ទគា មានប្រសាសន៍ថា តាមនីតិវិធី គេត្រូវបញ្ឈប់បណ្ដោះអាសន្ន ឬផ្លាស់ប្ដូរសាលា មិនត្រូវបន្តឲ្យលោក កែម ចាន់ឈេន បង្រៀននៅសាលាដដែលដូច្នេះទេ ព្រោះអាចបណ្ដាលឲ្យដើមបណ្ដឹងមានការភ័យខ្លាច ព្រោះជនសង្ស័យជាអ្នកមានឥទ្ធិពល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។