យុវជនមួយក្រុមដែលកំពុងរៀននៅមហាវិទ្យាល័យ បានរួមគ្នាធ្វើការងារដោយស្ម័គ្រចិត្តរយៈពេលជិត ៤ឆ្នាំហើយលើបញ្ហាស្ត្រី និងកុមារ។ ក្រុមនេះមានឈ្មោះថា ក្លឹបរួបរួមនៃយុវជនកម្ពុជា ហៅកាត់ជាភាសាអង់គ្លេសថា ជេ.អូ.វ៉ាយ (JOY = Joint of Youth Cambodia)។
ក្នុងពេលនេះ ពួកគេកំពុងធ្វើការងារជាដៃគូជាមួយអង្គការមិនមែនរដ្ឋាភិបាលក្នុងស្រុក ដើម្បីកៀរគរសាធារណជនឲ្យយល់ដឹងពីបញ្ហាស្ត្រីក្នុងផ្នែកសំខាន់ៗមួយចំនួន រួមមាន ស្ត្រី និងភាពជាអ្នកដឹកនាំ ស្ត្រីនៅក្នុងដំណើរការធ្វើសេចក្ដីសម្រេច និងស្ត្រីក្នុងវិស័យបច្ចេកវិទ្យាព័ត៌មានវិទ្យា និងសារគមនាគមន៍ ហៅកាត់ថា អាយ.ស៊ី.ធី (ICT)។ សកម្មភាពថ្មីនេះរួមមាន ការប្រកួតរូបថត ការជជែកដេញដោល និងការចែករំលែកបទពិសោធន៍របស់ស្ត្រីដែលមានបទពិសោធន៍ការងារពាក់ព័ន្ធ។
នៅពេលថ្ងៃត្រង់នៅក្នុងបន្ទប់ភោជនីយដ្ឋានមួយក្នុងរាជធានីភ្នំពេញ យុវជនមួយក្រុមមានគ្នា ៥នាក់ មានអាយុជាង ២០ឆ្នាំ កំពុងធ្វើការរួមគ្នា។ ពួកគេកំពុងផ្ដោតលើសកម្មភាពថ្មី ដែលពួកគេកំពុងទទួលបន្ទុកត្រូវធ្វើនៅក្រៅម៉ោងសិក្សា ដែលនោះជាគម្រោងលើកកម្ពស់សិទ្ធិស្ត្រី។
តំណាងក្រុមមួយរូប គឺយុវជន ព្រីង ឃុន ដែលមានអាយុ ២២ឆ្នាំ ជានិស្សិតឆ្នាំទី៤ ផ្នែកទំនាក់ទំនងអន្តរជាតិ លើកឡើងថា ក្រុមនេះបង្កើតឡើងក្នុងឆ្នាំ២០១២ ដោយចាប់ផ្ដើមការងារស្ម័គ្រចិត្តទៅលើបញ្ហាកុមារបោះបង់ចោលការសិក្សានៅក្នុងខេត្តតាកែវ។ បន្តបន្ទាប់មកទៀត ក៏បានសហការធ្វើការងារផ្នែកស្ត្រី និងកុមារជាមួយអង្គការជាតិ និងអន្តរជាតិមួយចំនួន រួមទាំងមូលនិធិអង្គការសហប្រជាជាតិដើម្បីស្ត្រី ហៅថា យូ.អិន.វ៉ូមែន (UNWOMEN) និងមូលនិធិសហប្រជាជាតិដើម្បីកុមារ ហៅកាត់ថា យូនីសេហ្វ (UNICEF)។ សម្រាប់ដើមឆ្នាំ២០១៦ នេះ ពួកគេកំពុងជាប់ដៃនឹងគម្រោងសហការជាមួយគណៈកម្មការលើកស្ទួយស្ត្រីក្នុងវិស័យនយោបាយ៖ « រហូត មកដល់ សព្វថ្ងៃនេះ យើង កំពុងតែ ធ្វើគម្រោងមួយ ទៀត គឺទទួលបាន ថវិកា ពីសីលការ ដោយគាំទ្រពីអង្គការអុកស្វាម (Oxfarm) »។
យុវជនមួយរូបទៀតដែលជាសមាជិកក្នុងក្រុមនេះដែរ ឈ្មោះ យាង សិដ្ឋសមប្រាថ្នា ឲ្យដឹងថា ឈ្មោះនៃគម្រោងនេះ គឺយុវជនដើម្បីស្ត្រីក្នុងភាពជាអ្នកដឹកនាំ៖ « យើងបាន ធ្វើចាប់ពី ពាក់កណ្ដាល ខែមករា រហូតដល់ចុងខែមីនា។ ក្នុងហ្នឹងមានកម្មវិធីយុវជនជជែកពិភាក្សា ។ កម្មវិធីទី២ គឺ កម្មវិធីប្រកួត ប្រជែងរូបថតដែលយើងបានផ្សព្វផ្សាយតាម បណ្ដាញសង្គមហ្វេសប៊ុក (Facebook) ។ ទី៣ គឺកិច្ចពិភាក្សាជ្រុងមួយនៃស្ត្រី ដែលស្ត្រីគាត់មកចូលរួមចែករំលែក បទពិសោធន៍ »។
គម្រោងរបស់ក្រុមនេះជាផ្នែកមួយនៃគម្រោងស្រស់ (SROS) របស់គណៈកម្មការលើកស្ទួយស្ត្រីក្នុងវិស័យនយោបាយ នៃអង្គការសីលការ។ កម្មវិធីដែលមានរយៈពេលជិត ៣ខែ ជាសកម្មភាពចុងក្រោយរបស់គម្រោងស្រស់។
នៅក្នុងសេចក្ដីប្រកាសពីការប្រកួតរូបថតបញ្ជាក់ថា ការប្រកួតនេះមានប្រធានបទថា ចលនាស្ត្រីនៅកម្ពុជា នៅសតវត្សទី២១។ ការប្រកួតនេះ ជាចំណែកមួយក្នុងការប្រារព្ធទិវាអន្តរជាតិនារីថ្ងៃទី៨ ខែមីនា ខាងមុខ។
យុវជន យោក សេងហុង ដែលមានវ័យ ២១ឆ្នាំជានិស្សិតរួមជំនាន់នឹងយុវជនទាំងពីរខាងដើមដែរនោះ លើកឡើងថា គោលបំណងនៃការប្រកួតរូបថតនេះ គឺចង់នាំយកបញ្ហារបស់ស្ត្រីដែលមិនសូវបានយកចិត្តទុកដាក់មកបង្ហាញសាធារណជន៖ « រង្វាន់គឺយើងនឹងចែកជូននាឡិកាវៃឆ្លាត (Smart Watch) ។ បើតាម គំនិត ពួកយើង គឺចង់ឲ្យពួកគាត់យល់ដឹង ថា ស្ត្រី គួរតែ បាន លើកកម្ពស់ពួកគាត់ គួរតែ មានសិទ្ធិចូលរួម។ គាត់គួរ តែត្រូវបានអ្នក គ្រប់គ្នា ទទួលស្គាល់ ថា គាត់អាចធ្វើអ្វីបានដូច បុរសដែរ។ រង្វាន់មិនច្រើនដូចកម្មវិធីផ្សេងៗ ដោយសារយើងចង់ឲ្យគាត់ចូលរួមដោយសុទ្ធចិត្ត ក្នុងន័យ ឲ្យមាន ការផ្លាស់ប្ដូរ មិនមែនសំខាន់លើរង្វាន់ »។
យុវជន យោក សេងហុង ក៏បានលើកឡើងពីលក្ខខណ្ឌមួយចំនួនដែលត្រូវអនុវត្តក្នុងការចូលរួមការប្រកួតនេះ៖ « យើង មិនសំខាន់ ថា គាត់ប្រើប្រាស់ កាមេរ៉ា ប្រភេទណាទេ មិនថាទូរស័ព្ទដៃទេ សំខាន់ទំហំរូបថតមិនលើសពី ៥មហ្គាបៃត៍ (5MB) ឲ្យតែ មាន លក្ខណៈច្នៃប្រឌិត ដែលមិនមែនជា ការកែច្នៃ ក្នុងកម្មវិធី ផ្សេងៗទេ គឺជារូបភាព ច្នៃប្រឌិត »។
ក្រុមនេះបានចាប់ផ្ដើមប្រកាសពីការចូលរួមការប្រកួតនេះតាំងពីថ្ងៃទី១៤ ខែកុម្ភៈ កន្លងទៅ ហើយគ្រោងនឹងឈប់ទទួលរូបថតត្រឹមថ្ងៃទី២៩ ខែដដែលនេះ។
បើទោះជាមិនបានកំណត់ថា អ្នកថតរូបមិនមែនជាអ្នកអាជីព ក៏ការប្រកួតនេះ អ្នកចូលរួមត្រូវគិតពីបច្ចេកទេសក្នុងការថតរូប ពីក្រមសីលធម៌ និងត្រូវចេះបកស្រាយពីអត្ថន័យនៃរូបថតនោះផង។
ប្រធានបទនៃការប្រកួតដែលអ្នកចូលរួមត្រូវយកចិត្តទុកដាក់ គឺបញ្ហាស្ត្រី និងភាពជាអ្នកដឹកនាំស្ត្រីនៅក្នុងដំណើរការធ្វើសេចក្ដីសម្រេច និងស្ត្រីក្នុងវិស័យបច្ចេកវិទ្យាព័ត៌មានវិទ្យា និងសារគមនាគមន៍ ហៅកាត់ថា អាយ.ស៊ី.ធី (ICT)។
អ្នកសម្របសម្រួលនៃគណៈកម្មការលើកស្ទួយស្ត្រីក្នុងវិស័យនយោបាយ កញ្ញា សេង រាសី មានប្រសាសន៍ថា ការចាប់ដៃគូជាមួយក្រុមយុវជននេះ គឺដោយសារពួកគាត់សកម្មក្នុងការបំពេញការងារផ្នែកលើកកម្ពស់សិទ្ធិស្ត្រី និងកុមារ៖ « ក្រុមយុវជន ហ្នឹងគាត់មាន សមាជិកគាត់ទាំងអស់សុទ្ធតែ មានប្រវត្តិធ្វើកិច្ចការងារ ផ្នែកសិទ្ធិស្ត្រី និងភាពជាអ្នកដឹកនាំ ជាពិសេស ជាមួយអង្គការសហប្រជាជាតិ »។
ចំពោះគម្រោងប្រកួតថតរូប កញ្ញា សេង រាសី លើកឡើងថា គម្រោងរំពឹងថា យុវជនកាន់តែច្រើនបានចូលរួមស្វែងយល់ពីតួនាទីស្ត្រីក្នុងសង្គមតាំងពីពេលមុនមកដល់បច្ចុប្បន្ន៖ « រូបភាពដែល ចេញមក ហ្នឹង ចង់ឲ្យឃើញថា ស្ត្រីពីមុនមកដល់ឥឡូវហ្នឹង គាត់ដើរដល់ណាហើយ ។ អ្វី ដែលយើងមើលឃើញ ពីមុន គ្រាន់តែជារឿងពីមុន។ ឥឡូវជារឿងមួយថ្មី ថាតើយើងធ្វើយ៉ាងណាដែលអាចដើរទៅមុខទៀតបាន »។
កញ្ញា សេង រាសី សង្ឃឹមដែរថា នឹងមានអ្នកចូលរួមច្រើនក្នុងការប្រកួតរូបថតនេះ៖ « ប្រសិនបើគាត់អាចផ្ដល់រូបថតដែលពេញលេញ មានអត្ថន័យសមស្រប។ គាត់ពិតជាបានជំរុញលើកទឹកចិត្តយុវជន ជាពិសេសយុវតីកាន់តែច្រើនបានចូលរួមកិច្ចការសង្គម ក៏ដូចជាដើរតួនាទីស្មើភាពគ្នាក្នុងការជំរុញការអភិវឌ្ឍប្រកបដោយចីរភាពក្នុងប្រទេសយើងដែរ »។
កម្មវិធីផ្គូផ្គងជ្រើសរើសអ្នកដែលទទួលជ័យលាភី នឹងធ្វើនៅចំពោះមុខគណៈកម្មការ នៅថ្ងៃទី២ ខែមីនា។
នៅចុងក្រោយនៃគម្រោងនេះ គឺការវាយតម្លៃ និងការចែករំលែកបទពិសោធន៍របស់ស្ត្រីដែលគ្រោងនឹងធ្វើនៅថ្ងៃទី៥ ខែមីនា ខាងមុខ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។