សេចក្តីថ្លែងការណ៍របស់អង្គការសហប្រជាជាតិ ផ្នែកសិទ្ធិមនុស្ស កាលពីថ្ងៃអង្គារ បានឲ្យដឹងថា បុគ្គលិកស្ម័គ្រចិត្តរបស់អង្គការសហប្រជាជាតិ បានផ្តល់កិច្ចគាំពារ និងជួយដល់ជនរងគ្រោះនៃអំពើទារុណកម្មចំនួនប្រមាណ ៧ម៉ឺននាក់ក្នុងមួយឆ្នាំៗ។
លោក ក្លូឌីយ៉ូ ហ្គ្រូសមែន (Claudio Grossman) ប្រធានគណៈកម្មាធិការប្រឆាំងអំពើទារុណកម្មរបស់អង្គការសហប្រជាជាតិ បានអះអាងថា រដ្ឋាភិបាលប្រទេសជាច្រើននៅតែបន្តអនុវត្តអំពើទារុណកម្មដល់ពលរដ្ឋ និងបញ្ហាខ្វះការយកចិត្តទុកដាក់លើជនរងគ្រោះ ព្រមទាំងក្រុមគ្រួសាររបស់គេ។ ជាទូទៅ ជនរងគ្រោះទាំងនោះជួបការលំបាកទាំងផ្លូវកាយ ផ្លូវចិត្ត និងពុំទទួលបានយុត្តិធម៌ឡើយ។ មិនតែប៉ុណ្ណោះ រដ្ឋាភិបាលនៃប្រទេសទាំងនោះមិនបានផ្តល់សេវា និងធានាឲ្យជនរងគ្រោះ និងក្រុមគ្រួសាររបស់គេអាចកសាងជីវិត និងចូលទៅរស់នៅក្នុងសង្គមរបស់ពួកគេឡើងវិញបានឡើយ។
ក្រុមអ្នកជំនាញបន្តថា គន្លឹះសំខាន់របស់រដ្ឋាភិបាលប្រទេសនីមួយៗដែលត្រូវអនុវត្ត ដើម្បីការពារ និងទប់ស្កាត់អំពើទារុណកម្ម គឺលុបបំបាត់អំពើនិទ្ទណ្ឌភាព ឬភាពមិនដាក់ទោស និងពង្រឹងប្រព័ន្ធច្បាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។