មន្ត្រីជាន់ខ្ពស់គណបក្សប្រឆាំង ស្នើអ្នករាយការណ៍ពិសេសអង្គការសហប្រជាជាតិ (អ.ស.ប) ទទួលបន្ទុកសិទ្ធិមនុស្សប្រចាំកម្ពុជា អ្នកស្រី រ៉ូណា ស្មីត (Rhona Smith) ជំរុញទៅរដ្ឋាភិបាលឲ្យបញ្ឈប់បង្កការលំបាកដល់បក្សប្រឆាំង។ ការស្នើនេះ ធ្វើឡើងនៅក្នុងជំនួបរវាងប្រធានគណៈកម្មការសិទ្ធិមនុស្ស ទទួលពាក្យបណ្ដឹង និងអង្កេត នៃព្រឹទ្ធសភា លោក គង់ គាំ ជាមួយ អ្នកស្រី រ៉ូណា ស្មីត នៅព្រឹកថ្ងៃទី២៤ មីនា។
ក្រោយពីបានជួបប្រជុំជាមួយប្រធានគណៈកម្មការសិទ្ធិមនុស្ស និងទទួលពាក្យបណ្ដឹង នៃរដ្ឋសភា មកពីគណបក្សសង្គ្រោះជាតិ លោក អេង ឆៃអ៊ាង កាលពីថ្ងៃទី២៣ មីនា នៅថ្ងៃទី២៤ មីនា អ្នកស្រី រ៉ូណា ស្មីត បានជួបប្រជុំជាមួយ លោក គង់ គាំ ប្រធានគណៈកម្មការសិទ្ធិមនុស្ស និងទទួលពាក្យបណ្ដឹង នៃព្រឹទ្ធសភា ដែលមកពីគណបក្សប្រឆាំងដូចគ្នា។
លោក គង់ គាំ ឲ្យដឹងថា ក្នុងជំនួបជាមួយ អ្នកស្រី រ៉ូណា ស្មីត លោកបានលើកឡើងពីការរឹតត្បិតរបស់រដ្ឋាភិបាលទៅលើការសម្ដែងមតិរបស់តំណាងរាស្ត្រ និងសមាជិកព្រឹទ្ធសភា មកពីបក្សប្រឆាំង ក្នុងនោះក៏មានករណីរបស់សមាជិកព្រឹទ្ធសភា មកពីគណបក្ស សម រង្ស៊ី លោក ហុង សុខហួរ ដែលត្រូវបានសមាជិកព្រឹទ្ធសភា មកពីបក្សកាន់អំណាចបោះឆ្នោតដកអភ័យឯកសិទ្ធិសភា ហើយពេលនេះកំពុងជាប់ឃុំនៅក្នុងពន្ធនាគារដោយសារការសម្ដែងមតិរបស់ខ្លួន។
លោក គង់ គាំ ប្រាប់ អ្នកស្រី រ៉ូណា ស្មីត បន្ថែមថា ក្នុងករណីចាប់ខ្លួន លោក ហុង សុខហួរ នេះ គឺដោយសារស្ថាប័នតុលាការ និងស្ថាប័នព្រឹទ្ធសភា បានទទួលសម្ពាធពីរដ្ឋាភិបាល៖ « យើងបាន លើកឧទាហរណ៍ ជាក់ស្តែងពីសមាជិកព្រឹទ្ធសភា លោក ហុង សុខហួរ នីតិវិធីដែលធ្វើចំពោះ លោក ហុង សុខហួរ គឺមិនរក្សានូវនីតិវិធីនីតិប្បញ្ញត្តិឯករាជ្យពីនីតិប្រតិបត្តិនោះទេ ហាក់ទទួលឥទ្ធិពល និងសម្ពាធ យ៉ាងរហ័ស មិន ទុកពេល ឲ្យ ឆ្លើយតប មិន ទុកពេល ឲ្យ កែតម្រូវ មិនទុកពេលឲ្យបង្កើតគណៈកម្មការស្វែងរកការពិតជុំវិញការចោទប្រកាន់ លើ លោក ហុង សុខហួរ »។
ទំព័រហ្វេសប៊ុក (Facebook) របស់ការិយាល័យអង្គការសហប្រជាជាតិ ទទួលបន្ទុកសិទ្ធិមនុស្សប្រចាំកម្ពុជា ឲ្យដឹងថា ក្នុងជំនួបជាមួយ លោក គង់ គាំ អ្នកស្រី រ៉ូណា ស្មីត ពិភាក្សាអំពីសេរីសម្ដែងមតិ សេរីភាពជួបប្រជុំ និងបាតុកម្មដោយសន្តិវិធី សិទ្ធិជនជាតិដើម និងឯករាជភាពរបស់តុលាការ ជាដើម។
មុននឹងជួបប្រជុំជាមួយ លោក គង់ គាំ អ្នកស្រី រ៉ូណា ស្មីត ក៏បានជួបពិភាក្សាជាមួយប្រធានព្រឹទ្ធសភា លោក សាយ ឈុំ។ ក្នុងជំនួបនោះ ភាគីទាំងពីរបានជជែកពីនីតិវិធីដកអភ័យឯកសិទ្ធិសមាជិកសភា ពីវិធានការរបស់ព្រឹទ្ធសភា ក្នុងការពិនិត្យឡើងវិញនូវច្បាប់នានា ដើម្បីឲ្យស្របតាមការគោរពសិទ្ធិមនុស្ស ពីសេរីភាពសម្ដែងមតិ ការដោះស្រាយជម្លោះដីធ្លី និងពីការបោះឆ្នោតក្នុងពេលខាងមុខ។
អ្នកនាំពាក្យព្រឹទ្ធសភា លោក ម៉ម ប៊ុននាង មានប្រសាសន៍ថា ក្នុងជំនួបជាមួយ អ្នកស្រី រ៉ូណា ស្មីត ប្រធានព្រឹទ្ធសភា លោក សាយ ឈុំ បានពន្យល់អ្នកស្រីពីផ្លូវច្បាប់ទាក់ទងនឹងសំណុំរឿងរបស់ លោក ហុង សុខហួរ ព្រមទាំងពីនីតិវិធីនៃការដកអភ័យឯកសិទ្ធិសភារបស់សមាជិកព្រឹទ្ធសភាបក្សប្រឆាំងរូបនេះ ដែល លោក សាយ ឈុំ អះអាងថា បានធ្វើឡើងដោយស្របតាមផ្លូវច្បាប់៖ « គាត់ចង់ដឹងតែផ្លូវច្បាប់ទេ សម្ដេចបានជម្រាបហើយថាវា ផុតដៃ ព្រឹទ្ធសភា ទៅហើយ គឺ នៅលើ សមត្ថកិច្ច របស់តុលាការ និង ក្រសួងមហាផ្ទៃ។ អ៊ីចឹងស្ថាប័នទាំងពីរ គឺជាអ្នកអនុវត្ត បើគាត់ ចង់ដឹង ហេតុផល អ្វីផ្សេងទៀត គឺទៅក្រសួងទៅ ប៉ុន្តែគាត់អត់និយាយថាពិចារណាឡើងវិញអ្វីឡើយ គឺគាត់និយាយតែពីផ្លូវច្បាប់ប៉ុណ្ណោះទេ »។
ក្រៅពីជួប លោក សាយ ឈុំ និងលោក គង់ គាំ នៅថ្ងៃទី២៤ មីនា ដដែល អ្នកស្រី រ៉ូណា ស្មីត ក៏បានជួបពិភាក្សាជាមួយរដ្ឋមន្ត្រីក្រសួងអប់រំ លោក ហង់ ជួនណារ៉ុន និងរដ្ឋមន្ត្រីក្រសួងដែនដី នគរូបនីយកម្ម និងសំណង់ លោក អ៊ឹម ឈុនលឹម ផងដែរ។
ដោយឡែកនៅថ្ងៃទី២៥ មីនា អ្នកស្រី រ៉ូណា ស្មីត នឹងជួបពិភាក្សាជាមួយប្រធានគណៈកម្មាធិការជាតិរៀបចំការបោះឆ្នោត (គ.ជ.ប) លោក ស៊ិក ប៊ុនហុក ប្រធានគណៈកម្មាធិការសិទ្ធិមនុស្សរបស់រដ្ឋាភិបាល លោក ម៉ក់ សម្បត្តិ និងរដ្ឋមន្ត្រីក្រសួងអភិវឌ្ឍន៍ជនបទ លោក ជា សុផារ៉ា។
មន្ត្រីទំនាក់ទំនងនៃការិយាល័យឧត្ដមស្នងការអង្គការសហប្រជាជាតិ ទទួលបន្ទុកសិទ្ធិមនុស្សប្រចាំកម្ពុជា ឲ្យដឹងថា ក្នុងដំណើរទស្សនកិច្ចមកកាន់កម្ពុជា នៅលើកនេះ អ្នកស្រី រ៉ូណា ស្មីត នឹងមិនជួបពិភាក្សាជាមួយលោកនាយករដ្ឋមន្ត្រី ហ៊ុន សែន និងថ្នាក់ដឹកនាំបក្សប្រឆាំងនោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។