លិខិតដែលចុះហត្ថលេខាដោយនាយកអង្គការការពារសិទ្ធិជនជាតិភាគតិច លោក អាង ចន្ទរិទ្ធ សរសេរថា រដ្ឋាភិបាលកម្ពុជា និងគិញវៀតណាម មានគោលដៅចាប់ព្រះសង្ឃខ្មែរក្រោមទាំងនោះដោយចេតនានយោបាយ ព្រោះថា នៅពេលនោះមានព្រះសង្ឃខ្មែរច្រើនអង្គទៀត ដែលចូលរួមធ្វើបាតុកម្មមិនត្រូវបានចាប់ខ្លួនទេ៖ «យើងសុំទាញអារម្មណ៍លោកថា ការចាប់ព្រះសង្ឃខ្មែរក្រោម ៥អង្គកាលពីថ្ងៃទី២ មករា ឆ្នាំ២០១៤ ជាក់ស្ដែងពួកគេ (ព្រះសង្ឃទាំង៥អង្គ) ត្រូវបានគេកំណត់មុខសញ្ញាស្រេចហើយ ក្នុងចំណោមព្រះសង្ឃដទៃទៀត នៅកន្លែងបាតុកម្មនោះ»។
ស្របពេលនេះដែរ អង្គការការពារសិទ្ធិជនជាតិភាគតិច ក៏បានផ្ញើរបាយការណ៍អំពីការរំលោភសិទ្ធិព្រះសង្ឃខ្មែរក្រោម ដោយកងទាហានឆត្រយោងលេខ ៩១១ ដោយចោទថា កងទាហានឆត្រយោងបានវាយដំយ៉ាងឃោរឃៅ មុននឹងចាប់ព្រះសង្ឃកម្ពុជាក្រោម ៥អង្គចងស្លាបសេក បញ្ជូនចូលក្នុងបន្ទាយកាលពីថ្ងៃទី២។ របាយការណ៍អំពីការរំលោភព្រះសង្ឃខ្មែរក្រោមនោះសរសេរថា អំឡុងពេលឃុំខ្លួននៅក្នុងបន្ទាយទាហាន ព្រះសង្ឃទាំង ៥អង្គត្រូវបានកងទាហានវាយធ្វើទារុណកម្ម ដូចជាវាយព្រះកែស និងព្រះកាយរងរបួសយ៉ាងធ្ងន់ធ្ងរ។
របាយការណ៍ដដែលរៀបរាប់អំពីការធ្វើទុក្ខបុកម្នេញលើសិទ្ធិសេរីភាពរបស់ព្រះសង្ឃកម្ពុជាក្រោម ដែលភៀសព្រះកាយពីស្រុកកំណើត មកជ្រកកោននៅកម្ពុជា សព្វថ្ងៃថា កំពុងរងការធ្វើបាប គាបសង្កត់សិទ្ធិសេរីភាពពីសំណាក់រដ្ឋាភិបាលកម្ពុជា និងគិញវៀតណាម ហើយត្រូវបានអាជ្ញាធររដ្ឋាភិបាលកម្ពុជា និងគិញវៀតណាម បានតាមដានសកម្មភាពរស់នៅប្រចាំថ្ងៃយ៉ាងដិតដល់ ដូចជាបានលួចថតរូបភាព ឬជាខ្សែវីដេអូ ទុកជាឯកសារធ្វើជាភស្តុតាងដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។