លោក វីល្លៀម ថត លើកឡើងថា នៅក្នុងការបោះឆ្នោតដែលទើបកន្លងទៅថ្មីៗនេះ បានបង្ហាញយ៉ាងច្បាស់ថា ពលរដ្ឋកម្ពុជា ចង់អោយប្រទេសនេះឈានទៅមុខតាមរយៈការកែទម្រង់ ដែលអាចនាំមកនូវការផ្លាស់ប្ដូរពិតប្រាកដ។
ជាទស្សនៈផ្ទាល់ខ្លួន លោក វីល្លៀម ថត បញ្ជាក់ថា មធ្យោបាយមួយក្នុងការផ្លាស់ប្ដូរបរិយាកាសនាពេលបោះឆ្នោត ដើម្បីពង្រឹងដំណើរការប្រជាធិបតេយ្យ គឺការផ្តល់ព័ត៌មានដែលមានតុល្យភាព និងអាចទទួលបាននៅទូទាំងប្រទេស។ ស្របគ្នានេះ សេរីភាពទទួលបានព័ត៌មានក៏ជាកត្តាចាំបាច់។ លោកបន្តថា ពលរដ្ឋមិនអាចសម្រេចចិត្តដ៏ត្រឹមត្រូវបាន នៅពេលដែលពួកគេពុំបានទទួលព័ត៌មានគ្រប់ជ្រុងជ្រោយ។ ករណីនេះ បានកើតឡើងនៅក្នុងការឃោសនាបោះឆ្នោតកន្លងទៅ នៅពេលដែលពលរដ្ឋពិបាកក្នុងការស្វែងរកព័ត៌មានដែលអាចជឿទុកចិត្តបាន។
លោកបន្តថា ទោះបីពលរដ្ឋចាប់ផ្ដើមងាកមករកព័ត៌មានតាមអ៊ីនធឺណិត និងប្រើប្រាស់បណ្ដាញសង្គម ដើម្បីទទួលព័ត៌មាន ក៏ព័ត៌មានទាំងនោះពុំទាន់អាចចាត់ទុកថាជាមូលដ្ឋានក្នុងការជំរុញដំណើរការលទ្ធិប្រជាធិបតេយ្យឡើយ។ កត្តាចម្បង គឺការផ្តល់សេរីភាពពេញលេញដល់សារព័ត៌មានវិជ្ជាជីវៈ មានកាសែត វិទ្យុ និងទូរទស្សន៍ជាដើម ដែលពលរដ្ឋត្រូវការអោយដើរតួជាភ្នែក ជាត្រចៀក ជាអ្នកស៊ើបអង្កេតចំពោះរឿងរ៉ាវដែលពួកគេចង់ដឹង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។