យុវជន​ជាប់​ចោទ​គំរាម​នាយក​រដ្ឋមន្ត្រី​តាម​ហ្វេសប៊ុក​ប្រកាស​ឈប់​ប្រើ​គណនេយ្យ​ហ្វេសប៊ុក​ចាស់

ដោយ សូត សុខប្រាថ្នា
2016-02-10
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល
១០-កុម្ភៈ-២០១៦៖ យុវជន​ដែល​ជាប់​ចោទ​គំរាម​លោក​នាយក​រដ្ឋមន្ត្រី ហ៊ុន សែន តាម​ហ្វេសប៊ុក (Facebook) លោក ម៉ាន់ សំអ៊ាន់ អង្គុយ​នៅ​ក្រោម​ផ្ទះ ឋិត​នៅ​ភូមិ​ម្នាវ សង្កាត់​ស្រយ៉ូវ ក្រុង​ស្ទឹងសែន ខេត្ត​កំពង់ធំ ក្រោយ​ពេល​តុលាការ​ខេត្ត​កំពង់ធំ ដោះ​លែង​ឲ្យ​នៅ​ក្រៅ​ឃុំ​កាល​ពី​ថ្ងៃ​ទី​៤ ខែ​កុម្ភៈ ឆ្នាំ​២០១៦។ RFA/Saut Sokprathna
១០-កុម្ភៈ-២០១៦៖ យុវជន​ដែល​ជាប់​ចោទ​គំរាម​លោក​នាយក​រដ្ឋមន្ត្រី ហ៊ុន សែន តាម​ហ្វេសប៊ុក (Facebook) លោក ម៉ាន់ សំអ៊ាន់ អង្គុយ​នៅ​ក្រោម​ផ្ទះ ឋិត​នៅ​ភូមិ​ម្នាវ សង្កាត់​ស្រយ៉ូវ ក្រុង​ស្ទឹងសែន ខេត្ត​កំពង់ធំ ក្រោយ​ពេល​តុលាការ​ខេត្ត​កំពង់ធំ ដោះ​លែង​ឲ្យ​នៅ​ក្រៅ​ឃុំ​កាល​ពី​ថ្ងៃ​ទី​៤ ខែ​កុម្ភៈ ឆ្នាំ​២០១៦។ RFA/Saut Sokprathna
RFA/Saut Sokprathna

យុវជន​ម្នាក់​នៅ​ខេត្ត​កំពង់ធំ ដែល​ត្រូវ​បាន​តុលាការ​ឃុំ​ខ្លួន​ពាក់ព័ន្ធ​ករណី​គំរាម​លោក​នាយក​រដ្ឋមន្ត្រី ហ៊ុន សែន តាម​បណ្ដាញ​សង្គម ប្រកាស​ឈប់​ប្រើ​គណនេយ្យ​ហ្វេសប៊ុក (Facebook) របស់​ខ្លួន​បន្ត​ទៀត។ ការ​ប្រកាស​នេះ ធ្វើ​ឡើង​ក្រោយ​ពេល​តុលាការ​ខេត្ត​កំពង់ធំ សម្រេច​ដោះ​លែង​យុវជន​រូប​នោះ​ឲ្យ​នៅ​ក្រៅ​ឃុំ កាល​ពី​ថ្ងៃ​ទី​៤ កុម្ភៈ។

ក្រោយ​ពេល​តុលាការ​ដោះ​លែង​ពី​ពន្ធនាគារ យុវជន ម៉ាន់ សំអ៊ាន់ បាន​ប្រកាស​ថា គណនេយ្យ​ហ្វេសប៊ុក​ចាស់​របស់​ខ្លួន គឺ​លោក​ឈប់​ប្រើប្រាស់​ទៀត​ហើយ។ មិន​តែ​ប៉ុណ្ណោះ យុវជន​រូប​នេះ​បញ្ជាក់​ថា ប្រសិន​បើ​មាន​ហេតុការណ៍​អាក្រក់​ណា​មួយ​កើត​ឡើង​នៅ​លើ​គណនេយ្យ​ហ្វេសប៊ុក​ឈ្មោះ សំអ៊ាន់ កូកូ (Som Orn KoKo) គឺ​លោក​មិន​ទទួល​ខុស​ត្រូវ​ឡើយ។

រស់នៅ​សង្កាត់​ស្រយ៉ូវ ក្រុង​ស្ទឹងសែន លោក ម៉ាន់ សំអ៊ាន់ សម្ដែង​អារម្មណ៍​រីករាយ​ក្រោយ​ពេល​តុលាការ​សម្រេច​ដោះ​លែង​ឲ្យ​នៅ​ក្រៅ​ឃុំ ប៉ុន្តែ​ក្តី​រីករាយ​នេះ​នៅ​មិន​ទាន់​ឲ្យ​លោក​រីករាយ​អស់​ពី​ចិត្ត​នោះ​ទេ ពីព្រោះ​លោក​ចង់​ឲ្យ​តុលាការ​លើក​លែង​ការ​ចោទ​ប្រកាន់​ទាំងឡាយ ដើម្បី​ឲ្យ​លោក​មាន​សេរីភាព​ដូច​ដើម​វិញ។ ជាមួយ​គ្នា​នេះ លោក​ប្រកាស​ឈប់​ទទួល​ស្គាល់​គណនេយ្យ​ហ្វេសប៊ុក​ចាស់​ដែល​មាន​ឈ្មោះ សំអ៊ាន់ កូកូ ទៀត​ផង ប៉ុន្តែ​លោក​នៅ​មិន​ទាន់​ប្រាកដ​ថា នឹង​បង្កើត​គណនេយ្យ​ហ្វេសប៊ុក​ថ្មី​សម្រាប់​ប្រើ​បន្ត​ទៀត ឬ​យ៉ាង​ណា​នៅ​ឡើយ​ទេ ពីព្រោះ​លោក​មិន​មាន​ទូរស័ព្ទ​ប្រើប្រាស់ ម្យ៉ាង​ខ្លាច​មាន​បញ្ហា​ម្តង​ទៀត៖ «ខ្ញុំ​ឈប់​ប្រើ​ទៀត ណា​មួយ​ខ្ញុំ​អត់​មាន​លទ្ធភាព​ទិញ​ទូរស័ព្ទ​ប្រើ​ដែរ។ ខ្ញុំ​ប្រកាស​បិទ​លេខ​ហ្នឹង​ទៅ ថ្ងៃ​ក្រោយ​ប្រសិន​បើ​មាន​បញ្ហា​អី ខ្ញុំ​អត់​ទទួល​ស្គាល់​ទៀត​ទេ»

យុវជន ម៉ាន់ សំអ៊ាន់ ត្រូវ​បាន​សមត្ថកិច្ច​នៃ​ក្រសួង​មហាផ្ទៃ ចាប់​ខ្លួន​កាល​ពី​ថ្ងៃ​ទី​៦ មករា ហើយ​ឃុំ​ខ្លួន​នៅ​ពន្ធនាគារ​ខេត្ត​កំពង់ធំ កាល​ពី​ថ្ងៃ​ទី​៩ មករា ដោយ​តុលាការ​ចោទ​ប្រកាន់​ពី​បទ​គំរាម​កំហែង​ថា នឹង​សម្លាប់ ព្រម​ទាំង​បទ​ប្រមាថ​លោក​នាយក​រដ្ឋមន្ត្រី ហ៊ុន សែន នៅ​លើ​បណ្ដាញ​ទំនាក់ទំនង​សង្គម​ហ្វេសប៊ុក​កាល​ពី​ដើម​ខែ​មករា។

ជាមួយ​គ្នា​នេះ កាល​ពី​ថ្ងៃ​ទី​៤ កុម្ភៈ សាលា​ដំបូង​ខេត្ត​កំពង់ធំ ដែល​មាន​ចៅក្រម​ស៊ើបសួរ លោក ស៊ិត វណ្ណៈ បាន​សម្រេច​ដោះ​លែង​យុវជន​រូប​នេះ​ឲ្យ​ស្ថិត​នៅ​ក្រៅ​ឃុំ ប្រសិន​បើ​យុវជន​នោះ​មិន​ត្រូវ​បាន​ចោទ​ប្រកាន់​ពី​បទ​ផ្សេង​ទៀត​ទេ។

ក្រោយ​ពេល​តុលាការ​ដោះ​លែង​បាន​មួយ​ថ្ងៃ លោក ម៉ាន់ សំអ៊ាន់ បាន​ទៅ​ធ្វើ​កិច្ចសន្យា​បញ្ឈប់​ការ​ប្រើប្រាស់​គណនេយ្យ​ហ្វេសប៊ុក​ចាស់​របស់​ខ្លួន​ឈ្មោះ សំអ៊ាន់ កូកូ (Som Orn KoKo) ព្រម​ទាំង​ឈប់​ប្រើ​លេខ​ទូរស័ព្ទ​ដែល​បាន​ភ្ជាប់​នឹង​គណនេយ្យ​នោះ នៅ​ប៉ុស្តិ៍​នគរបាល​សង្កាត់​ស្រយ៉ូវ។

ម្ដាយ​របស់ លោក ម៉ាន់ សំអ៊ាន់ គឺ​អ្នកស្រី ចេង លី មាន​ប្រសាសន៍​ថា ក្រោយ​ពេល​កូន​គាត់​ជាប់​ឃុំ គឺ​ធ្វើ​ឲ្យ​ជីវភាព​ក្រុម​គ្រួសារ​អ្នកស្រី​កាន់​តែ​លំបាក​មួយ​កម្រិត​ទៀត ហើយ​ធ្វើ​ឲ្យ​អ្នកស្រី​ពិបាក​ចិត្ត​រហូត​មក។ បន្ថែម​ពី​នេះ អ្នកស្រី​ចង់​ឲ្យ​តុលាការ​លើក​លែង​ការ​ចោទ​ប្រកាន់​ទាំងឡាយ​ពាក់ព័ន្ធ​នឹង​កូន​ប្រុស​របស់​អ្នកស្រី​ទៀត​ផង៖ «ដល់​នេះ គាត់​ក៏​មិន​បាន​ដាក់​យើង​យូរ​ដែរ​ណា។ ដូច​ថា​គាត់​រក​ឃើញ​ថា គេ​លួច​យក​ហ្វេសប៊ុក​យើង​ទៅ​ប្រើ​អ៊ីចឹង​ទៅ​ណា»

ទាក់ទង​ការ​ប្រើប្រាស់​បណ្ដាញ​សង្គម​នេះ​ដែរ កាល​ពី​ថ្ងៃ​ទី​៨ កុម្ភៈ មជ្ឈមណ្ឌល​សិទ្ធិ​មនុស្ស​កម្ពុជា ហៅ​កាត់​ថា ស៊ី.ស៊ី.អេច្ឆ.(CCHR) បាន​ចេញ​ផ្សាយ​កម្រង​សិក្សា​មួយ​បង្ហាញ​ថា ការ​បង្ក្រាប​ទៅ​លើ​អ្នក​ប្រើប្រាស់​ហ្វេសប៊ុក​មាន​ការ​កើន​ឡើង។ មជ្ឈមណ្ឌល​សិទ្ធិ​មនុស្ស​កម្ពុជា ចាត់​ទុក​ហ្វេសប៊ុក គឺ​ជា​សមរភូមិ​ថ្មី​សម្រាប់​សេរីភាព​នៃ​ការ​បញ្ចេញ​មតិ​នៅ​កម្ពុជា បន្ទាប់​ពី​មាន​មនុស្ស ៧​នាក់ ត្រូវ​បាន​ចាប់​ខ្លួន និង ២៤​នាក់​ផ្សេង​ទៀត​រង​ការ​គំរាម​កំហែង​ជា​សាធារណៈ គិត​ចាប់​ពី​ខែ​សីហា ឆ្នាំ​២០១៥ ដល់​ដើម​ខែ​កុម្ភៈ ឆ្នាំ​២០១៦ ដោយសារ​បង្ហោះ​សារ ឬ​បញ្ចេញ​មតិ​យោបល់​តាម​បណ្ដាញ​អ៊ីនធឺណិត (Internet)

មជ្ឈមណ្ឌល​សិទ្ធិ​មនុស្ស​កម្ពុជា យល់​ថា ការ​កើន​ឡើង​នូវ​ការ​ចាប់​ខ្លួន​ប្រជាពលរដ្ឋ​ដោយសារ​ការ​រិះគន់​លោក​នាយក​រដ្ឋមន្ត្រី ហ៊ុន សែន និង​បុគ្គល​សាធារណៈ​ល្បីៗ បាន​គំរាម​កំហែង​ដល់​ដំណើរ​ការ​លទ្ធិប្រជាធិបតេយ្យ​ក្នុង​បរិយាកាស​សេរី និង​បើក​ចំហ​នៅ​កម្ពុជា។ ការ​ប្រើប្រាស់​បទ​បរិហារ​កេរ្តិ៍ និង​ការ​ញុះញង់ ដើម្បី​រារាំង​ដល់​ការ​រិះគន់​លើ​បុគ្គល​សាធារណៈ គឺ​ជា​ការ​រំលោភ​បំពាន​ដល់​សិទ្ធិ​សេរីភាព​មូលដ្ឋាន​ក្នុង​ការ​បញ្ចេញ​មតិ ដូច​ដែល​បាន​ប្រកាស​ក្នុង​លិខិតុបករណ៍​អន្តរជាតិ និង​ស្ថាប័ន​អន្តរជាតិ​ជាច្រើន៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

មតិ (1)
  • បោះពុម្ព
  • ចែករំលែក
  • អ៊ីម៉ែល

អ្នក​អាន​អនាមិក

This is real communist. Hun Sen is threatening people through net working, media, and news. Police get you from your home. This dictator Hun Sen must go down. He is exkhmer rouge. His law is a jungle laws.

Feb 10, 2016 02:56 PM

គេហទំព័រ​ទាំងមូល