អ្នកយកព័ត៌មានអោយសារព័ត៌មាន "អំណាចខ្មែរ" ក្នុងខេត្តព្រះសីហនុ ទទូចដល់ស្ថាប័នពាក់ព័ន្ធមានតុលាការសាលាដំបូងខេត្ត និងរដ្ឋមន្ត្រីក្រសួងមហាផ្ទៃ ជួយរកយុត្តិធម៌។ អ្នកយកព័ត៌មានអោយសារព័ត៌មាន "អំណាចខ្មែរ" រូបនោះ ចោទនាយប៉ុស្តិ៍នគរបាលសង្កាត់លេខ២ ក្រុងព្រះសីហនុ លោក សំ ប្រាក់ ថាបានប្រើអំពើហិង្សាទះកំផ្លៀងនៅក្នុងបន្ទប់ធ្វើការរបស់លោក កាលពីថ្ងៃទី១៥ ខែធ្នូ ឆ្នាំ២០១៥។
មន្ត្រីសង្គមស៊ីវិល និងសមាគមការពារអ្នកកាសែត ក៏កំពុងតាមដានទៅលើការអនុវត្តនីតិវិធីទៅលើពាក្យបណ្ដឹងប្រើហិង្សាទៅលើអ្នកកាសែតនេះដោយយកចិត្តទុកដាក់។
បុរសឈ្មោះ តែ សារិត ហៅ ជ្រឹង ដែលអះអាងថា ជាភ្នាក់ងារសារព័ត៌មាន "អំណាចខ្មែរ" បានប្រាប់វិទ្យុអាស៊ីសេរី ថា គិតមកដល់ថ្ងៃទី៣១ ខែធ្នូ ឆ្នាំ២០១៥ ពាក្យបណ្ដឹងរបស់លោកដែលដាក់ជូនសាលាដំបូងខេត្តព្រះសីហនុ ឲ្យជួយរកយុត្តិធម៌ នៅមិនទាន់ឃើញមានចំណាត់ការនៅឡើយទេ។
បុរសដដែលខាងលើនេះអះអាងថា លោកជាក្មេងកំព្រា។ បុរសរូបនេះដែលមើលទៅមានរូបរាងកាយស្គមស្គាំង ឲ្យដឹងទៀតថា នៅថ្ងៃកើតហេតុ លោក សំ ប្រាក់ បានឲ្យកូនចៅក្រោមឱវាទទូរស័ព្ទហៅរូបលោកឲ្យទៅជួបក្នុងបន្ទប់ធ្វើការនៅប៉ុស្តិ៍រដ្ឋបាលសង្កាត់លេខ២ ដោយសួរនាំបញ្ហាផ្សេងៗ ដែលរូបលោកធ្លាប់ប្រព្រឹត្តិកំហុសឆ្គងកន្លងមក។ ប៉ុន្តែការសួរនាំនោះ ក៏បានឈានដល់លោកនាយប៉ុស្តិ៍សង្កាត់២ ឈ្មោះ សំ ប្រាក់ បានទះកំផ្លៀងលោកចន្លោះពី ៤ ទៅ ៥ដៃ។
ផ្ដើមពីបញ្ហានេះ លោក តែ សារិត ក៏បានដាក់ពាក្យប្ដឹងទៅសមាគមអាដហុក (ADHOC) ដើម្បីស្នើឲ្យជួយអន្តរាគមន៍ទៅស្នងការដ្ឋាននគរបាលខេត្តព្រះសីហនុ ប៉ុន្តែខាងស្ថាប័នអនុវត្តច្បាប់មួយនេះមិនរវល់អើពើ ទើបរូបលោកបានដាក់ពាក្យបណ្ដឹងចូលទៅកាន់តុលាការសាលាដំបូងខេត្តព្រះសីហនុ កាលពីថ្ងៃទី២៨ ខែធ្នូ ដើម្បីស្នើជួយរកយុត្តិធម៌។ ប៉ុន្តែសំណុំរឿងនេះ គិតមកដល់ថ្ងៃទី៣១ ខែធ្នូ នៅមិនទាន់មានមន្ត្រីពីស្ថាប័នណាមួយចេញមុខជួយរកដំណោះស្រាយជូនទេ។ លោកក៏ស្នើដល់លោក ស ខេង រដ្ឋមន្ត្រីក្រសួងមហាផ្ទៃ ឲ្យជួយអន្តរាគមន៍ដែរ។
លោក តែ សារិត៖ «នៅពេលឲ្យខ្ញុំចូលទៅក្នុងបន្ទប់កញ្ចក់ សមត្ថកិច្ចប៉ូលិសឈ្មោះ សារ៉េត គាត់បានបិទទ្វារបន្ទប់ ហើយលោកនាយប៉ុស្តិ៍នគរបាលសង្កាត់២ សួរខ្ញុំថា ពេលណាខ្ញុំសងលុយគេ ៥០ដុល្លារអាមេរិកថ្លៃធ្វើឲ្យបែកកញ្ចក់គេនៅពេលកន្លងមក? ហើយខ្ញុំបានឆ្លើយថា ខ្ញុំមិនទាន់មានលុយឲ្យទេ នៅពេលខ្ញុំមានលុយចាំខ្ញុំឲ្យ។ ប៉ុន្តែពេលនោះ គាត់លែងនិយាយអ្វីទៀត ក៏ទះកំផ្លៀងខ្ញុំតែម្ដង»។
មន្ត្រីសម្របសម្រួលសមាគមអាដហុក ខេត្តព្រះសីហនុ អ្នកស្រី ជៀប សុធារី មានប្រសាសន៍ថា អាដហុក បានដាក់លិខិតស្នើអន្តរាគមន៍ចូលទៅស្នងការដ្ឋាននគរបាលខេត្តព្រះសីហនុ ប៉ុន្តែមកដល់ពេលនេះ មិនទាន់មានចំណាត់ការបែបណាទេ។
អ្នកស្រី ជៀប សុធារី សង្កត់ធ្ងន់ថា ការព្រងើយកន្តើយមិនរកដំណោះស្រាយចំពោះករណីនេះ បង្ហាញឲ្យឃើញពីអំពើបក្សពួកនិយម និងរំលោភសិទ្ធិមនុស្ស៖ «លោកស្នងការនគរបាលខេត្តព្រះសីហនុ បានបញ្ជូនសំណុំរឿងនេះទៅខាងការិយាល័យបុគ្គលកោះហៅ ភាគីលោក តែ សារិត និងលោក សំ ប្រាក់ ដើម្បីមកសាកសួរ។ ប៉ុន្តែរហូតមកដល់ពេលនេះ អ្នកទទួលបន្ទុកការិយាល័យបុគ្គលស្នងការ បានប្រាប់ខ្ញុំថា មិនទាន់បានធ្វើការរឿងនេះនៅឡើយទេ»។
លោក ជួន ណារិន្ទ ស្នងការនគរបាលខេត្តព្រះសីហនុ មានប្រសាសន៍ថា ករណីនេះ ត្រូវបុរសឈ្មោះ តែ សារិត ដាក់ពាក្យបណ្ដឹងទៅកាន់ស្ថាប័នជាច្រើន។ ប៉ុន្តែយ៉ាងណាក៏ដោយចុះ ស្ថាប័ននេះនឹងពិនិត្យអនុវត្តឲ្យស្របតាមច្បាប់៖ «ខ្ញុំមិនដឹងថា ត្រូវចាត់ការរបៀបម៉េចទេ បុគ្គលឈ្មោះ តែ សារិត បានដាក់ពាក្យបណ្ដឹងទៅកាន់ស្ថាប័នពាក់ព័ន្ធប្រហែល ៥កន្លែង ហើយករណីនេះ កើតឡើងភ្លាមៗ ខ្ញុំក៏បានកោះហៅអ្នកពាក់ព័ន្ធករណីនេះមកធ្វើការ ឬសាកសួរ។ ឥឡូវនេះខ្ញុំឲ្យលោកស្នងការរងនគរបាល លោក កុល ផល្លី ឲ្យកោះហៅភាគីពាក់ព័ន្ធមកសាកសួរបញ្ជាក់ឡើងវិញ។ ប៉ុន្តែពេលនេះ ខ្ញុំទទួលបានព័ត៌មានមកថា លោក តែ សារិត បានដាក់ពាក្យបណ្ដឹងទៅស្ថាប័នព្រះរាជអាជ្ញាមួយទៀត មិនដឹងថា គាត់ចង់យ៉ាងម៉េចទេ។ ឥឡូវខ្ញុំបានដាក់បញ្ជាឲ្យមន្ត្រីជំនាញក្រោមឱវាទអនុវត្តតាមច្បាប់រួចហើយ»។
ព្រះរាជអាជ្ញាអមសាលាដំបូងខេត្តព្រះសីហនុ អ្នកស្រី ចាត សូរស្មី បានប្រាប់វិទ្យុអាស៊ីសេរី ថា ស្ថាប័ននេះបានទទួលពាក្យបណ្ដឹងពីបុរសឈ្មោះ តែ សារិត រួចហើយ កាលពីថ្ងៃទី២៨ ខែធ្នូ ហើយបានបញ្ជូនសំណុំរឿងនេះទៅកាន់ស្នងការដ្ឋាននគរបាលខេត្តព្រះសីហនុ ពិនិត្យ មុននឹងឈានដល់មានចំណាត់ការតាមនីតិវិធីបន្តទៀត។
ទាក់ទិនបញ្ហានេះ នាយកប៉ុស្តិ៍នគរបាលរដ្ឋបាលសង្កាត់លេខ២ លោក សំ ប្រាក់ បានបដិសេធថា មិនបានទះកំផ្លៀងបុរសឈ្មោះ តែ សារិត ដូចការចោទនោះទេ។ ជាងនេះទៀត លោកចោទបុគ្គល តែ សារិត ថាជាក្មេងកំព្រា គ្មានទីពឹង ឬគ្មានការអប់រំត្រឹមត្រូវ និងធ្លាប់មានសកម្មភាពមិនល្អពីអតីតកាល ហើយជាក្មេងដែលរូបលោកធ្លាប់ផ្ដល់លុយកាក់ឲ្យចាយវាយកន្លងមក។
លោកនាយប៉ុស្តិ៍ដែលកាន់តំណែងច្រើនជាង ១០ឆ្នាំ នៅប៉ុស្តិ៍នគរបាលសង្កាត់២ រូបនេះ គំរាមប្ដឹងបកទៅភ្នាក់ងារកាសែត "អំណាចខ្មែរ" ឈ្មោះ តែ សារិត នៅលើសំណុំរឿងនេះនៅពេលខាងមុខ៖ «ខ្ញុំកាន់តំណែងជានាយប៉ុស្តិ៍នគរបាលរដ្ឋបាលសង្កាត់២ ជាង ១០ឆ្នាំមកហើយ ហើយបានដូរតួនាទីតំណែងអភិបាលក្រុង និងអធិការចំនួន ២ ទៅ ៣នាក់ មកហើយដែរ។ ខ្ញុំមានអាយុ ៥០ប្លាយឆ្នាំទៅហើយ គឺមិនទៅធ្វើសកម្មភាពផ្ដេសផ្ដាស ឬប្រើហិង្សាដូចការចោទនោះទេ។ បញ្ហានេះសិទ្ធិអ្នកប្ដឹងគឺឲ្យគេប្ដឹងទៅ ប៉ុន្តែចាំមើលដល់ដៃតុលាការ ចាំខ្ញុំវាយបកវិញ»។
យ៉ាងណាក៏ដោយចុះ លោក មឿន ឈានណារិទ្ធ នាយកវិទ្យាស្ថានកម្ពុជាសម្រាប់ការសិក្សាផ្នែកព័ត៌មាន មានប្រសាសន៍ថា មិនដឹងបញ្ហាផ្សេងៗ នៅពីក្រោយហេតុការណ៍ឈានដល់មេប៉ុស្តិ៍នគរបាលសង្កាត់២ ឈ្មោះ សំ ប្រាក់ ប្រើអំពើហិង្សាទៅលើអ្នកកាសែតអំណាចខ្មែរ ឈ្មោះ តែ សារិត ឲ្យច្បាស់នោះទេ។ ប៉ុន្តែលោកថា រាល់ការប្រើអំពើហិង្សា គឺជាអំពើល្មើសច្បាប់ និងទាមទារឲ្យផ្នែកពាក់ព័ន្ធត្រូវស្វែងរកយុត្តិធម៌ជូនជនរងគ្រោះ។
លោក មឿន ឈានណារិទ្ធ៖ «ការប្រើអំពើហិង្សា ការវាយប្រហារទៅលើអ្នកសារព័ត៌មាន គឺជាការវាយប្រហារទៅលើសេរីភាពនៃការបញ្ចេញមតិ ក៏ដូចជាសេរីភាពសារព័ត៌មាន។ អ៊ីចឹងខ្ញុំគិតថា ទោះបីអ្នកកាសែតម្នាក់ធ្វើការអង្គភាពសារព័ត៌មានមួយដែលគេមិនសូវស្គាល់ ឬអង្គភាពសារព័ត៌មានមួយដែលមានភាពចម្រូងចម្រាសបែបណាក៏ដោយ ប៉ុន្តែយើងមានការព្រួយបារម្ភ ព្រោះយើងតែងតែគិតថា ការវាយប្រហារទៅលើអ្នកសារព័ត៌មានណាម្នាក់ គឺជាការគំរាមកំហែងចំពោះទាំងអ្នកសារព័ត៌មាន ក៏ដូចជាសេរីភាពសារព័ត៌មានទូទៅ»។
ទាក់ទិនបញ្ហានេះ មន្ត្រីសង្គមស៊ីវិល និងសមាគមការពារអ្នកកាសែតមួយចំនួននៅកម្ពុជា ថ្លែងថា នឹងរង់ចាំមើលការអនុវត្តច្បាប់ទៅលើសំណុំរឿងប្រើអំពើហិង្សា ដែលបុរសឈ្មោះ តែ សារិត ភ្នាក់ងារកាសែត "អំណាចខ្មែរ" ថាតើតុលាការសាលាដំបូងខេត្តព្រះសីហនុ និងមន្ត្រីក្រសួងមហាផ្ទៃ មាននីតិវិធីផ្លូវច្បាប់បែបណាដើម្បីរកយុត្តិធម៌៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។