ភូមិជប់រំដេង ឃុំកន្ទួត ស្រុកស្វាយលើ គឺជាតំបន់ជនបទដាច់ស្រយាលមួយរបស់ខេត្តសៀមរាប ដែលអ្នកភូមិខ្លះធ្លាប់បានសមត្ថកិច្ចចាប់ខ្លួនដាក់ពន្ធនាគារ និងខ្លះទៀតរត់គេចខ្លួនចេញពីផ្ទះសំបែងដោយសារតែមានទំនាស់ដីធ្លីជាមួយក្រុមហ៊ុនវៀតណាម ឈ្មោះ "តាខ្មៅអភិវឌ្ឍន៍កសិកម្ម និងឧស្សាហកម្ម" កាលពីដើមឆ្នាំ២០១៥ កន្លងទៅ។
សមាគមការពារសិទ្ធិមនុស្សអាដហុក (ADHOC) បានប្រឈមមុខជាមួយមន្ត្រីតុលាការខ្លះនៅខេត្តសៀមរាប ចាប់តាំងតែពីអំឡុងខែមិថុនា រហូតមកដល់ពេលនេះ ដោយសារតែការពារអ្នកភូមិជប់រំដេង។ យ៉ាងណាសមាគមការពារសិទ្ធិមនុស្សអាដហុក នៅបន្តបង្ហាត់បង្រៀនពលរដ្ឋនៅទីនោះឱ្យយល់ដឹងអំពីច្បាប់ និងសិទ្ធិមនុស្សទៀតផង។
ក្រុមការងាររបស់សមាគមការពារសិទ្ធិមនុស្សអាដហុក ខេត្តសៀមរាប បានប្រឹងប្រែងបង្រៀនអ្នកភូមិជប់រំដេង នៃឃុំកន្ទួត ស្រុកស្វាយលើ ចំនួន ៣៥គ្រួសារ ឱ្យយល់ដឹងអំពីច្បាប់ និងសិទ្ធិមនុស្សរយៈពេល ២ថ្ងៃជាប់ៗគ្នា ចាប់តាំងពីព្រឹកថ្ងៃទី១៤ រហូតដល់ល្ងាចថ្ងៃទី១៥ ខែធ្នូ។
បេសកកម្មទៅកាន់ទីជនបទដាច់ស្រយាលចម្ងាយប្រមាណ ១០០គីឡូម៉ែត្រភាគឦសានពីទីរួមខេត្តសៀមរាប ដែលមានស្ថានភាពផ្លូវលំពិបាកធ្វើដំណើរនេះ ក៏មានវត្តមានមេមន្ត្រីដឹកនាំកំពូលរបស់សមាគមការពារសិទ្ធិមនុស្សអាដហុក ដែរ។
ប្រធានសមាគមការពារសិទ្ធិមនុស្សអាដហុក គឺលោក ធន សារាយ។ លោកមានប្រសាសន៍ថា ភូមិជប់រំដេង ក៏ជាទីកន្លែងមួយដែលអ្នកភូមិធ្លាប់មានជម្លោះដីធ្លីយ៉ាងជូរចត់ ជាមួយក្រុមហ៊ុនវៀតណាម ឈ្មោះ "តាខ្មៅអភិវឌ្ឍន៍កសិកម្មនិងឧស្សាហកម្ម"។ រហូតមកដល់ពេលនេះ បើទោះបីជាជម្លោះបានស្ងប់ស្ងាត់ ក៏ប៉ុន្តែអ្នកភូមិចំនួន ៣៥គ្រួសារ មិនទាន់បានដោះស្រាយគោលនយោបាយដីធ្លី ឱ្យបានត្រឹមត្រូវនៅឡើយទេ ដូច្នេះរូបលោកនិងក្រុមការងារដែលធ្វើដំណើរទៅភូមិជប់រំដេង ក្នុងគោលបំណងបង្រៀនពួកគេឱ្យយល់ដឹងអំពីច្បាប់សិទ្ធិមនុស្សសង្គមប្រជាធិបតេយ្យ ព្រមទាំងការតស៊ូមតិ ដើម្បីឱ្យចេះសាមគ្គីគ្នា និងមានលទ្ធភាពដោះស្រាយបញ្ហារបស់ពួកគេ។
លោក ធន សារាយ៖ «ប្រព័ន្ធដោះស្រាយជម្លោះនៅក្នុងប្រទេសយើងនៅមានចំណុចខ្វះខាត អ៊ីចឹងអ្នកក្រ អ្នកខ្វះអំណាចដែលតតាំងជាមួយអ្នកមាន និងអ្នកមានអំណាច គឺតែងតែទទួលនូវបរាជ័យច្រើន»។
កាលពីខែមិថុនា កន្លងទៅ ប្រធានផ្នែកស៊ើបអង្កេតរបស់សមាគមការពារសិទ្ធិមនុស្សអាដហុក លោក នី ចរិយា បានទទួលរងការប្ដឹងពីព្រះរាជអាជ្ញារង ១រូប និងចៅក្រមស៊ើបសួរ ១រូបរបស់តុលាការខេត្តសៀមរាប ពីបទបរិហារកេរ្តិ៍ជាសាធារណៈពីបទបរិហារបង្កាច់កេរ្តិ៍ និងបទផ្សព្វផ្សាយនូវការអត្ថាធិប្បាយដើម្បីដាក់សម្ពាធលើយុត្តាធិការតុលាការ បន្ទាប់ពីសមាគមអាដហុក ទាមទារឱ្យតុលាការដោះលែងអ្នកភូមិជប់រំដេង ២នាក់ ក្នុងរឿងទំនាស់ដីធ្លីជាមួយក្រុមហ៊ុនវៀតណាម ឈ្មោះ "តាខ្មៅអភិវឌ្ឍន៍កសិកម្មនិងឧស្សាហកម្ម" មក។
តំណាងអ្នកភូមិជប់រំដេង ម្នាក់ ដែលធ្លាប់តស៊ូយ៉ាងស្វិតស្វាញក្នុងពេលមានទំនាស់ដីធ្លី អ្នកស្រី សួង លក្ខិណា មានប្រសាសន៍ថា រូបគាត់និងអ្នកភូមិជប់រំដេង ទាំងអស់ មិនដែលយល់ដឹងអំពីច្បាប់ និងសិទ្ធិមនុស្សទេ គឺកាលពីមានជម្លោះដីធ្លី អ្នកខ្លះត្រូវសមត្ថកិច្ចចាប់ខ្លួន និងអ្នកខ្លះទៀតរត់ចោលផ្ទះសម្បែង។
ស្ត្រីដដែលបញ្ជាក់ថា គាត់ពិតជាត្រូវការចំណេះដឹងផ្នែកសិទ្ធិមនុស្ស៖ «សិទ្ធិមនុស្សគឺអាចជួយឱ្យពួកខ្ញុំនៅទីនេះ មានការកក់ក្ដៅ ហើយចេះជួយខ្លួនឯង និងចេះតស៊ូ»។
លោក ធន សារាយ បញ្ជាក់ថា បច្ចុប្បន្នអាដហុក មិនមែនផ្ដោតការយកចិត្តទុកដាក់ចុះបង្រៀនអំពីសិទ្ធិមនុស្ស និងច្បាប់ នៅភូមិជប់រំដេង ស្រុកស្វាយលើ តែ១ប៉ុណ្ណោះទេ គឺនៅតាមតំបន់ជាច្រើនទៀតនៃប្រទេសកម្ពុជា ពីព្រោះលោកយល់ថា នៅទីជនបទឆ្ងាយៗ គឺប្រជាពលរដ្ឋជាច្រើនខ្វះខាតនូវចំណេះដឹង ព្រមទាំងខ្វះការទទួលបាននូវព័ត៌មានសព្វបែបយ៉ាង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។