សមាគមអាដហុក ជំរុញឲ្យរដ្ឋាភិបាលកម្ពុជា ចាត់វិធានការផ្លូវច្បាប់ជាមួយនឹងតុលាការថៃ ឬរាជរដ្ឋាភិបាលថៃ ជាបន្ទាន់ ដើម្បីការពារកិត្តិយស និងសេចក្ដីថ្លៃថ្នូររបស់កម្មការិនីជនជាតិខ្មែរម្នាក់ ដែលត្រូវថៅកែជនជាតិថៃ ធ្វើទារុណកម្មយ៉ាងឃោរឃៅ និងប្រព្រឹត្តអំពើអាសគ្រាមនៅលើទឹកដីថៃ។
ប្រធានកម្មវិធីសិទ្ធិស្ត្រី និងកុមារនៃសមាគមអាដហុក លោកស្រី ជួន ចំរុង ថ្លែងថា ស្ត្រីខ្មែរជាជនរងគ្រោះត្រូវបានស្ថានទូតខ្មែរជួយសង្គ្រោះមកកម្ពុជា វិញហើយ ប៉ុន្តែវិធានការផ្លូវច្បាប់ទៅលើថៅកែបនល្បែងជនជាតិថៃ នោះ នៅពុំទាន់បានអនុវត្តឡើយ។ ទន្ទឹមគ្នានេះ សមាគមបានចេញថ្លែងការណ៍មួយជាបន្ទាន់ ដើម្បីជំរុញឲ្យរដ្ឋាភិបាលកម្ពុជា គិតគូរពីបញ្ហានេះ។
លោកស្រី ជួន ចំរុង៖ «អ៊ីចឹង យើងចង់ជំរុញរាជរដ្ឋាភិបាលធ្វើយ៉ាងណាជំរុញទៅរដ្ឋាភិបាលថៃ ក៏ដូចជាតុលាការ ដើម្បីផ្ដន្ទាទោសជនប្រព្រឹត្តិបទល្មើសហ្នឹង ដើម្បីកាត់បន្ថយនិទ្ទណ្ឌភាពឲ្យមានការគោរពច្បាប់។ ទោះបីករណីនេះតែមួយមែន ប៉ុន្តែយើងឃើញថា មានពលករទៅធ្វើការនៅប្រទេសថៃ ជាច្រើនទៀត។ អ៊ីចឹង បើសិនជាទង្វើហ្នឹងកើតមានឡើង ហើយរួចទោសទណ្ឌ អ៊ីចឹងយើងបារម្ភថាអាចមានអំពើអ៊ីចឹងកើតឡើងទៀត»។
នៅរូបភាពដែលគេបង្ហោះតាមប្រព័ន្ធសង្គមហ្វេសប៊ុក (Facebook) ស្ត្រីខ្មែរជាជនរងគ្រោះ និងស្ត្រីម្នាក់ទៀតដែលគេអះអាងថាជាជនជាតិឡាវ (លាវ)។ អ្នកទាំងពីរនាក់ត្រូវគេដោះសម្លៀកបំពាក់ចេញអស់ពីខ្លួន នៅសល់តែខោទ្រនាប់ នៅក្នុងបន្ទប់កាស៊ីណូមួយដែលជាទីកន្លែងធ្វើទារុណកម្មទៅលើរូបនាងនៅក្រុងបាងកក ប្រទេសថៃ។
ប្រភពពីមន្ត្រីសមាគមអាដហុក បញ្ជាក់ថា ជនរងគ្រោះទាំងពីរនាក់ត្រូវម្ចាស់បនល្បែងជនជាតិថៃ ធ្វើទារុណកម្មដោយចោទប្រកាន់ថា បានប្រើល្បិចកលឃុបឃិតជាមួយភ្ញៀវដែលជាអ្នកចូលទៅលេងល្បែងស៊ីសងនៅទីនោះ។
មន្ត្រីនាំពាក្យក្រសួងការបរទេសកម្ពុជា លោក កុយ គួង មានប្រសាសន៍ថា ស្ថានទូតខ្មែរប្រចាំក្រុងបាងកក កំពុងរៀបចំវិធានការផ្លូវច្បាប់ប្រឆាំងនឹងថៅកែបនល្បែងជនជាតិថៃ នោះ៖ «យើងគិតគូរប្ដឹងទៅស្ថានទូត ដែលរំលោភបំពានគាត់ ជាពិសេសកន្លែងដែលគាត់ធ្វើការងារដែលរំលោភបំពានគាត់ហ្នឹង។ យើងនឹងប្ដឹងរកយុត្តិធម៌ជូនដល់ពលរដ្ឋយើងយ៉ាងណា ក៏ស្ថានទូតយើងបានគិតគូររួចហើយរឿងហ្នឹង ទោះបីសាមីខ្លួនគាត់មិនប្ដឹង ក៏យើងត្រូវតែប្ដឹងដែរ»។
ស្ត្រីខ្មែររងគ្រោះមានឈ្មោះ ថាប់ ធីដា អាយុ ៣១ឆ្នាំ។ កាលពីថ្ងៃទី១៨ ខែធ្នូ ឆ្នាំ២០១៣ ត្រូវបានស្ថានទូតខ្មែរប្រចាំនៅក្រុងបាងកក រំដោះចេញពីកន្លែងឃុំឃាំងនៅបនល្បែងស៊ីសងមួយក្នុងក្រុងបាងកក ប្រទេសថៃ។ បច្ចុប្បន្ន នាងកំពុងស្នាក់នៅខេត្តសៀមរាប។ ជនរងគ្រោះបានរួចខ្លួនមកស្រុកខ្មែរវិញ ក្រោយពីក្រុមគ្រួសារបានស្វះស្វែងរកកិច្ចអន្តរាគមន៍ពីស្ថានទូតខ្មែរប្រចាំប្រទេសថៃ និងអង្គការការពារសិទ្ធិមនុស្សក្នុងស្រុក។
ព្រះរាជអាជ្ញាតុលាការខេត្តបន្ទាយមានជ័យ លោក ផាន់ វណ្ណរ័ត្ន ថ្លែងថា ករណីជនរងគ្រោះនេះ ស្នងការនគរបាល និងតុលាការខេត្តបន្ទាយមានជ័យ កំពុងបើកការស្រាវជ្រាវលើសំណុំរឿងនេះ។ លោកបន្តថា តាមគោលការណ៍ច្បាប់ គ្រួសារជនរងគ្រោះអាចដាក់ពាក្យបណ្ដឹងទៅស្នងការនគរបាល ឬដាក់ទៅតំណាងអយ្យការតុលាការខេត្តបន្ទាយមានជ័យ៖ «ព្រោះយើងមានសន្ធិសញ្ញាអន្តរជាតិរវាងថៃ។ យើងអាចប្រើសន្ធិសញ្ញាស្ដីពីការដូរគ្នាទៅវិញទៅមកបាន ដោយសារថៃ គេបានផ្ដល់សច្ចាប័ននៅឆ្នាំ២០១៣។ អ៊ីចឹង យើងអាចធ្វើការស៊ើបអង្កេតរួមស្រាវជ្រាវជនដែលបង្កទៅថៃ បាន រវាងអាជ្ញាធរកម្ពុជា ជាមួយអាជ្ញាធរថៃ ហើយក្រសួងយុត្តិធម៌ គេមានមជ្ឈមណ្ឌលកណ្ដាលមួយដែលទទួលការងារអស់ហ្នឹង»។
នៅក្នុងសេចក្ដីថ្លែងការណ៍កាលពីថ្ងៃទី១៩ ខែធ្នូ សមាគមអាដហុក បញ្ជាក់ថា កាលពីថ្ងៃទី២៨ វិច្ឆិកា ឆ្នាំ២០១៣ ដល់ថ្ងៃទី១៧ ខែធ្នូ ឆ្នាំ២០១៣ ថៅកែជនជាតិថៃ និងបក្ខពួក បានប្រព្រឹត្តអំពើទារុណកម្ម និងថតរូបបង្ហោះរូបភាពអាសអាភាស ព្រមទាំងបង្ខាំងនារីខ្មែរជាបុគ្គលិកបម្រើការនៅក្នុងកាស៊ីណូរបស់ខ្លួន។ ទង្វើនេះ សមាគមយល់ថាបានផ្ទុយនឹងស្មារតីនៃច្បាប់ជាតិ ដែលមានច្បាប់រដ្ឋធម្មនុញ្ញ ក្រមព្រហ្មទណ្ឌ ច្បាប់បង្ក្រាបអំពើជួញដូរមនុស្ស និងអំពើធ្វើអាជីវកម្មផ្លូវភេទ ព្រមទាំងប្រឆាំងនឹងសេចក្ដីថ្លែងការណ៍ជាសកលស្ដីពីសិទ្ធិមនុស្ស កតិកាសញ្ញាអន្តរជាតិស្ដីពីសិទ្ធិពលរដ្ឋ និងអនុសញ្ញាស្ដីពីការលុបបំបាត់នូវរាល់ទម្រង់នៃការរើសអើងប្រឆាំងនឹងនារីភេទ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។