ក្រុមគ្រួសារសាច់ញាតិជនរងគ្រោះ និងអ្នកដែលអាជ្ញាធរចាប់ដាក់ពន្ធនាគារ បានរួមគ្នាជាមួយសហជីព កម្មករ នឹងធ្វើពិធីរំលឹកខួប ២ឆ្នាំ នៃការស្លាប់របស់កម្មករក្នុងប្រព្រឹត្តិការណ៍តវ៉ាដំឡើងប្រាក់ឈ្នួល ១៦០ដុល្លារ។ ពិធីជួបជុំនេះ គេគ្រោងធ្វើនៅក្បែរសួនកាណាឌីយ៉ា ស្ថិតនៅលើផ្លូវវ៉េងស្រេង សង្កាត់ចោមចៅ ខណ្ឌពោធិ៍សែនជ័យ នៅថ្ងៃទី៣ ខែមករា។
មន្ត្រីសាលារាជធានីភ្នំពេញ ព្រមានប្រើវិធានការទប់ស្កាត់ការជួបជុំរបស់ក្រុមសហជីពដែលប៉ុនប៉ងធ្វើពិធីរំលឹកខួប ២ឆ្នាំ ជូនអ្នកស្លាប់ក្នុងប្រព្រឹត្តិការណ៍តវ៉ាដំឡើងប្រាក់ឈ្នួលនៅផ្លូវវ៉េងស្រេង។
អ្នកនាំពាក្យសាលារាជធានីភ្នំពេញ លោក ឡុង ឌីម៉ង់ មានប្រសាសន៍នៅថ្ងៃទី២ មករា ថា សាលារាជធានីនឹងមានវិធានការទប់ស្កាត់ចំពោះការប៉ុនប៉ងជួបជុំគ្នាធ្វើពិធីនេះ។ លោកថា សាលារាជធានីមិនបានឃើញសេចក្ដីជូនដំណឹង ឬលិខិតសុំការអនុញ្ញាតណាមួយដើម្បីរៀបចំធ្វើពិធីនេះទេ៖ «យើងខ្ញុំក៏អត់មានទទួលការស្នើសុំរៀបចំអីនៅទីតាំងសាធារណៈអ៊ីចឹងដែរ។ ការរៀបចំពិធីអីក៏ដោយ នៅទីតាំងសាធារណៈបើមិនមានការសុំច្បាប់ពីអាជ្ញាធរដែនដីទៅគឺថា យើងមិនអនុញ្ញាតជូនទេ គឺជាទង្វើខុសច្បាប់មួយ។ ខ្ញុំមិនអនុញ្ញាតឲ្យធ្វើទេ»។
ទាក់ទងបញ្ហានេះ ប្រធានសមាគមប្រជាធិបតេយ្យឯករាជ្យ និងសេដ្ឋកិច្ចក្រៅប្រព័ន្ធ លោក វន់ ពៅ ដែលជាមនុស្សម្នាក់ក្នុងចំណោមសហជីពដទៃដែលផ្ដួចផ្ដើមរៀបចំពិធីនេះថ្លែងថា ពួកគាត់រៀបចំពិធីនេះ ពុំមានការជូនដំណឹងសាលារាជធានីនោះទេ ពីព្រោះជាពិធីសាសនាដែលនឹងរាប់បាត្របង្សុកូលជូនវិញ្ញាណក្ខន្ធអ្នកស្លាប់នៅទីកន្លែងកើតហេតុ។
លោកថា ទាំងអ្នកស្លាប់អ្នករបួស និងអ្នកដែលអាជ្ញាធរចាប់ខ្លួនដាក់ពន្ធនាគារគឺបានបូជាជីវិតទាមទារដំឡើងប្រាក់ឈ្នួលជូនកម្មករ ដើម្បីលើកស្ទួយជីវភាពកម្មករ៖ «អត់មានច្បាប់អីត្រូវជូនដំណឹង ព្រោះយើងធ្វើនេះគ្រាន់តែជាការគោរពវិញ្ញាណក្ខន្ធ និងបង្សុកូលតែប៉ុណ្ណោះ អត់មានហែក្បួនតវ៉ាបាតុកម្មអីទេ។ យើងចង់រំលឹកឲ្យកម្មករខ្មែរទាំងអស់ឲ្យបានដឹងថា ការដំឡើងប្រាក់ឈ្នួលកន្លងមកគឺជាការចូលរួមចំណែកពីអ្នកស្លាប់ទាំងនោះយ៉ាងធំធេង។ យើងឃើញថា រហូតមកដល់ពេលនេះមិនទាន់ទទួលបានយុត្តិធម៌អ្វីទាល់តែសោះ»។
ពាក់ព័ន្ធនឹងសំណងយុត្តិធម៌នេះ សាច់ញាតិជនរងគ្រោះដែលស្លាប់ដោយគ្រាប់កាំភ្លើងនៅលើផ្លូវវ៉េងស្រេង សម្ដែងក្ដីអស់សង្ឃឹម។
អ្នកស្រី ឈីវ សារ៉ុន ជាភរិយារបស់សពលោក យាន រិទ្ធី ដែលមានស្រុកកំណើតនៅស្រុកបាទី ខេត្តតាកែវ និយាយថា ពន្លឺយុត្តិធម៌គ្មានទេសម្រាប់គ្រួសារគាត់៖ «ខ្ញុំអត់បានទៅផង ឆ្នាំនេះខ្ញុំមកធ្វើនៅផ្ទះ ខ្ញុំធ្វើបាយសម្លទៅវត្ត។ រយៈពេល ២ឆ្នាំហើយគ្មានរឿងអីដែលអាចថា ធ្វើឲ្យខ្ញុំសង្ឃឹមបាន។ គ្មានប្រយោជន៍អីសោះគិតៗទៅ»។
កាលពីថ្ងៃទី២ និងថ្ងៃទី៣ មករា ឆ្នាំ២០១៤ មានព្រឹត្តិការណ៍បង្ក្រាបលើកម្មករនៅក្បែររោងចក្រយ៉ាកជីន (Yakjin) ស្ថិតនៅតំបន់សេដ្ឋកិច្ចពិសេសភ្នំពេញ និងនៅលើកំណាត់ផ្លូវវ៉េងស្រេង ស្ថិតក្នុងខណ្ឌដង្កោ ក្នុងពេលតវ៉ាទាមទារដំឡើងប្រាក់ឈ្នួល ១៦០ដុល្លារ។ ពេលនោះកម្មករចំនួន ៤នាក់ត្រូវបានគេបាញ់សម្លាប់ ម្នាក់បាត់ខ្លួន និងមនុស្សជិត ៤០នាក់របួស។ ចំណែកកម្មករ និងសកម្មជនសិទ្ធិមនុស្ស ២៣នាក់ផ្សេងទៀត ត្រូវបានអាជ្ញាធរចាប់ខ្លួន និងផ្ដន្ទាទោសដាក់ពន្ធនាគារមួយរយៈ។ ការបាញ់សម្លាប់ និងការចាប់ខ្លួននេះ ត្រូវបានអង្គការសង្គមស៊ីវិលជាតិ និងអន្តរជាតិរិះគន់យ៉ាងខ្លាំង ហើយជំរុញឲ្យរដ្ឋាភិបាលកម្ពុជា ស្វែងរកមុខជនទទួលខុសត្រូវលើការបាញ់សម្លាប់កម្មករតវ៉ាទាមទារដំឡើងប្រាក់ខែមកផ្ដន្ទាទោស។
បទសម្ភាសន៍ជាមួយអគ្គលេខាធិការសម្ព័ន្ធសហគមន៍កសិករកម្ពុជា
ពាក់ព័ន្ធនឹងព្រឹត្តិការណ៍ប៉ះទង្គិចកាលពីថ្ងៃទី៣ មករា កម្លាំងអាជ្ញាធរបានបាញ់គ្រាប់កាំភ្លើងពិត គប់គ្រាប់បែកផ្សែង និងបាញ់ឧស្ម័នបង្ហូរទឹកភ្នែកទៅលើក្រុមបាតុករ។ ចំណែកមេដឹកនាំសហជីព ព្រះសង្ឃ និងកម្មករបាតុកម្មជាច្រើននាក់ ត្រូវគេវាយដំ និងចាប់ខ្លួនផង។
សូមស្ដាប់បទសម្ភាសន៍របស់ លោក សាន សែល ជាមួយនឹង លោក ថេង សាវឿន ជាអគ្គលេខាធិការសម្ព័ន្ធសហគមន៍កសិករកម្ពុជា (CCFC) ដែលស្ថិតនៅក្នុងព្រឹត្តិការណ៍នេះ រៀបរាប់ពីបទពិសោធន៍ដែលលោកបានជួបប្រទះដូចតទៅ៖
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។