អាជ្ញាធរស្រុកជ័យសែន ខេត្តព្រះវិហារ បានរារាំងក្រុមសហគមន៍ព្រៃឈើព្រៃព្រះរកា និងបណ្ដាញការពារព្រៃឡង់ ប្រមាណ ៣០០នាក់ មិនឱ្យជួបប្រជុំគ្នាធ្វើវេទិកាសម្ដែងមតិបានទេ កាលពីព្រឹកថ្ងៃពុធ ទី១១ ខែមិថុនា។
ក្រុមសហគមន៍ការពារព្រៃឈើទាំងនោះ ត្រូវគេដឹងថា បានស្កាត់មកពី ៥ស្រុកក្នុងខេត្តព្រះវិហារ ខេត្តស្ទឹងត្រែង ខេត្តក្រចេះ និងខេត្តកំពង់ធំ ជាដើម។
សមាជិកបណ្ដាញសហគមន៍ការពារព្រៃឡង់ ក្នុងស្រុកជ័យសែន គឺអ្នកស្រី ឈឹម សុខា។ អ្នកស្រីមានប្រសាសន៍នៅរសៀលថ្ងៃពុធ ទី១១ ខែមិថុនា ថា អ្នកស្រីមិនដឹងពីមូលហេតុដែលអាជ្ញាធរស្រុកជ័យសែន រារាំងវេទិការបស់សហគមន៍ព្រៃឈើនោះទេ ពីព្រោះកាលពីពេលសហគមន៍សុំច្បាប់ និងនាំគ្នាធ្វើរោងវេទិកា មិនមានអាជ្ញាធរណាហាមឃាត់ឡើយ៖ «កាលដែលទៅជម្រាបគេពីម្សិលហ្នឹង សង់រោងសង់អីហើយហ្នឹង គេអត់ឮឃាត់យើងថាមិនឱ្យធ្វើទេ តែដល់ព្រឹកមិញហ្នឹង បានគេអត់ឱ្យធ្វើ គេឱ្យរុះរើរោងចេញ។ រៀបចំនៅកន្លែងមន្ទីរស្រុកតើ ហើយអ្នកមកក្រោយមកដល់ឮថាគេបិទកម្មវិធីបាត់ ក៏នៅតាមផ្ទះ ហើយដូចពួកកំពង់ធំ ស្រុកសណ្ដាន់ ម៉ូតូ ១៨គ្រឿង អត់បានចូលទៅដល់ផង គេបំបែកគ្នា អត់ឱ្យមានកម្មវិធីហ្នឹងកើតឡើង»។
វិទ្យុអាស៊ីសេរី ព្យាយាមទាក់ទងទៅ លោក ថោង សាគឿន អភិបាលស្រុកជ័យសែន ដើម្បីសុំការបំភ្លឺជុំវិញបញ្ហានេះ ក៏ប៉ុន្តែទូរស័ព្ទរបស់លោកបានបិទមិនអាចទាក់ទងបានឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។