ក្រុមអ្នកច្បាប់ និងអង្គការសិទ្ធិមនុស្ស ប្រតិកម្មចំពោះការរឹតបន្តឹងបែបបទរដ្ឋបាលនៅពន្ធនាគារខេត្តបាត់ដំបង ហើយពួកគេសុំឲ្យមានការសម្រួលឡើងវិញ ដើម្បីផ្ដល់សិទ្ធិសេរីភាពឲ្យតំណាងអង្គការសង្គមស៊ីវិល និងមេធាវី ដែលមានបេសកកម្មចូលជួបជាមួយអ្នកទោសនៅក្នុងមន្ទីរឃុំឃាំង។
អតីតប្រធានសាខាអង្គការជំនួយផ្នែកច្បាប់នៅកម្ពុជា (LAC) ប្រចាំខេត្តបាត់ដំបង និងជាមេធាវីផងនោះ លោក សុគន្ធ ពិដោរ ថ្លែងកាលពីថ្ងៃសុក្រ ទី៨ មីនា ថា បច្ចុប្បន្នពន្ធនាគារខេត្តបាត់ដំបង មានការរឹតបន្តឹងខុសពីលើកមុន ហើយពួកគេទាមទារឲ្យពាក្យសុំអនុញ្ញាតពីតុលាការ ទើបអាចចូលជួបកូនក្ដីបាន។
បញ្ហានេះ លោកចាត់ទុកថារាំងស្ទះដល់ការប្រាស្រ័យគ្នារវាងមេធាវីជាមួយនឹងកូនក្ដី ព្រោះការស្នើសុំទៅតុលាការ អាចយឺតយ៉ាវថែមទៀត៖ «ក្នុងករណីយើងជាមេធាវីសុំប្រាស្រ័យទាក់ទងជាមួយកូនក្ដី សុំឲ្យគាត់ធ្វើដូចដើមវិញ ព្រោះច្បាប់ក្រមនីតិវិធីព្រហ្មទណ្ឌ គេថា មេធាវី និងកូនក្ដី មានសិទ្ធិប្រាស្រ័យទាក់ទងគ្នាក្នុងពន្ធនាគារ បើសិនជាគាត់ឲ្យធ្វើពាក្យនោះពិបាកណាស់ ច្បាប់គេមិននិយាយពាក្យសុំទេ គេនិយាយថា មេធាវីមានសិទ្ធិ»។
ប្រធានពន្ធនាគារខេត្តបាត់ដំបង លោក សំអុល ធារិទ្ធិ ឆ្លើយតបថា ពុំមានការរឹតបន្តឹងទេ។ ពន្ធនាគារចង់ឲ្យអង្គការសង្គមស៊ីវិលទាំងនោះ មានលិខិតបញ្ជាក់ពីអត្តសញ្ញាណ ទីកន្លែង និងគោលបំណងឲ្យច្បាស់លាស់។ កន្លងមក មានតំណាងអង្គការខ្លះអត់មានឯកសារបញ្ជាក់ ពន្ធនាគារមិនអនុញ្ញាតឲ្យចូលជួបអ្នកទោសទេ។ ការអនុវត្តដូច្នេះ ដើម្បីពង្រឹង និងធានាសន្តិសុខ។ លោកសង្កត់ធ្ងន់ថា នេះជាបែបបទរដ្ឋបាលដែលតម្រូវឲ្យអង្គការអនុវត្ត។
លោក សំអុល ធារិទ្ធិ៖ «អត់មានអីលំបាកទេ ឲ្យមានមក ខ្ញុំឲ្យចូលទាំងអស់ ប៉ុន្តែសំខាន់គាត់អត់មានឯកសារបង្ហាញខ្ញុំ គាត់មកតែមាត់ គាត់មកនិយាយតែមាត់ថា អង្គការនេះ អង្គការនោះ តែលិខិតស្នាមអត់មាន នៅគ្រប់គ្រងកន្លែងនេះ ហើយខ្ញុំអ្នកមកថ្មី ពីមុនមកយ៉ាងម៉េច ខ្ញុំមិនដឹងទេ តែខ្ញុំ ការងារដែលខ្ញុំត្រូវទទួល គឺដើម្បីពង្រឹងទាំងអស់ឲ្យដឹងអ្នកចេញអ្នកចូលមកធ្វើការមានបំណងអី សមាជិកគាត់មានប៉ុន្មាននាក់»។
លោក សំអុល ធារិទ្ធិ បានផ្លាស់ពីខេត្តកោះកុង មកកាន់តំណែងជាប្រធានពន្ធនាគារនៅពន្ធនាគារខេត្តបាត់ដំបង ជំនួសអតីតប្រធានពន្ធនាគារ លោក កង សារ៉េត ដែលប្ដូរទៅកាន់តំណែងជាប្រធានពន្ធនាគារខេត្តពោធិ៍សាត់។ ប្រភពពីអ្នកទោសនៅក្នុងពន្ធនាគារ ថ្លែងថា មេគុកទើបចូលថ្មីបានគាបសង្កត់អ្នកទោស សូម្បីតែអាហារហូបចុក និងសម្លៀកបំពាក់ ក៏ត្រូវដកហូតពីអ្នកទោសដែរ៖ «គេធ្វើបាបស្រីៗ គេវាយដាក់ខ្នោះខ្ញុំចំនួនបីថ្ងៃហើយ ស្លៀកលីអូខោទ្រនាប់។ គេផ្ដាច់ការ បង្អត់អាហារនាងខ្ញុំ សូម្បីប៊ីចេង ស្ករ ឲ្យហូបមានកម្លាំងក៏អត់ដែរ គេដកអស់រលីងតាំងពីថ្ងៃទី២៨ ខែកុម្ភៈ មកដល់ឥឡូវ ហូបសម្លរបបសល់បាយទាំងធុង»។
អ្នកសម្របសម្រួលអង្គការលីកាដូ ប្រចាំខេត្តបាត់ដំបង លោក ស៊ុន តឹក បញ្ជាក់ថា រយៈកាលកន្លងមក អង្គការលីកាដូ បញ្ជូនបុគ្គលិករបស់ខ្លួនចូលទៅក្នុងពន្ធនាគារ ដើម្បីឃ្លាំមើលការអនុវត្តផ្សេងៗ ដូចជាបញ្ហាអនាម័យ និងការរស់នៅរបស់អ្នកទោស។ អ្នកទោសអាចប្រាប់ពីបញ្ហាមួយចំនួន ដែលពួកគាត់ជួបប្រទះ ប៉ុន្តែឥឡូវនេះ អង្គការពុំបានដឹងពីសុខទុក្ខរបស់អ្នកទោសទេ។ ក្រុមអង្គការសង្គមស៊ីវិល សុំឲ្យពន្ធនាគារបន្ធូរបន្ថយកុំអនុវត្តទៅតាមក្រឹត្យក្រមហួសហេតុ៖ «គោលបំណងយើងជួយដល់អាជ្ញាធរពន្ធនាគារ ទាំងអ្នកទោសមានជំងឺ ទាំងបញ្ហាអនាម័យសន្តិសុខ។ យើងអាចជួយបានខ្លះដែរ យើងផ្ដល់ព័ត៌មានទៅដល់ប្រធានពន្ធនាគារ កាលណាយើងចូលទៅ យើងឃើញអ្វីប្លែកខុសនឹងច្បាប់ យើងពិភាក្សាជាមួយគាត់ដើម្បីដោះស្រាយបញ្ហាជួយដល់អ្នកទោសបានសិទ្ធិគ្រប់គ្រាន់តាមផ្លូវច្បាប់»។
លោកបញ្ជាក់ថា បុគ្គលិកអង្គការនានាដែលចូលទៅជួបអ្នកទោសនៅក្នុងពន្ធនាគារនោះ ពុំមែនដើម្បីប្រឆាំងជាមួយអាជ្ញាធរ ឬក៏សមត្ថកិច្ចគ្រប់គ្រងពន្ធនាគារនោះទេ។ ប្រភពពីមន្ត្រីអង្គការសង្គមស៊ីវិលខ្លះយល់ថា ការរឹតបន្តឹងបែបនេះ ដោយសារតែអ្នកគ្រប់គ្រងពន្ធនាគារមិនចង់ឲ្យបែកធ្លាយរឿងមិនប្រក្រតីនៅក្នុងពន្ធនាគារចេញមកខាងក្រៅ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។