ពលរដ្ឋសហគមន៍បុរីកីឡា និងបឹងកក់ ប្រមាណជាង ២០នាក់ នាំគ្នាធ្វើយុទ្ធនាការថ្ងៃចន្ទពណ៌ខ្មៅ សប្ដាហ៍ទី៤២ នៅថ្ងៃទី២០ ខែកុម្ភៈ តាមបែបព្រះពុទ្ធសាសនាវិញម្ដង ខុសប្លែកពីសប្ដាហ៍កន្លងទៅដែលឈរកាន់បដា និងស្រែកទាមទារឲ្យមានការដោះលែងអ្នកកំពុងជាប់ឃុំ។
តំណាងពលរដ្ឋបុរីកីឡា ដែលមិនព្រមចាកចេញ និងបន្តរស់នៅក្នុងអគារចាស់បាក់បែក លោកស្រី សរ ស៊ន អះអាងថា ការធ្វើពិធីសូត្រមន្តនៅច័ន្ទពណ៌ខ្មៅនេះ គឺដើម្បីឧទ្ទិសកុសលដល់វិញ្ញាណក្ខន្ធបណ្ឌិត កែម ឡី ដែលត្រូវបានឃាតកបាញ់សម្លាប់ និងបួងសួងសុំឲ្យរដ្ឋាភិបាលកែប្រែគំនិត ជំរុញឲ្យមានការដោះលែងមន្ត្រីការពារសិទ្ធិមនុស្ស អ្នកឃ្លាំមើលបញ្ហាសង្គមនិងនយោបាយ លោក គឹម សុខ សកម្មជនដីធ្លី អ្នកស្រី ទេព វន្នី និងអ្នកនយោបាយបក្សប្រឆាំងមួយចំនួនផង។
លោកស្រី សរ ស៊ន៖ «មីងនៅតែបន្ដធ្វើយុទ្ធនាការថ្ងៃច័ន្ទពណ៌ខ្មៅរហូត បើគ្មានដំណោះស្រាយ ដោះលែងមន្ត្រីសិទ្ធិមនុស្ស មន្ត្រីគ.ជ.ប លោក នី ចរិយា អ្នកស្រី ទេព វន្នី ហើយថ្មីហ្នឹង លោក គឹម សុខ ហើយនិងបង្ហាញកាមេរ៉ានៅក្នុងស្ដារម៉ាត កាល់តិច ចុងក្រោយដោះស្រាយផ្ទះនៅបុរីកីឡាបញ្ចប់ ១៥គ្រួសារហ្នឹង ឲ្យគាត់មានទីជំរកសមរម្យ កុំឲ្យគាត់នៅបាត់បង់ការងារ បាត់បង់ការសិក្សារបស់កូនៗ ហើយជំពាក់បំណុលរបស់គេ ព្រោះយើងដើរតវ៉ា យើងមិនបានដើររកស៊ីអី»។
ចំណែកអ្នកបឹងកក់ បញ្ជាក់ថា ពួកគេលើកពេលធ្វើយុទ្ធនាការថ្ងៃច័ន្ទពណ៌ខ្មៅសប្ដាហ៍ទី៤២ ទៅធ្វើនៅថ្ងៃទី២៣ ខែកុម្ភៈ ចំថ្ងៃដែលតុលាការក្រុងភ្នំពេញ កោះហៅសកម្មជនរបស់ពួកគេ គឺអ្នកស្រី ទេព វន្នី ឡើងតុលាការម្ដងទៀត។
ក្រៅពីទាមទារឲ្យដោះលែងមន្ត្រីការពារសិទ្ធិមនុស្សសមាគមអាដហុក (ADHOC) ៤រូប មន្ត្រី គ.ជ.ប ១រូប ស្វែងរកយុត្តិធម៌ជូនលោកបណ្ឌិត កែម ឡី ការធ្វើយុទ្ធនាការថ្ងៃចន្ទពណ៌ខ្មៅរបស់សហគមន៍បុរីកីឡានេះ ក៏ដើម្បីទាមទារសំណងសមរម្យផងដែរ។ ទាំងអ្នកបុរីកីឡា និងអ្នកបឹងកក់ អះអាងថា យុទ្ធនាការនេះ គឺមិនដូចទៅនឹងការលើកឡើងរបស់រដ្ឋាភិបាលថា ជាសញ្ញាធ្វើបដិវត្តន៍ពណ៌ដើម្បីផ្ដួលរំលំរដ្ឋាភិបាលនោះទេ។ ទោះបីជាយ៉ាងណា យុទ្ធនាការនេះនៅតែស្ថិតក្រោមក្រសែភ្នែកពីសមត្ថកិច្ចដែលនៅតែឃ្លាំមើលជាប្រចាំ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។