ពាក់ព័ន្ធនឹងបញ្ហានេះ លោក ប៊ន សំណាង និង លោក សុខ សំអឿន ដែលសាលាដំបូងរាជធានីភ្នំពេញ និងសាលាឧទ្ធរណ៍ សម្រេចផ្ដន្ទាទោសឲ្យជាប់ពន្ធនាគារ ២០ឆ្នាំ និងផ្តល់សំណងប្រាក់ ៤០លានរៀលដល់ដើមបណ្ដឹងនោះ បានត្រូវគេដោះលែងពីពន្ធនាគារ តាមសាលដីការបស់តុលាការកំពូល ដោយទម្លាក់ចោលនូវការចោទប្រកាន់ទាំងស្រុង នៅព្រឹកថ្ងៃទី២៦ ខែកញ្ញា។
ជនជាប់ចោទទាំងពីរនាក់ គឺ លោក ប៊ន សំណាង និង លោក សុខ សំអឿន បានត្រូវប៉ូលិសនៃពន្ធនាគារព្រៃស ដឹកចេញពីក្នុងពន្ធនាគារតាមរថយន្តមួយគ្រឿង មកដាក់នៅក្បែរវត្តព្រៃស នៅម៉ោងជិត ១១ និង ៣០នាទីព្រឹកថ្ងៃព្រហស្បតិ៍។
ពេលកំពុងដើរចូលទៅក្នុងវត្តព្រៃស ដើម្បីធ្វើពិធីស្រោចទឹករំដោះគ្រោះ ដោយសេចក្ដីរីករាយ លោក ប៊ន សំណាង និង លោក សុខ សំអឿន បានថ្លែងអំណរគុណចំពោះអង្គការស្ថាប័នជាតិ អន្តរជាតិ និងអ្នកទាំងឡាយដែលបានជួយពួកគាត់ឲ្យទទួលបានយុត្តិធម៌ និងសេរីភាព។
ទោះយ៉ាងណាក៏ដោយ លោក សុខ សំអឿន ថ្លែងថា យុត្តិធម៌សម្រាប់ពួកគាត់ទាំងពីរ មិនមែនមានន័យថា យុត្តិធម៌សម្រាប់ខ្មែរគ្រប់រូបនោះទេ។ លោកបន្ថែមថា មិនគួរមានចំណាត់ការផ្លូវច្បាប់បែបលេងសើចយ៉ាងនេះ ចំពោះពួកគាត់សោះ។
ទាក់ទងនឹងបញ្ហានេះដែរ ប្រធានបច្ចេកទេសការិយាល័យស៊ើបអង្កេតនៃអង្គការលីកាដូ (Licadho) លោក អំ សំអាត មានប្រសាសន៍ថា ហេតុផលខាងដើមដែលឈានដល់ការចោទប្រកាន់ និងដាក់ទោសចំពោះ លោក ប៊ន សំណាង និង លោក សុខ សំអឿន គឺដោយសារកង្វះសមត្ថភាពរបស់មន្ត្រីពាក់ព័ន្ធ ក្នុងការស៊ើបអង្កេតដំបូងៗ និងជាចេតនាបំភ្លៃការពិត។
លោក ប៊ន សំណាង និង លោក សុខ សំអឿន បានជាប់ពន្ធនាគារអស់រយៈពេលសរុបជិត ៦ឆ្នាំ ដោយគ្មានទោសពៃរ៍ ដែលក្រុមមន្ត្រីអង្គការសង្គមស៊ីវិល ជាពិសេសមន្ត្រីការពារសិទ្ធិមនុស្ស ហៅអ្នកទាំងពីរថាជាឃាតកសិប្បនិម្មិត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។