សេចក្ដីប្រកាសព័ត៌មានយូណេស្កូ និងគណៈកម្មាធិការការពារអ្នកសារព័ត៌មាន ចុះផ្សាយនៅចុងសប្ដាហ៍នេះបង្ហាញថា លោក សួន ចាន់ ត្រូវសម្លាប់ដោយសារលោកបានសរសេរព័ត៌មានរាយការណ៍អំពីការនេសាទខុសច្បាប់នៅខេត្តកំពង់ឆ្នាំង។
អគ្គលេខាធិការអង្គការយូណេស្កូ អ្នកស្រី អ៊ីរីណា បូកាវ់ា (Irina Bokava) ថា ការសម្លាប់អ្នកកាសែតដូច្នេះ គឺជាការបំបិទសិទ្ធិសេរីភាព និងសិទ្ធិសារព័ត៌មានយ៉ាងធ្ងន់ធ្ងរ ដែលបកប្រែជាភាសាខ្មែរដូច្នេះថា៖ «ខ្ញុំភ័យរន្ធត់ណាស់ ចំពោះការសម្លាប់ សួន ចាន់ ដ៏សាហាវ។ សង្គមទាំងមូលគឺឈឺចាប់នៅពេលដែលអំពើហិង្សាត្រូវបានគេប្រើដើម្បីបំបិទមាត់អ្នកសារព័ត៌មានដែលបំពេញកិច្ចការរបស់ខ្លួន។ ជនប្រព្រឹត្តិបទឧក្រិដ្ឋនេះត្រូវតែត្រូវតែកាត់ទោសដើម្បីពង្រឹងសេរីភាពបញ្ចេញមតិ និងសេរីភាពសារព័ត៌មាននៅកម្ពុជា»។
ចំណែកសេចក្ដីប្រកាសព័ត៌មានរបស់គណៈកម្មាធិការការពារអ្នកសារព័ត៌មានសកល ដែលមានការិយាល័យនៅទីក្រុងបាងកក ប្រទេសថៃ ក៏មិនខុសគ្នាដែរ អង្គការការពារអ្នកសារព័ត៌មានសកលលោកមួយនេះ បានទាមទារឲ្យរដ្ឋាភិបាលកម្ពុជា រកមូលហេតុពិតដែលនៅបីក្រោយនៃការសម្លាប់ លោក សួន ចាន់ ហើយចាប់ជនប្រព្រឹត្តិបទឧក្រិដ្ឋនេះត្រូវតែត្រូវតែកាត់ទោសឲ្យបាន។
លោក សួន ចាន់ អាយុ ៤៤ឆ្នាំ អ្នកយកព័ត៌មានឲ្យកាសែត «មាគ៌ាកម្ពុជា» ត្រូវបានមនុស្សមួយក្រុមមានគ្នាប្រហែល ១០នាក់ បានព្រួតវាយសម្លាប់នៅក្បែរផ្ទះ កាលពីនៅថ្ងៃទី៣១ មករា ឆ្នាំ១០១៤។
មន្ត្រីនាំពាក្យក្រសួងមហាផ្ទៃ លោកឧត្ដមសេនីយ៍ ខៀវ សុភ័គ នៅថ្ងៃទី៩ កុម្ភៈ បានសម្ដែងការសោកស្ដាយចំពោះឃាតកម្មលើរូបអ្នកកាសែត សួន ចាន់ ហើយលោកបញ្ជាក់ថា ប៉ូលិសកំពុងប្រឹងប្រែងស៊ើបអង្កេតរកឃាតក៖ «បាទ! យើងខ្ញុំមានការសោកស្ដាយហើយសូមចូលរួម (រំលែកទុក្ខ) សពជនរងគ្រោះដែលជនល្មើសបានសម្លាប់នេះ។ សុំបួងសួងឲ្យវិញ្ញាណក្ខន្ធរបស់គាត់បានសោយសុខ។ យើងខ្ញុំនឹងខិតខំសិក្សាស្រាវជ្រាវស្វែងរកជនល្មើសដើម្បីបញ្ជូនខ្លួនជនល្មើសទៅតុលាការកាត់ទោសតាមច្បាប់»។
ទោះយ៉ាងណា ការស៊ើបអង្កេតបឋមរបស់ប៉ូលិសព្រហ្មទណ្ឌខេត្តកំពង់ឆ្នាំង បានសន្និដ្ឋានថា ករណីព្រួតគ្នាវាយសម្លាប់អ្នកកាសែត លោក សួន ចាន់ នៅកំពង់ឆ្នាំង គឺដោយសារទំនាស់ពាក្យសំដីពេលស៊ីផឹកស្រវឹង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។