ពលករខ្មែរមួយចំនួនដែលកំពុងបំពេញការងារនៅក្នុងប្រទេសថៃ ចាប់ផ្ដើមចងក្រងគ្នាជាបណ្ដាញដើម្បីការពារសិទ្ធិពួកគេ អោយចៀសផុតពីការរំលោភបំពាន និងការកេងប្រវ័ញ្ចដោយប្រការផ្សេងៗ។ ក្រុមពលករទាំងនោះធ្វើការដោយសហការជាមួយអង្គការមិនមែនរដ្ឋាភិបាលនៅក្នុងប្រទេសថៃ ដែលអាចអន្តរាគមន៍ទាន់ពេលវេលា និងមានប្រសិទ្ធភាពដល់ពលករដែលជួបប្រទះបញ្ហា។
ក្រុមពលករធ្វើការនៅប្រទេសដែលទើបចងក្រងគ្នាជាបណ្ដាញបានដាក់ឈ្មោះខ្លួនឯងថា "សមាគមមិត្តភាពកម្មករកម្ពុជាប្រចាំនៅប្រទេសថៃ" ហៅកាត់ជាភាសាអង់គ្លេសថា ស៊ីហ្វាត (CFAT)។
ក្រុមនេះទើបតែចាប់ផ្ដើមចងក្រងក្នុងរយៈពេលជាងមួយខែនេះទេ ដោយមានសមាជិកពី ៤០ ទៅ ៥០នាក់ ជាអ្នកគ្រប់គ្រងកម្មករ ឬហៅថា "មេការ" នៅតាមបណ្ដារោងចក្រ និងសហគ្រាសមួយចំនួនក្នុងប្រទេសថៃ។ អ្នកជាមេការទាំងនោះមានកម្មករនៅក្រោមការមើលខុសត្រូវរបស់ពួកគេចំនួនសរុបប្រមាណ ៥.០០០នាក់។ ពួកគេភាគច្រើនជាអ្នកដែលបានបញ្ចប់ការសិក្សាថ្នាក់បរិញ្ញាបត្រនៅក្នុងប្រទេសថៃ និងបានបន្តធ្វើការងារនៅទីនោះ។
មេការម្នាក់ លោក សោម សិរីមុនី ដែលធ្វើការនៅរោងចក្រដំឡើងម៉ាស៊ីនដេរ ក្នុងខេត្តឈុនបូរី មានប្រសាសន៍តាមទូរស័ព្ទពីប្រទេសថៃ ថា គោលបំណងនៃការបង្កើតបណ្ដាញថ្មីនេះ ដើម្បីការពារអត្ថប្រយោជន៍របស់ក្រុមពលករខ្មែរដែលពួកគេជាមេការនោះមើលការខុសត្រូវ៖ «ពលករដែលចំណាកស្រុកមកក្នុងស្រុកថៃ នេះ ភាគតិចណាស់ដែលមានច្បាប់អនុស្សរណៈយោគយល់គ្នា ឬ អឹម.អូ.យូ (MOU) ជួបប្រទះជាញឹកញាប់គឺបងប្អូនដែលធ្វើការដោយខុសច្បាប់។ ចងក្រងក្រុមហ្នឹងគឺចង់ជួយសម្រួលឯកសារ ទី២ ជួយសង្គ្រោះអោយរួចផុតពីការជួញដូរ ប្រវ័ញ្ចផ្នែកខាងរំលោភសិទ្ធិការងារ ដោយធ្វើការងារជាក្រុម ហើយទី៣ គឺអាចជួយបង្រៀនផ្នែកខាងគ្រឿងញៀនសុំអោយចៀសអោយផុត ព្រោះយើងធ្វើការនៅស្រុកគេ ដើម្បីសន្សំលុយសន្សំកាក់ផ្គត់ផ្គង់ជីវភាពគ្រួសារយើងនៅស្រុកខ្មែរ»។
ស្របគ្នានេះ បណ្ដាញក៏មានគោលបំណងជួយដល់ក្រុមពលករជាស្ត្រីដែលរងគ្រោះដោយការរំលោភបំពានផ្លូវភេទ។
ពេលនេះលោក សិរីមុនី កំពុងមើលការខុសត្រូវ និងជួយដល់ពលករខ្មែរប្រមាណ ៨០នាក់ នៅក្រោមបង្គាប់របស់លោក។ ក្រៅពីជួយដល់ពលករក្នុងក្រុមបណ្ដាញនេះ លោកក៏អាចជួយដល់ពលករផ្សេងទៀតដែរ។
លោក សោម សិរីមុនី បន្តថា បណ្ដាញរបស់លោកអាចនឹងផ្ដល់ដំណឹងពីតម្រូវការ ឬបញ្ហារបស់ពលកររងគ្រោះទៅភាគីពាក់ព័ន្ធ៖ «បើសិនជាបងប្អូនទាំងអស់មានបញ្ហាផ្នែកខាងការជួញដូរពលកម្មដោយគេអត់បើកលុយអោយ ឬក៏មានបញ្ហាអីមួយ គឺក្រុមបណ្តាញរបស់ខ្ញុំបាទហ្នឹងអោយលេខទូរស័ព្ទ ហើយអាចទាក់ទងមកខាងពួកខ្ញុំបាន»។
បើទោះជាទើបបង្កើតថ្មីក៏បណ្ដាញនេះបានជួយសម្របសម្រួលដោះស្រាយបញ្ហាមួយចំនួនទាន់ពេលវេលាទៅដល់ពលករ រួមមានបញ្ហាខ្វះខាតឯកសារផ្លូវច្បាប់ ការទាមទារសំណង និងការទាមទារប្រាក់ឈ្នួលដែលត្រូវថៅកែកេងប្រវ័ញ្ចជាដើម។
មេការម្នាក់ទៀត លោក អវិរុទ្ធ មានប្រសាសន៍ថា ពលករភាគច្រើនមិនបានដឹងថា តើពួកគេត្រូវទាក់ទងទៅនរណា ឬផ្នែកណា ដើម្បីអោយបានជំនួយបន្ទាន់ ដោះស្រាយបញ្ហារបស់ពួកគាត់ឡើយ។ លើសពីនេះពួកគេក៏ជួបការលំបាកដែរ ក្នុងការទាក់ទងទៅរកជំនួយពីមន្ត្រីបម្រើការនៅស្ថានទូតខ្មែរប្រចាំទីក្រុងបាងកក។
លោក អវិរុទ្ធ បន្តថា ទាំងនេះជាមូលហេតុមួយដែលនាំអោយមានការបង្កើតបណ្ដាញ ឬសមាគមមិត្តភាពកម្មករកម្ពុជា នេះឡើង៖ «ការពិតគាត់ (ស្ថានទូត) ពុំបានដោះស្រាយផ្ដល់ជំនួយអោយទាន់ពេលទេ យឺតយ៉ាវស្ទើរតែអាចនិយាយថា មិនយកចិត្តទុកដាក់។ ពេលមានបញ្ហាពួកខ្ញុំស្ទើរតែភ្លេចថា ត្រូវការជំនួយពីស្ថានទូតទៅហើយ»។
តួលេខពីអង្គការមិនមែនរដ្ឋាភិបាលអោយដឹងថា បច្ចុប្បន្ននៅក្នុងប្រទេសថៃ មានពលករខ្មែរដែលកំពុងបំពេញការងារប្រមាណ ១លាននាក់ ទាំងអ្នកដែលធ្វើការងារដោយស្រប និងមិនស្របច្បាប់។ ចំណែកតួលេខពីក្រសួងការបរទេសអោយដឹងថា នៅពេលនេះមានពលករខ្មែរដែលកំពុងបំពេញការងារស្របច្បាប់នៅទីនោះមានប្រមាណ ៧០០.០០០ (ចិតសិបម៉ឺននាក់)។ ពួកគេជួបប្រទះបញ្ហាជាច្រើន ដែលកើតចេញពីការរំលោភសិទ្ធិការកេងប្រវ័ញ្ច និងការជួញដូរ។
បណ្ដាញពលករខ្មែរ ឬសមាគមមិត្តភាពកម្មករកម្ពុជា ត្រូវបង្កើតឡើងដោយមានការសម្របសម្រួលពីមជ្ឈមណ្ឌលអប់រំច្បាប់សម្រាប់សហគមន៍។
មន្ត្រីផ្នែកសិទ្ធិការងារ នៃមជ្ឈមណ្ឌលអប់រំច្បាប់សម្រាប់សហគមន៍ លោក ឌី ថេហូយ៉ា មានប្រសាសន៍ថា កន្លងទៅពលករខ្មែរតែងធ្វើការដោយឡែកៗពីគ្នា ដែលធ្វើអោយពួកគេពិបាកនឹងទទួលបានអត្ថប្រយោជន៍ពេញលេញ។
លោកបន្តថា គំនិតផ្ដួចផ្ដើមនេះអាចអោយពលករទទួលបានជំនួយភ្លាមៗ នៅពេលពួកគេត្រូវការ។ យ៉ាងណាលោកថា ករណីនេះឋិតនៅក្នុងដំណើរសាកល្បងនៅឡើយ៖ «អ៊ីចឹងបើសិនជាពួកគាត់មានបណ្ដុំកម្លាំង ជាជំហានដំបូងគាត់ត្រូវមានទំនាក់ទំនងនឹងអាជ្ញាធរថៃ និងអង្គការមិនមែនរដ្ឋាភិបាលនៅថៃ បន្ទាប់ទៀតគាត់ត្រូវតែទាក់ទងទៅស្ថានទូត។ ខ្ញុំមិនប្រើពាក្យថា សហការទេ តែជាការតាមដានសកម្មភាពច្រើនជាង»។
លោក ឌីថេ ហូយ៉ា អោយដឹងដែរថា គម្រោងបង្កើតបណ្ដាញពលករក្នុងប្រទេសថៃ នេះកំពុងធ្វើនៅក្នុងខេត្តឈុនបូរី ដែលជាខេត្តឧស្សាហកម្មធំមួយរបស់ប្រទេសថៃ ហើយគម្រោងនេះនឹងត្រូវពង្រីកបន្តទៅខេត្តមួយចំនួនទៀត ជុំវិញក្រុងបាងកក ជាទីដែលសំបូរពលករខ្មែរធ្វើការដែរនោះ។
មន្ត្រីស្ថានទូតខ្មែរប្រចាំនៅប្រទេសថៃ លោក ម៉ៅ ភិរុណ មានប្រសាសន៍ថា ជាគំនិតល្អក្នុងការបង្កើតក្រុមជួយពលករបែបនេះ ប៉ុន្តែលោកបារម្ភថា អាចនៅមានបញ្ហាខ្លះប្រសិនបើក្រុមនេះនៅមិនទាន់ទៅជាក្រុមស្របច្បាប់៖ «មិនមែនងាយស្រួល។ ព័ត៌មានមួយចំនួនយើងអត់ដឹងទេ យើងចូលទៅអត់បានដែរ ហើយប្រសិនបើយើងមានអីមួយ ជាអាងជាអី យើងអាចសួរបញ្ហា សួរពត៌មានអីបាន»។
ឆ្លើយតបនឹងការលើកឡើងរបស់ក្រុមពលករដែលថា ពួកគេពិបាកនឹងទទួលបានជំនួយពីស្ថានទូត លោក ម៉ៅ ភិរុណ បញ្ជាក់ថា មានករណីជាច្រើនដែលស្ថានទូតបានជួយនៅពេលពលករត្រូវការជំនួយ ដោយការចុះទៅជួបផ្ទាល់ ឬតាមទូរស័ព្ទ៖ «ស្ថានទូតទី១ គឺទំនាក់ទំនង ទី២ មើលទៅតាមកន្លែងតំបន់ណា និយាយអោយចំគឺមើលរឿងថា រឿងណាគួរ មិនគួរ បើអាចធ្វើតាមទូរស័ព្ទបានធ្វើ ធ្វើមិនបានចាំយើងចុះផ្ទាល់»។
ទាក់ទងនឹងបញ្ហារបស់ពលករចំណាកស្រុកនេះ រដ្ឋាភិបាលកម្ពុជា និងថៃ កំពុងព្យាយាមកាត់បន្ថយចំនួនពលករដែលទៅធ្វើការដោយខុសច្បាប់ ដែលធ្វើអោយពួកគេងាយរងគ្រោះ ជាពិសេសពលករដែលទៅធ្វើការនៅលើទូកនេសាទថៃ។ ពលករទាំងនោះត្រូវគេជួញដូរ រំលោភបំពានសិទ្ធិ ឬអាចហៅបានថា ទាសភាពសម័យទំនើប៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។