កម្ពុជាសង្គ្រោះពលកររងគ្រោះពីឥណ្ឌូនេស៊ីនិងម៉ាឡេស៊ី
2015.05.10
មន្ត្រីអ្នកនាំពាក្យក្រសួងការបរទេសកម្ពុជា លោក កុយ គួង ផ្ដល់បទសម្ភាសន៍ដល់អ្នកកាសែត នៅក្រសួងការបរទេសកម្ពុជា បន្ទាប់ពីជំនួបរវាងរដ្ឋមន្ត្រីក្រសួងការបរទេសកម្ពុជា លោក ហោ ណាំហុង ជាមួយឯកអគ្គរាជទូតថៃ ប្រចាំកម្ពុជា នៅថ្ងៃទី១៥ ខែមីនា ឆ្នាំ២០១១។
មន្ត្រីជាន់ខ្ពស់នៃក្រសួងការបរទេសកម្ពុជា ឲ្យដឹងថា ពលករខ្មែររងគ្រោះចំនួន ៥៩នាក់ នឹងត្រឡប់ពីប្រទេសឥណ្ឌូនេស៊ី នៅថ្ងៃទី១១ ខែឧសភា ខាងមុខ។ ចំណែកពលការិនី និងនារីជំនួយការមេផ្ទះចំនួន ៣នាក់ទៀត គ្រោងនឹងត្រឡប់ពីប្រទេសម៉ាឡេស៊ី នៅថ្ងៃសៅរ៍ ទី១៦ ឧសភា។
លោក កុយ គួង អ្នកនាំពាក្យក្រសួងការបរទេសបញ្ជាក់ថា ស្ថានទូតកម្ពុជាប្រចាំនៅឥណ្ឌូនេស៊ី និងម៉ាឡេស៊ី បានអន្តរាគមន៍ជួយពលរដ្ឋខ្មែរចំនួន ៥៩នាក់ ពីទូកនេសាទខុសច្បាប់របស់ថៃ។ លោកបន្តថា ស្ថានទូតខ្មែរបានសហការយ៉ាងជិតស្និទ្ធជាមួយអង្គការទេសន្តរប្រវេសក៍អន្តរជាតិ (IOM) ដើម្បីធ្វើមាតុភូមិនិវត្តន៍ពលករទាំង ៥៩នាក់នេះមកកម្ពុជាវិញ។ លោកបន្តថា អាជ្ញាធរនៃប្រទេសឥណ្ឌូនេស៊ី បានចាប់ទូកនេសាទថៃ ដែលបានឆ្លងដែនចូលនេសាទក្នុងដែនទឹករបស់ប្រទេសនេះដោយខុសច្បាប់ ហើយបានរកឃើញពលករខ្មែរដែលធ្វើការលើទូកនេសាទទាំងនោះ។
ទោះជាយ៉ាងណាក៏ដោយ លោក កុយ គួង បញ្ជាក់ថា អាជ្ញាធរកម្ពុជា កំពុងតាមដានដើម្បីចាប់មេខ្យល់បានបោកបញ្ឆោតពលរដ្ឋខ្មែរទាំងនោះឲ្យទៅធ្វើការនៅលើទូកនេសាទរបស់ថៃ យកមកផ្ដន្ទាទោសតាមផ្លូវច្បាប់។
ប្រធានកម្មវិធីការងារនៃមជ្ឈមណ្ឌលអប់រំច្បាប់សម្រាប់សហគមន៍ លោក មឿន តុលា មានប្រសាសន៍ថា សង្គមស៊ីវិលមួយចំនួននៅកម្ពុជា កំពុងសហការគ្នាជាមួយអង្គការទេសន្តរប្រវេសក៍អន្តរជាតិ ដើម្បីស្វែងរកលទ្ធភាពក្នុងការផ្ដល់សេវាផ្សេងៗដល់ពួកគេនៅពេលមកដល់កម្ពុជាវិញ។ លោកបញ្ជាក់ថា សេវាទាំងនោះរួមមានការផ្ដល់កន្លែងស្នាក់នៅបណ្ដោះអាសន្ន ការផ្ដល់អាហារ ការផ្ដល់ជាសោហ៊ុយ ឬមធ្យោបាយក្នុងការធ្វើដំណើរ ការផ្ដល់សេវាផ្នែកច្បាប់ក្នុងការដាក់ពាក្យបណ្ដឹងដើម្បីចាប់ខ្លួនក្រុមមេខ្យល់ និងការផ្ដល់សេវាបណ្ដុះបណ្ដាលជំនាញផ្សេងៗដល់ពួកគេ។
លោក មឿន តុលា បន្តថា ពលរដ្ឋខ្មែររាប់ពាន់នាក់ត្រូវបានគេជួញដូរកម្លាំងពលកម្មខុសច្បាប់ទៅធ្វើការលើទូកនេសាទថៃ ដោយខុសច្បាប់។ លោកបញ្ជាក់ថា ករណីជួញដូរនេះកើតឡើងទៅបានដោយសារមានការឃុបឃិតគ្នារវាងសមត្ថកិច្ចរបស់រដ្ឋាភិបាលនៅតាមច្រកព្រំដែន និង ក្រុមឈ្មួញ ឬក្រុមមេខ្យល់។ លោកបន្តថា រហូតមកទល់ពេលនេះនៅមានពលករខ្មែររាប់ពាន់នាក់ទៀតកំពុងជាប់នៅតាមបណ្ដាប្រទេសមួយចំនួនទៀតក្នុងតំបន់អាស៊ី និងនៅអាហ្វ្រិក។
ក្រសួងការបរទេសឲ្យដឹងទៀតថា យ៉ាងហោចណាស់មានពលករខ្មែរចំនួន ៣៦នាក់ទៀតនៅលើកោះបេនជីណា (Benjina) ប្រទេសឥណ្ឌូនេស៊ី ហើយដែលមន្ត្រីស្ថានទូត និងមន្ត្រីអង្គការទេសន្តរប្រវេសក៍អន្តរជាតិ នឹងទៅជួបសម្ភាសន៍ផ្ទាល់នៅថ្ងៃទី១២ ខែឧសភា ខាងមុខនេះ ដើម្បីបញ្ជូនពលករទាំង ៣៦នាក់នេះមកមាតុប្រទេសវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ការប្រារព្ធពិធីបុណ្យចូលឆ្នាំថ្មី នៅតាមតំបន់មួយចំនួននៅស្រុកសុរិន្ទ
